મુંબઈ : મુંબઈ ઝવેરી બજારમાં આજે સોના-ચાંદીના ભાવ નીચા ખુલ્યા પછી વધ્યા હતા. છતાં એકંદરે બંધ ભાવ પાછલા બંધ ભાવથી નીચા રહ્યા હતા. વિશ્વ બજારના સમાચાર ઘટાડા પછી વૃદ્ધી બતાવી રહ્યા હતા. વૈશ્વિક સોનાના ભાવ ઔંસના ૪૮૧૫થી ૪૮૧૬ વાળા નીચામાં ભાવ ૪૭૬૭ થયા પછી ઉંચામાં ભાવ ૪૮૨૩ થઈ ૪૮૨૧થી ૪૮૨૨ ડોલર રહ્યાના સમાચાર હતા.
જો કે ઘરઆંગણે કરન્સી બજારમાં આજે રૂપિયો ઉછળતાં તથા રૂપિયા સામે ડોલર ગબડતાં ઝવેરી બજારમાં ભાવ દબાણ હેઠળ જોવા મળ્યા હતા. અમદાવાદ ઝવેરી બજારમાં આજે સોનાના ભાવ ૧૦ ગ્રામદીઠ રૂ.૧૫૦૦ ઘટી ૯૯૫ના ભાવ રૂ.૧૫૫૭૦૦ તથા ૯૯૯ના રૂ.૧૫૬૦૦૦ રહ્યા હતા.
અમદાવાદ ચાંદીના ભાવ કિલોના રૂ.૨૪૫૦૦૦ રહ્યા હતા. દરમિયાન, વિશ્વ બજારમાં ચાંદીના ભાવ ઔંસના ૭૯.૨૧ વાળા નીચામાં ભાવ ૭૭.૭૯ તથા ઉંચામાં ભાવ ૮૦.૨૯ થઈ ૮૦,૨૬થી ૮૦.૨૭ ડોલર રહ્યા હતા.
પ્લેટીનમના ભાવ ૨૧૩૬ વાળા નીચામાં ૨૦૬૯ તથા ઉંચામાં ૨૧૨૦ ડોલર થઈ ૨૧૧૮થી ૨૧૧૯ ડોલર રહ્યા હતા. પેલેડીયમના ભાવ ૧૫૮૫ વાળા નીચામાં ૧૫૩૯ તથા ઉંચામાં ૧૫૬૭ થઈ ૧૫૬૭થી ૧૫૬૮ ડોલર રહ્યા હતા. વૈશ્વિક કોપરના ભાવ આજે ૦.૩૩ ટકા માઈનસમાં રહ્યા હતા.
દરમિયાન, મુંબઈ બુલિયન બજારમાં સોનાના ભાવ જીએસટી વગર ૯૯૫ના રૂ.૧૫૨૪૯૩ વાળા રૂ.૧૫૦૭૫૨ થઈ રૂ.૧૫૧૦૪૮ રહ્યા હતા જ્યારે ૯૯૯ના ભાવ રૂ.૧૫૩૧૦૬ વાળા રૂ.૧૫૧૩૫૮ થઈ રૂ.૧૫૧૬૫૫ રહ્યા હતા. મુંબઈ ચાંદીના ભાવ જીએસટી વગર રૂ.૨૫૧૨૯૨ વાળા નીચામાં રૂ.૨૪૭૯૩૦ થઈ રૂ.૨૪૯૯૪૦ રહ્યા હતા. મુંબઈ સોના-ચાંદીમાં જીએસટી સાથેના ભાવ આ ભાવથી ૩ ટકા ઉંચા રહ્યા હતા. દરમિયાન, વિશ્વ બજારમાં આજે ક્રૂડતેલના ભાવ વધ્યા પછી પાંચ ટકા તૂટયા હતા.
ઈરાન-અમેરિકા વચ્ચે યુદ્ધ વિરામના સંકેતો તથા શાંતિ મંત્રણા વચ્ચે ઈરાને સ્ટ્રેઈટ ઓફ હોર્મુઝ ફરી ખુલ્લી કર્યાના સમાચાર હતા. બ્રેન્ટ ક્રૂડના ભાવ બેરલદીઠ ઉંચામાં ૯૮.૯૮ થયા પછી ભાવ ગબડી નીચામાં ૯૪.૩૬ થઈ ૯૪.૮૮ ડોલર રહ્યા હતા. જ્યારે યુએસ ક્રૂડના ભાવ ઉંચામાં ૯૪.૦૪ તથા નીચામાં ભાવ ૮૯.૪૫ થઈ ૮૯.૭૯ ડોલર રહ્યા હતા.
ઈઝરાયલ તથા લેબેનોન વચ્ચે યુદ્ધ વિરામ વિૅશે સમજૂતી થતાં તેની અસર પણ ક્રૂડતેલ બજાર પર દેખાઈ હતી. મોડી સાંજે વિશ્વ બજારમાં ક્રૂડતેલના ભાવ ૧૦થી ૧૧ ટકા ગબડયા હતા તથા બ્રેન્ટ ક્રૂડના ભાવ નીચામાં ૮૭.૭૧ ડોલર તથા યુએસ ક્રૂડના ભાવ નીચામાં ૮૩.૦૦ ડોલર સુધી ઉતરી ગયા હતા.
