નવા પ્રોજેકટસની જાહેરાતમાં પચાસ ટકા ઘટાડો
મુંબઈ : સપ્ટેમ્બર ત્રિમાસિકમાં નવા પ્રોજેકટસની જાહેરાતમાં વાર્ષિક ધોરણે પચાસ ટકા ઘટાડો નોંધાયો છે. ગયા વર્ષના સપ્ટેમ્બર ત્રિમાસિકની સરખામણીએ વર્તમાન વર્ષના આ ગાળામાં નવા પ્રોજેકટસની જાહેરાત મૂલ્યની દ્રષ્ટિએ ૪૬ ટકા ઘટી રૂપિયા ૫.૨૦ ટ્રિલિયન રહી હોવાનું સેન્ટર ફોર મોનિટરિંગ ઈન્ડિયન ઈકોનોમીના ડેટા જણાવે છે.
વૈશ્વિક સ્તરે અનિશ્ચિતતાને પગલે ખાનગી ક્ષેત્રની સરખામણીએ કેન્દ્ર તથા રાજ્ય સરકારોના પ્રોજેકટસની જાહેરાતમાં વધુ ઘટાડો જોવા મળ્યો છે.
કેન્દ્ર તથા રાજ્ય સરકારોના નવા પ્રોજેકટસનું મૂલ્ય ૮૩ ટકા ઘટી રૂપિયા ૬૦,૦૦૦ કરોડ રહ્યું છે. ગયા વર્ષના આ ગાળામાં જાહેરાત થયેલા પ્રોજેકટસનું મૂલ્ય રૂપિયા ૩.૬૦ ટ્રિલિયન રહ્યું હતું.
વર્તમાન નાણાં વર્ષના સપ્ટેમ્બર ત્રિમાસિકમાં ખાનગી ક્ષેત્ર દ્વારા જાહેર થયેલા પ્રોજેકટસનું મૂલ્ય રૂપિયા ૪.૬૦ ટ્રિલિયન રહ્યું છે જે ગયા વર્ષના આ ગાળાની તુલનાએ ૨૪ ટકા ઓછું છે.
ઉત્પાદન ક્ષેત્રના પ્રોજેકટસમાં ૪ ટકાનો સામાન્ય ઘટાડો રહીને રૂપિયા ૩.૮૦ ટ્રિલિયન રહ્યો હતો જ્યારે વીજ પ્રોજેકટસના મૂલ્યમાં ૯૦ ટકા ઘટાડો થઈને રૂપિયા ૨૨૦૦૦ કરોડના રહ્યા હતા.
નોન-ફાઈનાન્સિઅલ સર્વિસીઝ, બાંધકામ તથા રિઅલ એસ્ટેટ અને ઈરિગેશન પ્રોજેકટસ દરેકમાં ૬૦ ટકાથી વધુનો ઘટાડો રહ્યો હોવાનું પણ સેન્ટર ફોર મોનિટરિંગ ઈન્ડિયન ઈકોનોમીના ડેટા જણાવે છે.
એક તરફ સરકાર દ્વારા એપ્રિલથી ઓગસ્ટના ગાળામાં મૂડી ખર્ચમાં વધારો થયો છે જ્યારે બીજી બાજુ સરકારના નવા પ્રોજેકટસના આંક ઘટી રહ્યા છે. વર્તમાન વર્ષના જુલાઈમાં ૫.૩૦ ટકા ઘટાડા બાદ મૂડીખર્ચમાં ઓગસ્ટમાં ૧૧૩ ટકા વધારો જોવા મળ્યો છે.
ગુડસ એન્ડ સર્વિસીઝ ટેકસ (જીએસટી) માળખામાં ફેરબદલને કારણે રાજ્યોની આવક પર પડનારી સૂચિત અસરને ધ્યાનમાં રાખી રાજ્ય સરકારો પણ મૂડી ખર્ચમાં આગળ વધવામાં સાવચેતી ધરાવી રહી હોવાનું માળખાકીય પ્રોજેકટસ હાથ ધરતી એક કંપનીના અધિકારીએ જણાવ્યું હતું. નવા પ્રોજેકટસ જાહેર થવાની માત્રા ધીમી પડી છે ત્યારે પ્રોજેકટ પૂરા થવાની માત્રામાં ૧૭.૬૦ ટકા વધારો થયો હોવાનું પણ પ્રાપ્ત ડેટા જણાવે છે.
