સાવલી ખાતેની બે કંપનીઓ સામે ક્લોઝર કાર્યવાહી કરાઈ

સાવલી તાલુકાના જૂના સમલાયા ગામ ખાતે મિનિ નદીમાં કેમિકલયુક્ત પાણી છોડવાના મામલે ગુજરાત પ્રદૂષણ નિયંત્રણ બોર્ડે બે કંપની સામે ક્લોઝર કાર્યવાહી હાથ ધરી છે. મિરેકલ સાયન્સ એન્ડ ટેકનોલોજી અને કપિલા હેચરીઝને બંધ કરવાના નિર્દેશો આપ્યા છે, જ્યારે અન્ય એક કંપની જિયો ક્લીનરને કારણદર્શક નોટિસ ફટકારી છે.

જીપીસીબીની ટીમે પ્રાદેશિક અધિકારી માર્ગી પટેલના માર્ગદર્શન હેઠળ ૭જુલાઈ દરમિયાન મિનિ નદીની ઘટનાને લઈ મિરેકલ સાયન્સનું નિરીક્ષણ કર્યું હતું. તપાસમાં કંપનીમાંથી નીકળતી આરસીસી પાઇપમાં ભૂરા રંગનું પાણી વહેતું હોવાનું સામે આવ્યું હતું, જેનો રિપોર્ટ જીપીસીબી ખાતેથી તાજેતરમાં મળ્યો છે.  રિપોર્ટના આધારે કંપનીને બંધ કરવાનો આદેશ અપાયો છે.

બીજી તરફ, કપિલા હેચરી સામે પણ જીપીસીબીએ ક્લોઝરની કાર્યવાહી કરી છે. ગ્રીન કેટેગરીમાં આવતી આ કંપની જરૃરી સંમતિ મેળવ્યા વિના જ કાર્યરત હોવાનું તપાસમાં સામે આવ્યું છે. આ ઉપરાંત, જિયો ક્લીનર નામની અન્ય એક કંપનીને પણ બોર્ડ દ્વારા કારણદર્શક નોટિસ ફટકારાઈ છે.