લંડનમાં સાગર અદાણીની મોટી જાહેરાત; 2030 સુધીમાં 50 GW ક્લિન એનર્જી અને 10 GW પરમાણુ ઊર્જા ક્ષમતા વિકસાવવાનું લક્ષ્ય

Adani Green Energy Dialogue London Science Museum: ઊર્જા સુરક્ષાને મજબૂત કરવા અને આર્થિક વિકાસને ટેકો આપવા માટે વૈશ્વિક સ્તરે ઝડપી વીજળીકરણ (ઇલેક્ટ્રિફિકેશન) અત્યંત અનિવાર્ય બન્યું છે. લંડન આબોહવા કાર્યવાહી સપ્તાહ (London Climate Action Week) ના ઉદ્ઘાટન પ્રસંગે લંડનના સાયન્સ મ્યુઝિયમ ખાતે 'ઊર્જા સંક્રમણ કમિશન' (ETC) અને 'અદાણી ગ્રીન એનર્જી લિમિટેડ' (AGEL) ના સંયુક્ત ઉપક્રમે એક ઉચ્ચ સ્તરીય વૈશ્વિક ઊર્જા સંવાદનું આયોજન કરવામાં આવ્યું હતું. આ સંવાદમાં અદાણી ગ્રીન એનર્જી લિ.ના એક્ઝિક્યુટિવ ડિરેક્ટર સાગર અદાણીએ સંગ્રહ ક્ષમતા સાથેની સંકલિત નવીનીકરણીય ઊર્જા પર વિશેષ ભાર મૂક્યો હતો.

ચોવીસ કલાક સ્વચ્છ ઊર્જા માટે સ્ટોરેજ ટેકનોલોજી અનિવાર્ય: સાગર અદાણી

આંતરરાષ્ટ્રીય નીતિ નિર્માતાઓ, રોકાણકારો અને આબોહવા નિષ્ણાતોની ઉપસ્થિતિમાં સાગર અદાણીએ જણાવ્યું હતું કે, વર્તમાન સમયમાં ઊર્જા સુરક્ષા, પોષણક્ષમતા અને ટકાઉપણું એ મુખ્ય પડકારો છે, જેનો સૌથી અસરકારક ઉકેલ વીજળીકરણ છે. તેમણે ઉમેર્યું કે, જ્યારે નવીનીકરણીય ઊર્જાને બેટરી એનર્જી સ્ટોરેજ સિસ્ટમ્સ (BESS) અને પમ્પ્ડ સ્ટોરેજ પ્રોજેક્ટ્સ (PSPs) જેવી ટેકનોલોજી સાથે જોડવામાં આવે છે, ત્યારે જ તે સંપૂર્ણ ક્ષમતા પ્રાપ્ત કરીને 24 કલાક સસ્તી અને વિશ્વસનીય ઊર્જા પૂરી પાડી શકે છે.

ગુજરાતના ખાવડા પ્રોજેક્ટનો કર્યો ઉલ્લેખ

ગુજરાતના ખાવડા ખાતે વિશ્વના સૌથી મોટા નવીનીકરણીય ઊર્જા પ્લાન્ટ મારફત અદાણી ગ્રીન વર્ષ 2030 સુધીમાં 50 ગીગાવોટ (50 GW) ની ક્ષમતા હાસલ કરવા તરફ ઝડપથી આગળ વધી રહી છે, જેમાં સ્વચ્છ ઊર્જાને મોટા પાયે સ્ટોરેજ સાથે સંકલિત કરવામાં આવી રહી છે.

વૈશ્વિક નિષ્ણાતોનો સૂર: અર્થતંત્રનું ડીકાર્બોનાઇઝેશન સમયની માંગ

ETC ના સહ-અધ્યક્ષ લોર્ડ એડેર ટર્નર અને યુકે ક્લાઇમેટ ચેન્જ કમિટીના અધ્યક્ષ નિગેલ ટોપિંગની અધ્યક્ષતામાં બે ઉચ્ચ સ્તરીય સત્રો યોજાયા હતા. આ સત્રોમાં ઓક્ટોપસ એનર્જી, સ્નેડર ઇલેક્ટ્રિક, ક્લાઇમેટ બોન્ડ્સ ઇનિશિયેટિવ અને ગ્રીન ફાઇનાન્સ ઇન્સ્ટિટ્યૂટના અગ્રણીઓએ ભાગ લીધો હતો.

લોર્ડ ટર્નરે જણાવ્યું કે, ગ્લોબલ વોર્મિંગને મર્યાદિત કરવા માટે માર્ગ પરિવહન, બાંધકામ હીટિંગ અને ભારે ઉદ્યોગોમાં તકનીકી પ્રગતિ દ્વારા વીજળીકરણ કરવું અને વીજ ઉત્પાદનને કાર્બનમુક્ત (ડીકાર્બોનાઇઝ) કરવું ખૂબ જરૂરી છે. નિગેલ ટોપિંગે નોંધ્યું કે, આધુનિક ગ્રીડ પ્રણાલીમાં સુગમતા લાવવા અને ટેકનોલોજીનો ખર્ચ ઘટાડવાથી આ ક્ષેત્રમાં મોટું રોકાણ આકર્ષી શકાશે.

યુરોપ, એશિયા અને ઉત્તર અમેરિકામાં વધી રહેલા ગરમીના મોજા અને ડિજિટલ માળખા તેમજ આર્ટિફિશિયલ ઇન્ટેલિજન્સ (AI) અને ડેટા સેન્ટરોના કારણે વીજળીની વૈશ્વિક માંગ ખૂબ જ ઝડપથી વધવાની અપેક્ષા છે, જેને પહોંચી વળવા માટે લાંબા ગાળાની નીતિઓ જરૂરી છે.

અદાણી ગ્રૂપનું 100 બિલિયન ડોલરનું રોકાણ અને ન્યૂક્લિયર એનર્જી પ્લાન

ઊર્જા સંક્રમણ અને સંબંધિત માળખાગત સુવિધાઓ માટે અદાણી સમૂહે 100 બિલિયન યુએસ ડોલરથી વધુનું રોકાણ કર્યું છે. સમૂહ દ્વારા ટ્રાન્સમિશન, ગ્રીન હાઇડ્રોજન અને આગામી પેઢીના ઔદ્યોગિક ઇકોસિસ્ટમમાં રોકાણ ચાલુ રાખવામાં આવ્યું છે. તાજેતરમાં યોજાયેલી વાર્ષિક સામાન્ય સભા (AGM) માં અદાણી ગ્રૂપના ચેરમેન ગૌતમ અદાણીએ ભારતની ઊર્જા જરૂરિયાતો માટે પ્રતિબદ્ધતા દર્શાવતા એક મોટી જાહેરાત કરી હતી.

અદાણી ગ્રૂપ પોતાના વૈવિધ્યસભર ઊર્જા પોર્ટફોલિયોના ભાગરૂપે 10 ગીગાવોટ (10 GW) ની પરમાણુ ઊર્જા (ન્યૂક્લિયર એનર્જી) ક્ષમતા વિકસાવવાની યોજના ધરાવે છે, જે સ્વચ્છ અને ઓછા કાર્બનવાળી વીજળી પૂરી પાડવામાં પૂરક બનશે. કાર્યક્રમના અંતે સહભાગીઓએ માર્ચ 2024 માં શરૂ થયેલી સાયન્સ મ્યુઝિયમની ઊર્જા ગેલેરીની મુલાકાત લીધી હતી, જેની અત્યાર સુધીમાં 10 લાખથી વધુ લોકો મુલાકાત લઈ ચૂક્યા છે.