નિઝામપુરામાં ભળતો વાંદરો પકડાયો હતો,દસથી વધુને બચકાં ભરનાર વાંદરે વનકર્મી સહિત ત્રણ પર હુમલો કરતાં પાંજરે પુરાયો

નિઝામપુરા વિસ્તારમાં છેલ્લા કેટલાક દિવસોથી લોકો પર હુમલા કરનાર વાંદરે આજે વન કર્મી સહિત વધુ ત્રણ જણા પર હુમલો કરતાં ભારે જહેમત બાદ તેને કેદ કરવામાં આવ્યો હતો.
નિઝામપુરા ગાર્ડન,રામનગર સોસાયટી અને આસપાસના વિસ્તારોમાં છેલ્લા કેટલાક દિવસોથી આવતા જતા લોકો અને મકાનના પ્રાંગણમાં લોકો પર હુમલો કરી લોહીલુહાણ કરનાર વાંદરને ગઇકાલે વનવિભાગની ટીમે પાંજરે પૂર્યો હતો.જો કે આજે સવારે ફરીથી વાંદરે બે જણા પર હુમલો કરતાં ગઇકાલે ભળતો વાંદરો પકડાઇ ગયો હોવાનું જણાઇ આવ્યું હતું.
આજે વનવિભાગ અને જીવદયા કાર્યકરોની ટીમે ફરીથી વાંદરને પકડવા પ્રયાસ કર્યો હતો.જે દરમિયાન વાંદરે એક વનકર્મી પર હુમલો કરતાં તેને પગે ટાંકા લેવા પડયા હતા.ભારે જહેમત બાદ આખરે તોફાની વાંદરને પાંજરે પુરવામાં સફળતા મળતાં તેને ફોરેસ્ટ વિભાગની ઓફિસે લઇ જવાયો છે.