સ્કૂલોના 50 ટકા વિદ્યાર્થીઓને રોડ સેફટીની મૂળભૂત જાણકારી પણ નથી

વડોદરા શહેરની સ્કૂલોમાં અભ્યાસ કરતા અને ખાસ કરીને ધો.૧૧ અને ૧૨ના હજારો વિદ્યાર્થીઓ સ્કૂલે જવા માટે ટુ વ્હીલરનો ઉપયોગ કરે છે. શહેરની સ્કૂલોમાં ભણતા વિદ્યાર્થીઓમાં રોડ સેફટી અંગે જાગૃતિ લાવવા માટે ગુજરાત રોડ સેફટી ઓથોરિટી દ્વારા એશિયન રોડ સેફટી એકેડમી નામની એનજીઓની મદદથી અભિયાન શરુ કરવામાં આવ્યું છે.
આ અભિયાનના કો ઓર્ડિનેટર અને પૂર્વ આચાર્ય ડો.ઘનશ્યામ ચાવડાએ એક વાતચીતમાં કહ્યું હતું કે, અવેરનેસ કેમ્પેનમાં પ્રાથમિક, માધ્યમિક અને ઉચ્ચતર માધ્યમિક એમ ત્રણે વિભાગ માટે અલગ અલગ પ્રકારના પ્રશ્નોત્તરી સાથેના પ્રેઝન્ટેશન તૈયાર કરવામાં આવ્યા છે.જેમાં પહેલા વિદ્યાર્થીઓને રોડ સેફટી અંગેના કેટલાક મૂળભૂત સવાલો પૂછવામાં આવે છે અને તેમને કેટલી જાણકારી છે તે ચકાસવામાં આવે છે.એ પછી તેમને કયા નિયમોનું પાલન કરવું જોઈએ અને શું ધ્યાન રાખવું જોઈએ તેની સમજ આપવામાં આવે છે.
ડો.ચાવડાના જણાવ્યા અનુસાર આ માટે ૧૦ શિક્ષકોને કી રિસોર્સ પર્સન તરીકે તૈયાર કરાયા છે.જેઓ વિવિધ સ્કૂલોમાં જઈને અડધો કલાકનું પ્રેઝન્ટેશન કરે છે.અત્યાર સુધીમાં ૧૦ સ્કૂલોમાં અવેરનેસ કેમ્પેન યોજાયું છે અને તેમાં જોવા મળ્યું છે કે, ૫૦ ટકા વિદ્યાર્થીઓને રોડ સેફટીના મૂળભૂત નિયમોની પણ જાણકારી નથી.આ બાબતને જોતા રોડ સેફટીનો પ્રચાર પ્રસાર બહુ જરુરી બની જાય છે.ફેબુ્રઆરી મહિના સુધીમાં શહેરની ૨૦૦ જેટલી સ્કૂલોમાં અભિયાનને પહોંચાડવાનું લક્ષ્ય છે.