આજે દોઢ હજારથી વધુ ગણેશજીની મૂર્તિઓની આગમન યાત્રા નીકળશે

આવતીકાલથી શરૃ થતા ગણેશોત્સવને અનુલક્ષીને શહેર પોલીસ દ્વારા ચુસ્ત બંદોબસ્ત તૈનાત કરવામાં આવ્યો છે. અત્યારસુધી અંદાજે ૧ હજાર જેટલની આગમન યાત્રોઓ નીકળી છે. આવતીકાલે દોઢ હજારથી વધારે યાત્રાઓ નીકળશે, જેને ધ્યાને રાખી પોલીસ દ્વારા અલગ - અલગ ટીમ બનાવવામાં આવી છે.
શહેરનુંં આતિથ્ય માણવા આવનાર ગણેશજીના તહેવારમાં શાંતિ અને સુરક્ષા જળવાઇ રહે તે માટે પોલીસ દ્વારા દોઢ મહિના અગાઉથી જ આયોજકો સાથે મિટિંગ કરવામાં આવી હતી.તદુપરાંત કોર્પોરેશન, વીજ કંપની તથા અન્ય એજન્સીઓ સાથે સુરક્ષા અને સલામતી અંગે ચર્ચાઓ થઇ હતી. છેલ્લા એક મહિનાથી શહેરમાં શરૃ થયેલી આગમન યાત્રાઓની સંખ્યા ૧ હજારથી વધારે છે. જ્યારે આવતીકાલે સ્થાપના દિવસે દોઢ હજારથી વધુ મૂર્તિઓની આગમન યાત્રા નીકળશે. આ સંખ્યા માત્ર નોંધાયેલા મંડળોના ગણેશજીની છે. જ્યારે હજારોની સંખ્યામાં મૂર્તિઓની સ્થાપના થશે. ફાયર અને ઇલેક્ટ્રિસિટી સેફ્ટીની પણ તાકીદ આયોજકોને કરવામાં આવી છે. પોલીસ કમિશનર નરસિમ્હા કોમારે જણાવ્યું છે કે, આ સમગ્ર તહેવાર દરમિયાન ૮ ડીસીપી, ૧૧ એસીપી, ૨૦૦ પી.આઇ. અને પી.એસ.આઇ., અઢી હજારથી વધુ પોલીસ સ્ટાફ, એસ.આર.પી.ની પાંચ કંપની, દોઢ હજારથી વધુ હોમગાર્ડના જવાનો તથા ૮૦૦ થી વધુ ટ્રાફિક બ્રિગેડના જવાનો તૈનાત રહેશે. સમગ્ર બંદોસ્તનુ નીરિક્ષણ જોઇન્ટ પોલીસ કમિશનર દ્વારા કરવામાં આવશે.