દલાલ સ્ટ્રીટમાં દિવાળીઃ સેન્સેક્સમાં 2000 પોઈન્ટથી વધુનો ઉછાળો, જાણો તેજીના મુખ્ય કારણ

Dalal Street shines bright before Diwali : દિવાળી પહેલા જ દલાલ સ્ટ્રીટમાં રોકાણકારો માટે ખુશીનો માહોલ છવાઈ ગયો છે. 5 November, 2026ના રોજ ભારતીય શેરબજારે શાનદાર શરૂઆત કરી છે, જેમાં સેન્સેક્સ 2000 પોઇન્ટ કરતાં વધુ પોઇન્ટસના ઉછાળા પર છે, જ્યારે NSEનો નિફ્ટી50 પણ 2 ટકા જેટલો ઉછળીને 24,350ની સપાટીને વટાવી ગયો છે. બજારમાં આવેલા આ ધમાકેદાર ઉછાળાને કારણે માત્ર થોડી જ મિનિટોમાં રોકાણકારોની સંપત્તિમાં 6.9 લાખ કરોડ રૂપિયાથી વધુનો વધારો જોવા મળ્યો છે.

તો ચાલો જાણીએ બજારની તેજીના મુખ્ય કારણો શું છે.

1. ક્રૂડ ઓઇલના ભાવોમાં મોટો ઘટાડો

આજે શેરબજારને સૌથી મોટો ટેકો આંતરરાષ્ટ્રીય સ્તરે ક્રૂડ ઓઇલના ઘટેલા ભાવોએ આપ્યો છે. બ્રેન્ટ ક્રૂડ ઓઇલના ભાવ ઘટીને 100 ડૉલરની નીચે (આશરે $94 પ્રતિ બેરલની આસપાસ) પહોંચી ગયા છે. ભારત તેની જરૂરિયાતનું મોટાભાગનું ઓઇલ આયાત કરતું હોવાથી, ક્રૂડ સસ્તું થવાથી દેશનું આયાત બિલ ઘટશે, ફુગાવાનું દબાણ હળવું થશે અને અર્થતંત્રને સીધો ફાયદો થશે.

2. અમેરિકાની મિડટર્મ ચૂંટણીના પરિણામો અને વૈશ્વિક સેન્ટિમેન્ટ

અમેરિકામાં યોજાયેલી મિડટર્મ ચૂંટણીના પરિણામોએ વૈશ્વિક બજારોની ચિંતા ઓછી કરી છે. યુએસ કોંગ્રેસમાં ડેમોક્રેટ્સની જીત બાદ વૈશ્વિક વેપારની નીતિઓમાં સ્થિરતા આવવાની અને પશ્ચિમ એશિયાના તણાવમાં ઘટાડો થવાની આશા બંધાઈ છે. આ રાજકીય અને વૈશ્વિક હકારાત્મકતાએ ભારતીય શેરબજારના સેન્ટિમેન્ટને મજબૂત બનાવ્યું છે.

3. વિદેશી રોકાણકારો(FIIs)ની ઘરવાપસી

ભારતીય બજારમાંથી લાંબા સમય સુધી નાણાં પાછા ખેંચનારા વિદેશી સંસ્થાગત રોકાણકારો(FIIs) હવે ફરીથી સક્રિય થયા છે. છેલ્લા કેટલાક દિવસોથી વિદેશી રોકાણકારો દ્વારા ભારતીય ઇક્વિટીમાં સતત રોકાણ કરાઈ રહ્યું છે. ક્રૂડના ઘટતા ભાવો અને સારા કોર્પોરેટ પરિણામોને કારણે વિદેશી ફંડ્સનો પ્રવાહ ફરી એકવાર ભારતીય બજાર તરફ વળ્યો છે.

4. રૂપિયામાં મજબૂતાઈ

યુએસ ડૉલર સામે ભારતીય રૂપિયાની ચાલમાં પણ સુધારો જોવા મળ્યો છે. ડૉલર ઇન્ડેક્સમાં નરમાઈ અને સ્થાનિક બજારના સકારાત્મક વલણને કારણે રૂપિયો મજબૂત સ્થિતિમાં ખુલ્લો છે. રૂપિયાની આ મજબૂતાઈ વિદેશી રોકાણકારોના રિટર્નને સુરક્ષિત રાખવામાં અને આયાત ખર્ચ ઘટાડવામાં મદદરૂપ સાબિત થઈ રહી છે.

5. ઓટો, બૅન્કિંગ અને રિયલ્ટી સેક્ટરમાં વ્યાપક ખરીદી

આ તેજી માત્ર અમુક શેરો પૂરતી મર્યાદિત ન રહેતા બ્રોડ-બેઝ્ડ (વ્યાપક) રહી છે. બજારમાં પ્રાઇવેટ બૅન્કો, ઓટોમોબાઇલ, રિયલ્ટી અને આઇટી સેક્ટરના શેરોમાં જબરદસ્ત ખરીદી જોવા મળી રહી છે. ખાસ કરીને સસ્તું ઇંધણ મળવાની આશાએ એવિએશન અને ઓટો શેરોમાં તેજીનો મોટો કરંટ જોવા મળ્યો છે, જેનાથી બજારને રૅકોર્ડ ઉંચાઈ તરફ દોડી જવામાં વેગ મળ્યો છે.