અમદાવાદ : યુરોપિયન યુનિયન (ઈયુ) ના કાર્બન ટેક્સના અમલીકરણ પછી, ભારતે તેની સ્ટીલ નિકાસ વ્યૂહરચનામાં નોંધપાત્ર સુધારો કરવાની તૈયારી શરૂ કરી દીધી છે. એક અહેવાલ મુજબ ભારત જાન્યુઆરીમાં અમલમાં આવેલા ઈયુના કાર્બન ટેક્સની અસરને ઘટાડવા માટે મધ્ય પૂર્વ અને એશિયામાં નવા સ્ટીલ નિકાસ બજારોની શોધ કરી રહ્યું છે.
ભારત વિશ્વનો બીજો સૌથી મોટો ક્રૂડ સ્ટીલ ઉત્પાદક દેશ છે. ભારત તેની કુલ સ્ટીલ નિકાસનો લગભગ બે તૃતીયાંશ ભાગ યુરોપમાં મોકલે છે, પરંતુ ઈયુના કાર્બન બોર્ડર એડજસ્ટમેન્ટ મિકેનિઝમ (CBAM)ના અમલીકરણથી ત્યાં થતી નિકાસ પર દબાણ વધ્યું છે.
સરકારે યુરોપના કાર્બન ટેક્સથી પ્રભાવિત નિકાસને ટેકો આપવા માટે સક્રિય બની છે. અને નિકાસ માટે નવા બજારોની શોધખોળ ચાલુ છે. હાલ મધ્ય પૂર્વના દેશો સાથે સોદા કરવાનો પ્રયાસ થઈ રહ્યા છે, જ્યાં મોટા પાયે માળખાગત પ્રોજેક્ટ્સ ચાલી રહ્યા છે. આ ઉપરાંત, એશિયામાં પણ તકોની શોધખોળ ચાલુ છે. ટુંકમાં, બજારોમાં વૈવિધ્યીકરણ કરવાનો પ્રયાસ થઈ રહ્યો છે.
સ્ટીલ કંપનીઓના સુત્રોએ જણાવ્યું હતું કે કંપનીઓ યુરોપિયન યુનિયનની બહારના બજારોમાં ચીન સાથે સ્પર્ધા કરવા માટે સરકારી સમર્થન માંગી રહી છે, જ્યાં ચીનનું પ્રભુત્વ છે. વિશ્વના સૌથી મોટા સ્ટીલ ઉત્પાદક ચીન, ૨૦૨૩ થી મજબૂત નિકાસ જાળવી રાખ્યું છે અને ડિસેમ્બરમાં રેકોર્ડ માસિક ઉચ્ચતમ સ્તરે પહોંચ્યું છે. બેઇજિંગ આ વર્ષે એલોય નિકાસને નિયંત્રિત કરવા માટે લાઇસન્સિંગ સિસ્ટમ લાગુ કરવાની યોજના ધરાવે છે, કારણ કે વધેલી નિકાસ વિશ્વભરમાં સંરક્ષણવાદને વેગ આપી રહી છે.
ભારત કોકિંગ કોલ, ચૂનાના પથ્થર, મેંગેનીઝ અને અન્ય આવશ્યક ખનિજોનો પુરવઠો સુરક્ષિત કરવા માટે તેના પ્રયાસો વધારી રહ્યું છે. ભારત હવે લાંબા ગાળાના ઉપાડ કરારો અને ખાણો/સંપત્તિઓના સંપાદન પર ધ્યાન કેન્દ્રિત કરીને બ્રાઝિલ, આર્જેન્ટિના, ઓસ્ટ્રેલિયા અને મધ્ય પૂર્વમાં તકો શોધી રહી છે.
