મુંબઈના વેપારીનું પાંચ કિલો સોનુ લઇ વડોદરાનો સોની ફરાર

વાઘોડિયારોડ પર મોટો જ્વેલરી શો રૃમ કરવાનો છે, તેવું કહીને મુંબઇના વેપારીને વડોદરા બોલાવી તેઓની પાસેનું અંદાજે પાંચ કિલોગ્રામ સોનુ લઇને દુકાન ખુલ્લી મૂકી દુકાનદાર અને તેનો સાગરીત ભાગી ગયા હતા. જે અંગે બાપોદ પોલીસે ગુનો દાખલ કરી કાયદેસરની કાર્યવાહી હાથ ધરી છે.
પોલીસ સૂત્રો દ્વારા મળતી માહિતી મુજબ, થોડા સમય પહેલા વાઘોડિયારોડ ઝવેરનગર પાસે આવેલા સાંઇ ગણેશ કોમ્પલેક્સમાં અંબિકા જ્વેલર્સ નામની દુકાન ભાડે લઇને ભાવિક સોનીએ ધંધો શરૃ કર્યો હતો. અમારે મોટા પાયે ધંધો શરૃ કરવો છે, તેવું કહીને તેણે મુંબઇના વેપારી હિમાંશુ જૈનનો સંપર્ક કર્યો હતો. મુંબઇના વેપારીએ તેઓને અઢી કિલો સોનુ થોડા સમય પહેલા દાગીના બનાવવા માટે આપ્યું હતું. આજે મુંબઇના વેપારી ફરીથી અઢી કિલો સોનુ લઈને આવ્યા હતા.
હિમાંશુ જૈને દુકાનદાર પાસેથી અઢી કિલોના દાગીના લઇ બેગમાં મૂક્યા હતા, જે બેગમાં અગાઉથી અઢી કિલો સોનુ હતું. ત્યારબાદ વડોદરાનો દુકાનદાર ભાવિક સોની મુંબઇના વેપારીને જમવાના બહાને લઇ ગયો હતો. અંબિકા જ્વેલર્સની દુકાનમાં મુંબઇના વેપારી સાથે આવેલો તેનો માણસ પાંચ કિલો સોનુ ભરેલી બેગ સાથે બેઠો હતો. થોડાસમય પછી આ માણસ વોશરૃમ જવા માટે દુકાનનું શટર નીચું કરીને નજીકમાં ગયો હતો. તે દરમિયાન ભાવિક સોનીનો સાગરીત આવ્યો અને તેણે શટર ઉંચુ કરી દુકાનમાંથી પાંચ કિલો સોનુ ભરેલી બેગ કાઢીને ફરાર થઇ ગયો હતો.આ સાગરીતે બહાર નીકળીને ભાવિક સોનીને જાણ કરતા મુંબઇના વેપારીને લઇને જમવા માટે ગયેલો ભાવિક સોની પણ બહાનું કાઢીને ત્યાંથી નીકળી ગયો હતો. આ અંગે બાપોદ પોલીસને જાણ કરવામાં આવતા પોલીસે પાંચ કિલો સોનુ લઇને ભાગી જનાર આરોપી અને તેના સાગરીતની શોધખોળ હાથ ધરી છે.