VIDEO| અમરેલી: રાજુલાના ચોત્રા ગામની રાયડી નદીમાં ઘોડાપૂર, 15થી 20 બકરાઓ તણાયા, પશુપાલકનો બચાવ
Summarized by AI; it may make mistakes. Check important info
Summarized by AI; it may make mistakes. Check important info
Many Goat Swept Away In Rajula River Flood: અમરેલીના મોટાભાગના તાલુકામાં હળવાથી ભારે વરસાદ ખાબક્યો છે. ધોધમાર વરસાદ થતાં રાજુલાના ચોત્રા ગામે રાયડી નદીમાં ઘોડાપૂર આવતા બંને કાંઠે વહેતી થઈ હતી. નદીમાં પાણીના જોરદાર પ્રવાહમાં 15થી 20 જેટલાં બકરાઓ ફસાતાં પૂરમાં તણાયા હોવાના દ્રશ્યો સામે આવ્યા છે. તેવામાં પશુ માલિક બકરાને બચાવવા જતાં નદીમાં તણાયા હતા. જો કે, ગ્રામજનોએ પશુપાલકને હેમખેમ રીતે બચાવી નદીમાંથી બહાર કાઢ્યા હતા.
રાજુલાના ચોત્રા ગામની રાયડી નદીમાં ઘોડાપૂરમાં 15થી 20 બકરાઓ તણાયા
રાજુલાના ગ્રામ્ય પંથક ધોધમાર વરસાદને પગલે નદી-નાળા છલકાયા છે. આ દરમિયાન એક ચોંકાવનારી ઘટના સામે આવી છે. જેમાં રાજુલાના ચોત્રા ગામે રાયડી નદીમાં ઘોડાપૂરને પગલે ગામના પશુપાલક ધકડાભાઈના બકરાઓ પાણીમાં તણાયા હતા. જેને લઈને બકરાને બચાવવા નદીમાં પડેલા પશુપાલક પણ પાણીના પ્રવાહમાં તણાઈ ગયા હતા.
જો કે, નદીમાં 200 મીટર દૂરથી ગ્રામજનોએ પશુપાલકને બચાવી લીધા હતા. રાજુલામાં પ્રથમ વરસાદમાં જ રાયડી નદીમાં ઘોડાપૂર આવતા ગામલોકો નદીએ ઉમટ્યા હતા.
અમરેલીના મોટાભાગના વિસ્તારોમાં જોરદાર વરસાદ
રાજ્યમાં સૌરાષ્ટ્ર અને દક્ષિણ ગુજરાત સહિતના વિસ્તારોમાં ભારેથી અતિભારે વરસાદ વરસી રહ્યો છે. બુધવારે(1 જુલાઈ) રાજ્યના 70 તાલુકાથી વધુ સ્થળોએ વરસાદી માહોલ છે. મેઘરાજાએ દક્ષિણ ગુજરાતમાં ધડબડાટી બોલાવવાની સાથે સૌરાષ્ટ્રમાં મેઘમહેર જોવા મળી રહી છે. જેમાં અમરેલીના રાજુલા, જાફરાબાદ, ખાંભા, લાઠી, ધારી સહિત ગ્રામ્ય વિસ્તારોમાં કડાકા-ભડાકા સાથે વરસાદ ખાબક્યો છે. ધોધમાર વરસાદને લઈને જાફરાબાદમાં ભાડીયો નદી બંને કાંઠે વહેતી થઈ છે. આમ, જિલ્લામાં સારો એવો વરસાદ થતાં ખેડૂતોમાં હરખ છવાયો છે.
