વડોદરા શહેરમાં અનેક વિસ્તારોમાં ગણેશ પંડાલો યથાવત રહેતા ટ્રાફિકની સમસ્યા

Vadodara Traffic Problem : વડોદરા શહેરમાં ગણેશોત્સવ પૂર્ણ થયાને 6 દિવસ વીતી ગયા હોવા છતાં શહેરના કેટલાક મુખ્ય માર્ગો પર ગણેશ પંડાલો અને તંબુઓ હજુ યથાવત જોવા મળી રહ્યા છે. કેટલાક સ્થળોએ રસ્તા પર પંડાલમાં ઉપયોગમાં લેવાયેલી ટ્રોલીઓ સહિતનો સામાન પણ પડેલો હોવાથી વાહનચાલકોને મુશ્કેલીનો સામનો કરવો પડી રહ્યો છે.
ગધેડા માર્કેટ ચાર રસ્તા પાસે ગણેશોત્સવ દરમિયાન શણગારના સામાન અને શ્રીજીની પ્રતિમાઓના વેચાણ માટે રસ્તા પર બાંધવામાં આવેલા તંબુઓ હજુ સુધી દૂર કરવામાં આવ્યા નથી. ગણેશ પ્રતિમાના વિસર્જન બાદ પણ જાહેર માર્ગ પરથી પંડાલ અને અન્ય સામગ્રી હટાવવામાં નહીં આવતા રસ્તાની જગ્યા રોકાઈ રહી છે.
મુખ્ય માર્ગ પર તંબુ અને ટ્રોલીઓ પડેલી હોવાથી વાહનચાલકોને અવરજવર કરવામાં મુશ્કેલી પડી રહી છે. કેટલાક સ્થળોએ વાહનોને સાંકડી જગ્યામાંથી પસાર થવાની ફરજ પડી રહી છે, જેના કારણે અકસ્માતનો ભય પણ રહે છે.
ગણેશોત્સવ દરમિયાન જાહેર માર્ગો પર પંડાલ અને તંબુ ઊભા કરવાની મંજૂરી આપવામાં આવી હોય તો ઉત્સવ પૂર્ણ થયા બાદ તેને સમયસર દૂર કરવાની જવાબદારી પણ સંબંધિત આયોજકોની હોવી જોઈએ. શહેરના અન્ય વિસ્તારોમાં પણ આવી સ્થિતિ જોવા મળતી હોવાની ફરિયાદો વચ્ચે તંત્ર દ્વારા મુખ્ય માર્ગો પર તપાસ કરી રસ્તા પરથી પંડાલ, તંબુ અને ટ્રોલીઓ સહિતનો સામાન તાત્કાલિક દૂર કરાવવામાં આવે તેવી લોકમાગ ઉઠી છે.