સોફ્ટવેર અપડેટ કરવાના મેસેજ પર ક્લિક કરતા જ 75 હજાર રૂપિયા ટ્રાન્સફર : મોબાઈલ હેક કરી સાયબર ગઠિયાએ ચૂનો લગાવ્યો

Vadodara Fraud Case : વડોદરાના ન્યુ વી.આઇ.પી. રોડ પર આવેલી દેવરાજ સોસાયટીમાં રહેતા મહેશભાઈ બાબુભાઈ ચૌધરી છેલ્લા 15 વર્ષથી છાણી સિતારામ સુપર માર્કેટ ખાતે 'રૂચી એન્ટરપ્રાઇઝ' નામે DTDC કુરિયરની એજન્સી ચલાવીને પરિવારનું ગુજરાન ચલાવે છે. વારસિયા પોલીસ સ્ટેશનમાં તેમને ફરિયાદ નોંધાવી જણાવ્યું છે કે, ગઈ તારીખ 03/10/2026ના રોજ બપોરે આશરે બે વાગ્યે હું મારા ઘરે હાજર હતો, ત્યારે મારા મોબાઈલ સ્ક્રીન પર 'Software Update'ની નોટિફિકેશન આવી હતી. મેં તેના પર કલિક કરતાં જ મારો ફોન ઓટો-અપડેટ થવા લાગ્યો અને થોડી જ વારમાં મારો મોબાઈલ હેક થઈ ગયો. ફોનની સ્ક્રીન પર કંઈ દેખાતું ન હોવાથી, મેં તરત જ સિમકાર્ડ કાઢીને બીજા ફોનમાં નાખ્યું.
સિમકાર્ડ બીજા ફોનમાં મૂકતા મારા કોટક મહિન્દ્રા બેંકના એકાઉન્ટમાંથી રૂ.75,000 કપાત થયાનો ટેક્સ્ટ મેસેજ આવ્યો હતો. મેં એવું કોઈ જ ટ્રાન્ઝેક્શન કર્યું નહતું.