ઘોઘામાં યુવકની છરીના ઘા ઝીંકી હત્યા કરનાર ત્રણ શખ્સ ગિરફ્તાર

ત્રણેય ઇસમને કોર્ટમાં રજૂ કરી રિમાન્ડની માંગ કરશે

ગાડી ચલાવવા બાબતે બે માસ પૂર્વે થયેલી માથાકૂટની પૂર્વ રજિશ રાખી યુવક પર દગાથી હુમલો

ભાવનગર -  ઘોઘા ગામના કસ્બાવાડા વિસ્તારમાં રહેતા અને ડ્રાઇવિંગ તેમજ એસી ફિટિંગનું કામ કરતા યુવકની અંગત અદાવતમાં ત્રણ ઈસમે તીક્ષ્ણ હથિયારના ઘા ઝીંકી હત્યા કરી દેવામાં આવી હતી.આ બનાવના સંદર્ભે ઘોઘા પોલીસે ત્રણેય હત્યારાને ઝડપી લઇ કાયદેસરની કાર્યવાહી હાથ ધરી છે

મળતી માહિતી મુજબ, ઘોઘા ગામના કસ્બાવાડા વિસ્તારમાં રહેતા અને ડ્રાઇવિંગ તેમજ એસી ફિટિંગનું કામ કરતા મોઇનભાઇ મોસીનભાઇ શેખ (ઉંમર વર્ષ ૨૫) અને આરોપીઓ વચ્ચે આશરે બે માસ પૂર્વે રોડ પર ગાડી ચલાવવા બાબતે સામાન્ય બોલાચાલી અને માથાકૂટ થઈ હતી. જે-તે સમયે આરોપીઓએ મોઇનભાઇને જાનથી મારી નાખવાની ધમકી આપીને ગાડી ધીમે ચલાવવા બાબતે બોલાચાલી કરી હતી. આ જૂની અદાવત મનમાં રાખીને ગત રોજ ઘોઘા ગામે આવેલી અસરરૃફા દરગાહ પાસે મોઇનભાઇ બેઠા હતા, ત્યારે અસલમ મહેબુબભાઇ શેખ (રહે. કસ્બાતીવાડા, ઘોઘા),સંજય ઉર્ફે લાલો રમેશભાઇ મેકવાન (રહે. ખ્રિસ્તીવાડા, ઘોઘા)

૩. જુલીયન સંજયભાઇ ઉર્ફે લાલો મેકવાન (રહે. ખ્રિસ્તીવાડા, ઘોઘા) ધસી આવ્યા હતા.અને મોઇનભાઇ પર અચાનક હુમલો કરી છાતી તથા હાથના ભાગે છરીના અસંખ્ય ઊંડા ઘા ઝીંકી દીધા હતા.ગંભીર રીતે ઘવાયેલા સારવાર અર્થે ભાવનગરની સર ટી. હોસ્પિટલ ખસેડવામાં આવ્યા હતા. જ્યાં ટૂંકી સારવાર દરમિયાન તેમનું મોત નીપજ્યું હતું. આ બનાવની ગંભીરતાને ધ્યાને લઈ ઘોઘા પોલીસે યુવકની હત્યા કરનાર ત્રણેય હત્યારાને ઝડપી લઇ કાયદેસરની કાર્યવાહી હાથ ધરી છે.આ બનાવ સંદર્ભે ડી વાય એસ પી સિંઘલે જણાવ્યું હતું કે પકડાયેલા ત્રણેય શખ્સને કોર્ટમાં રજૂ કરી રિમાન્ડની માંગ કરવામાં આવશે.