ટ્રમ્પના એક નિર્ણયથી ક્રૂડ ઓઈલના ભાવમાં ભૂકંપ, વિશ્વભરના શેરબજારમાં પ્રચંડ તેજીના સંકેત

Donald Trump and Crude Oil : અમેરિકાના પ્રમુખ ડોનાલ્ડ ટ્રમ્પ દ્વારા ઈરાન પરના હુમલા ટાળવા અને બે સપ્તાહના 'ડબલ-સાઇડેડ સીઝફાયર' પર સહમતી દર્શાવ્યા બાદ વૈશ્વિક નાણાકીય બજારમાં જોરદાર તેજી જોવા મળી છે. ટ્રમ્પની 'સભ્યતા ખતમ કરવાની' ધમકી બાદ સર્જાયેલો ફફડાટ હવે રાહતમાં ફેરવાયો છે, જેના પગલે ક્રૂડ ઓઈલના ભાવમાં મોટો કડાકો બોલી ગયો છે.

તેલના ભાવમાં જંગી ઘટાડો

સીઝફાયરના સમાચાર વહેતા થતા જ અમેરિકન ક્રૂડ ઓઈલ (US Crude) ના ભાવમાં 18% સુધીનો ઘટાડો જોવા મળ્યો છે, જે ઘટીને $92.60 ની આસપાસ પહોંચી ગયો છે. જ્યારે આંતરરાષ્ટ્રીય સ્ટાન્ડર્ડ ગણાતા બ્રેન્ટ ક્રૂડ (Brent Crude) ના ભાવમાં પણ 14.4% નો ઘટાડો નોંધાયો છે, જે અત્યારે $93.48 પ્રતિ બેરલ પર ટ્રેડ થઈ રહ્યો છે. જોકે, આ ભાવ હજુ પણ યુદ્ધ પહેલાના સ્તર કરતા ઘણા ઊંચા છે.

શેરબજારમાં બમ્પર તેજી

અનિશ્ચિતતાના વાદળો હટતા જ શેરબજારમાં રોકાણકારોનો ઉત્સાહ વધ્યો છે:

અમેરિકન બજાર: ડાઉ ફ્યુચર્સ (Dow Futures) માં 930 પોઈન્ટ્સનો ઉછાળો જોવા મળ્યો છે.

એશિયન માર્કેટ: જાપાનનો નિક્કી (Nikkei) ઇન્ડેક્સ 4% અને દક્ષિણ કોરિયાનો કોસ્પી (Kospi) 6% જેટલો ઉછળ્યો છે.

ભારત પર અસર: હોર્મુઝ સામુદ્રધુની ખુલવાના સમાચારથી મોંઘવારીમાં ઘટાડો આવવાની આશાએ ભારતીય રોકાણકારોમાં પણ રાહત જોવા મળી છે.

મોંઘવારી પર કાબૂ આવવાની આશા

અત્યાર સુધી અમેરિકામાં પેટ્રોલ (ગેસ) ના ભાવ વધીને સરેરાશ $4.14 પ્રતિ ગેલન પર પહોંચી ગયા હતા. યુદ્ધ શરૂ થયા બાદ અમેરિકી ટ્રેઝરી યીલ્ડમાં થયેલા વધારાને કારણે મોર્ટગેજ અને અન્ય લોન મોંઘી થઈ હતી, પરંતુ સીઝફાયર બાદ હવે બોન્ડ માર્કેટમાં પણ સ્થિરતા જોવા મળી રહી છે. 10 વર્ષના ટ્રેઝરી યીલ્ડ ઘટીને 4.24% પર આવી ગયા છે.

હોર્મુઝ ખુલતા પુરવઠો સામાન્ય થશે

ઈરાનના વિદેશ મંત્રીએ પુષ્ટિ કરી છે કે આગામી બે સપ્તાહ સુધી હોર્મુઝના માર્ગે જહાજોની અવરજવર માટે પરવાનગી આપવામાં આવશે. જોકે, આ વ્યવસ્થા ઈરાની સૈન્યના સંચાલન હેઠળ રહેશે. જો આ પુરવઠો નિયમિત શરૂ થશે તો આગામી દિવસોમાં તેલના ભાવ હજુ પણ નીચે આવી શકે છે.