ઊંચા ભાવ વચ્ચે પણ માર્ચ ત્રિમાસિકમાં સોનાની એકંદર માગ ૧૦ ટકા વધી
મુંબઈ : વર્તમાન વર્ષના માર્ચ ત્રિમાસિકમાં દેશમાં ગોલ્ડની ઈન્વેસ્ટમેન્ટ માગ જ્વેલરીની માગ કરતા પહેલી જ વખત ઊંચી રહી છે. ઊંચા ભાવ વચ્ચે પણ સોનાની સેફ હેવન માગ નીકળી હતી. આ ઉપરાંત અમેરિકાની ટેરિફ નીતિ તથા માર્ચમાં યુદ્ધને પરિણામે ઈક્વિટી પરના વળતર નબળા રહેતા ઈન્વેસ્ટરો સોનામાં રોકાણ તરફ વળ્યા હતા એમ વર્લ્ડ ગોલ્ડ કાઉન્સિલના સુત્રોએ જણાવ્યું હતું. વૈશ્વિક કેન્દ્રીય બેન્કોના ટેકા સાથે ૨૦૨૬ના માર્ચ ત્રિમાસિકમાં સોનાની વૈશ્વિક માગ બે ટકા જેટલી વધી ૧૨૩૧ ટન રહી છે. માર્ચ ત્રિમાસિકમાં આરબીઆઈએ ૩૦૦ કી. ગ્રા. સોનાની ખરીદી કરી હતી.
સોનાની વૈશ્વિક માગ વધારવામાં ભારતની ભૂમિકા મુખ્ય રહી છે. માર્ચ ત્રિમાસિકમાં સોનાની ઊંચી માગને પરિણામે જ્વેલરીની માગમાં થયેલો ઘટાડો ભરપાઈ થઈ ગયો હતો. સોનાની ઈન્વેેસ્ટમેન્ટ માગ વાર્ષિક ધોરણે ૫૪ ટકા વધી ૮૨ ટન રહી હતી જ્યારે જ્વેલરી માગ ૧૯.૫૦ ટકા ઘટી ૬૬ ટન રહી હોવાનું કાઉન્સિલ દ્વારા જારી કરાયેલા રિપોર્ટમાં જણાવાયું હતું. ગોલ્ડની ઈન્વેસ્ટમેન્ટ માગ મૂલ્યની દ્રષ્ટિએ ૧૭૯ ટકા ઊંચી રહી છે.
દેશમાં સોનાનો એકંદર વપરાશ માર્ચ ત્રિમાસિકમાં વાર્ષિક ધોરણે ૧૦ ટકા વધી ૧૫૧ ટન રહ્યો હતો. કુલ વપરાશમાં ઈન્વેસ્ટમેન્ટ માગનો હિસ્સો વધીને ૫૫ ટકા રહ્યો હતો. જ્વેલરી માગનો હિસ્સો ઘટી ૪૪ ટકા સાથે વર્ષ ૨૦૦૦ની નીચી સપાટીએ જોવા મળ્યો છે. મૂલ્યની દ્રષ્ટિએ ગોલ્ડની એકંદર માગ ૯૯ ટકા વધી રૂપિયા ૨૨૭૫ અબજ રહી હતી.
નાણાંકીય તથા રિટેલ રોકાણકારોનું સોનામાં ઈન્વેસ્ટમેન્ટ આકર્ષણ વધી રહ્યું છે. ગોલ્ડ ઈટીએફસમાં ઈન્ફલો વાર્ષિક ધોરણે ૧૮૬ ટકા વધી ૨૦ ટન રહેવા પામ્યો છે. અમેરિકાની ટેરિફ નીતિ તથા માર્ચમાં ફાટી નીકળેલા ઈરાન યુદ્ધને પરિણામે ગોલ્ડ ઈટીએફસમાં રોકાણકારોનું આકર્ષણ વધ્યું છે.
૨૦૨૫ના પ્રારંભથી અત્યારસુધીમાં દેશમાં સોનાના ભાવ બમણા થઈ ગયા છે. સોનાની કુલ માગમાં કેન્દ્રીય બેન્કોની માગ ૨૪૪ ટન રહી હતી. કાઉન્સિલ દ્વારા જારી કરાયેલા ૨૦૨૬ના પ્રથમ ત્રિમાસિકના ગોલ્ડ ડીમાન્ડ ટ્રેન્ડ રિપોર્ટમાં જણાવાયું હતું કે, ૨૦૨૫ના માર્ચ ત્રિમાસિકમાં ૧૨૦૫ ટનની સરખામણીએ વર્તમાન વર્ષના માર્ચ ત્રિમાસિકમાં ગોલ્ડની એકંદર વૈશ્વિક માગ બે ટકા વધી ૧૨૩૧ ટન રહી છે.
મૂલ્યની દ્રષ્ટિએ માગ ૭૪ ટકા વધી વિક્રમી ૧૯૩ અબજ ડોલર રહી છે. માર્ચ ત્રિમાસિકમાં સોનાના સરેરાશ વૈશ્વિક ભાવ વાર્ષિક ધોરણે ૮૧ ટકા વધી પ્રતિ ઔંસ ૪૮૭૩ ડોલર રહ્યો હતો જે ૨૦૨૫ના માર્ચ ત્રિમાસિકમાં ૨૮૬૦ ડોલર રહ્યો હતો.
ભૌગોલિકરાજકીય તાણને પરિણામે રોકાણકારો સેફ હેવન તરીકે ગોલ્ડમાં રોકાણ તરફ વળ્યા છે. સેફ હેવન માગથી કોઈન તથા લગડીની વૈશ્વિક માગ ૪૨ ટકા ઊંચી રહી છે.
ચીનમાં લગડી તથા કોઈનની માગ ૬૭ ટકા વધી ૨૦૭ ટન્સ રહી છે. ચીન ઉપરાંત ભારત, દક્ષિણ કોરિઆ તથા જાપાનમાં પણ કોઈન તથા લગડીની માગમાં વધારો જોવા મળ્યો હોવાનું કાઉન્સિલના રિપોર્ટમાં નોંધવામાં આવ્યું હતું. વૈશ્વિક સ્તરે જ્વેલરી માગ ૨૩ ટકા ઘટી ૩૦૦ ટન રહી હતી.
