રોડ ટેક્સ આપીને મોત ખરીદતી અમદાવાદની જનતા! 5 વર્ષમાં 6 હજાર અકસ્માતમાં 1600થી વધુ મોત; AMC-પોલીસના પેટનું પાણી પણ નથી હલતું!

Ahmedabad Road Accidents : અમદાવાદ ટ્રાફિક પોલીસના વર્ષ 2021થી જુલાઈ 2026 સુધીના સત્તાવાર રૅકોર્ડ અનુસાર, ગુજરાતના વાણિજ્યિક પાટનગર ગણાતા અમદાવાદ શહેરમાં માર્ગ અકસ્માતોની સ્થિતિ અત્યંત વિસ્ફોટક અને ચિંતાજનક સ્તરે પહોંચી ગઈ છે. આ સાડા પાંચ વર્ષના સમયગાળામાં શહેરમાં 6,000થી વધુ ગંભીર માર્ગ અકસ્માતો સર્જાયા છે, જેમાં કુલ 1,634 નાગરિકોએ પોતાના જીવ ગુમાવ્યા છે. જ્યારે 3,100 થી વધુ લોકો ગંભીર રીતે ઈજાગ્રસ્ત થઈને દિવ્યાંગતા કે લાંબી શારીરિક પીડાનો ભોગ બન્યા છે. પબ્લિક ટ્રાન્સપોર્ટ, કોમર્શિયલ હેવી વાહનો અને ખાનગી વાહનોના ડેટા દર્શાવે છે કે એસ.જી. હાઇવે, સિંધુભવન રોડ અને એસ.પી. રિંગ રોડ જેવા હાઇ-સ્પીડ કોરિડોર શહેરના સૌથી ખતરનાક અને જોખમી કોલિઝન ઝોન તરીકે ઉભરી આવ્યા છે, જ્યાં બેફામ વાહન ચલાવવાના કારણે સતત જીવલેણ અકસ્માતો થઈ રહ્યા છે.

સરકારી બસો પણ બની યમરાજાનું વાહન

શહેરમાં દોડતી સરકારી અને મ્યુનિસિપલ બસો પણ અકસ્માતોના કાળા આંકડામાં મોટો ભાગ ભજવી રહી છે. અમદાવાદ મ્યુનિસિપલ ટ્રાન્સપોર્ટ સર્વિસ (AMTS), બસ રેપિડ ટ્રાન્ઝિટ સિસ્ટમ (BRTS) અને ગુજરાત રાજ્ય માર્ગ વાહનવહાર નિગમ(GSRTC)ની બસો આ સમયગાળા દરમિયાન કુલ 362 અકસ્માતોમાં સંડોવાયેલી હતી, જેમાં 138 લોકોના મોત થયા હતા. જેમાં એકલા AMTS બસો દ્વારા 185 અકસ્માતો સર્જાયા હતા જેમાં 62 લોકોના મોત થયા હતા, અને વર્ષ 2023માં એક જ વર્ષમાં 17 મોત સાથે આ આંકડો ટોચ પર પહોંચ્યો હતો. બીજી તરફ, અલગથી સુરક્ષિત માનવામાં આવતા BRTS કોરિડોરમાં પણ 84 અકસ્માતોમાં 37 લોકોના મોત થયા છે. જ્યારે મ્યુનિસિપલ મર્યાદામાંથી પસાર થતી GSRTCની બસોથી 39 લોકોએ જીવ ગુમાવ્યા છે. મોટાભાગની મ્યુનિસિપલ બસો ખાનગી કોન્ટ્રાક્ટરો દ્વારા સંચાલિત થાય છે, જ્યાં ડ્રાઇવરો પર ફિક્સ્ડ ટ્રિપ અને કડક સમયપત્રક પૂરું કરવાનું માનસિક દબાણ રહેતું હોવાના કારણે સ્પીડ વાયલેશન અને સિગ્નલ કૂદવાના બનાવો બને છે અને ઓપરેટરો સામે લઘુત્તમ દાવાઓ સિવાય કોઈ કડક જવાબદારી નક્કી થતી નથી.

ડમ્પરની એન્ટ્રી થતાં જ મોતનો તાંડવ શરૂ

શહેરમાં ઝડપી રિયલ એસ્ટેટ વિસ્તરણ અને માલસામાનની હેરફેરને કારણે ભારે વાહનોનો ત્રાસ પણ ચિંતાજનક રીતે વધ્યો છે. ડમ્પર, ફ્રેટ ટ્રક અને રેડી-મિક્સ કોંક્રીટ (RMC) મિક્સર જેવા ભારે વાહનો દ્વારા 2021થી જુલાઈ 2026 વચ્ચે 521 અકસ્માતો સર્જાયા હતા, જેના કારણે 270 લોકોનાં કરુણ મોત થયા હતા અને 182 લોકો કાયમ માટે અપંગ કે ગંભીર રીતે ઘાયલ થયા હતા. દિવસના વ્યસ્ત સમયગાળામાં 'નો-એન્ટ્રી'ના આદેશો હોવા છતાં, ભારે ડમ્પર અને ટ્રકો રાત્રે 11 વાગ્યા પછી ધમધમતા રસ્તાઓ પર પૂરઝડપે દોડે છે. ડ્રાઇવરો વધારાની ટિપ અને કમિશન મેળવવા માટે ફિઝિકલ સ્પીડ ગવર્નર સાથે ચેડા કરે છે, અને નાઇટ શિફ્ટ દરમિયાન પૂરતી ઊંઘ ન મળવાને કારણે વહેલી સવારે માઇક્રો-સ્લીપના કારણે ભયાનક અકસ્માતો સર્જાય છે.

ખાનગી ગાડીઓએ પણ સેંકડો લોકોને મરણના ખાટલે પહોંચાડ્યા

સમગ્ર અકસ્માત અને મૃત્યુઆંકમાં ખાનગી વાહનો સૌથી મોટો હિસ્સો ધરાવે છે, જેમાં 2021થી અત્યાર સુધીમાં 5,145 અકસ્માતોમાં 1,226 લોકોના મોત નોંધાયા છે. માત્ર 2026ના પ્રથમ સાત મહિનામાં જ 560 અકસ્માતોમાં 118 લોકોએ જીવ ગુમાવ્યા છે. કાર ચાલકોની સરખામણીમાં ટુ-વ્હીલર ચાલકોને સૌથી વધુ મોતના મુખમાં ધકેલાવું પડ્યું છે, જ્યાં 2,236 અકસ્માતોમાં 665 લોકોના મોત થયા છે જ્યારે કારના 2,909 અકસ્માતોમાં 561 મોત નોંધાયા છે. ટ્રાફિક સત્તાવાળાઓના મતે હેલ્મેટના નિયમોનું યોગ્ય પાલન ન કરવું એ માથામાં થતી ઘાતક ઈજાઓનું મુખ્ય કારણ છે. વ્યાપક રસ્તાઓ પર કાર અને મોટરસાઇકલ વચ્ચેની સ્પીડ અસમાનતા અને અચાનક લેન બદલવાની આદતો અકસ્માતોની ગંભીરતાને વધુ વધારે છે.