ઊંચા મૂલ્યાંકન સાથેની AI કંપનીઓ સ્પર્ધા વચ્ચે ખોવાઈ જશે

મુંબઈ : માઈક્રોસોફટના સહસ્થાપક બિલ ગેટસે ચેતવણી ઉચ્ચારી છે કે, ઊંચા મૂલ્યાંકન સાથેની કેટલીક આર્ટિફિસિઅલ ઈન્ટેલિજન્સ (એઆઈ) કંપનીઓ એઆઈ ઉદ્યોગમાં ભારે સ્પર્ધા વચ્ચે ખોવાઈ જશે. 

એક ટીવી ચેનલને આપેલી મુલાકાતમાં તેમણે જણાવ્યું હતું કે, ઊંચા મૂલ્યાંકન સાથેની દરેક કંપનીઓ ભારે સ્પર્ધામાં વિજયી થઈ શકતી નથી. 

એઆઈ બબલ દિવસોદિવસ વધતુ જાય છે એમ જણાવી તેમણે રોકાણકારોને કરેકશન માટે તૈયાર રહેવા સાવચેત કર્યા હતા. એઆઈ એકદમ ગહન ટેકનોલોજી છે જે વિશ્વને નવો આકાર આપશે. 

એઆઈની જોરદાર સ્પર્ધાને ધ્યાનમાં રાખતા થોડીઘણી કંપનીઓ જ લાંબા ગાળાની વિજેતા બની રહેશે અને મોટી સંખ્યાની કંપનીઓનું અપેક્ષિત મૂલ્ય નહીં જોવા મળે. 

અનેક એઆઈ કેન્દ્રીત કંપનીઓ ઐતિહાસિક ધોરણો કરતા ઊંચા મૂલ્યાંકને વેપાર થઈ રહી છે. શિક્ષણ, આરોગ્ય તથા કૃષિ જેવા ક્ષેત્રમાં એઆઈ લાભકારક બની રહેશે અને તેમાં કોઈએ શંકા કરવા જેવું નથી એમ તેમણે સદર મુલાકાતમાં એક પ્રશ્નના ઉત્તરમાં જણાવ્યું હતું.