બોડકદેવના વેપારી સાથે ઓનલાઈન ફ્રોડ: યુટ્યુબમાં જાહેરાત જોઇને ગણતરીના કલાકમાં ઉપડી ગયા 10,23,782 રૂપિયા

YouTube Credit Card Ad Fraud Ahmedabad : અમદાવાદ શહેરના પોશ વિસ્તાર ગણાતા બોડકદેવમાં રહેતા અને થલતેજ ખાતે એક્સપોર્ટનો વ્યવસાય સંભાળતા 54 વર્ષીય વેપારી સાથે સાયબર ઠગાઈની એક ગંભીર ઘટના પ્રકાશમાં આવી છે. સોશિયલ મીડિયા પર દેખાતી લોભામણી જાહેરાતો કેવી રીતે જોખમી સાબિત થઈ શકે છે તેનું આ તાજું ઉદાહરણ છે. Youtube પર HSBC બેંકના ક્રેડિટ કાર્ડની એક આકર્ષક જાહેરાત જોઈને તેના પર ક્લિક કરવું વેપારીને ભારે પડી ગયું છે. સાયબર ઠગોએ બેંક અધિકારી તરીકેની ખોટી ઓળખ આપીને વોટ્સએપ વિડીયો કોલના માધ્યમથી ક્રેડિટ કાર્ડની ખાનગી માહિતી મેળવી લીધી અને ગણતરીના કલાકોમાં જ ખાતામાંથી 10,23,782 રૂપિયા સેરવી લીધા. આ મામલે પીડિત વેપારીએ સાયબર ક્રાઈમ પોલીસ સ્ટેશનમાં સત્તાવાર ફરિયાદ નોંધાવી છે.

કેવી રીતે આચરાયો ઠગાઈનો આખો ખેલ?

પ્રાપ્ત વિગતો અનુસાર, આ સાયબર ફ્રોડનો ભોગ બનનાર જીગ્નેશભાઈ જસભાઈ પટેલ છેલ્લા 2 વર્ષથી અમેરિકન એક્સપ્રેસ (AMEX) નું પ્રીમિયમ ક્રેડિટ કાર્ડ નિયમિતપણે વાપરી રહ્યા છે. ગત 4 સપ્ટેમ્બરે સવારના સુમારે જ્યારે તેઓ Youtube પર વિડીયો જોઈ રહ્યા હતા, ત્યારે સ્ક્રીન પર HSBC બેંકના ક્રેડિટ કાર્ડની એક જાહેરાત આવી હતી. આ એડ પર ક્લિક કર્યાની થોડીવારમાં જ તેમને એક અજાણ્યા નંબર પરથી ફોન આવ્યો હતો. ફોન કરનાર શખ્સે પોતે HSBC બેંકના ક્રેડિટ કાર્ડ ડિપાર્ટમેન્ટમાંથી બોલતો હોવાની ખોટી ઓળખ આપી હતી અને જણાવ્યું હતું કે AMEX કાર્ડ ધારકો માટે તેમની બેંક દ્વારા વિશેષ પ્રીમિયમ ક્રેડિટ કાર્ડની ઓફર પ્રદાન કરવામાં આવી રહી છે.

વિડીયો કોલ દરમિયાન પાસવર્ડ બદલીને લાખો રૂપિયા ઉડાડ્યા

આ પ્રીમિયમ કાર્ડ મેળવવાની પ્રોસેસ પૂર્ણ કરવાના બહાને ઠગે જીગ્નેશભાઈને વોટ્સએપ વિડીયો કોલ કરવા માટે પ્રેરિત કર્યા હતા. વિડીયો કોલ ચાલુ હતો દરમિયાન ઠગની સૂચના મુજબ જીગ્નેશભાઈએ પોતાનું અમેરિકન એક્સપ્રેસ ક્રેડિટ કાર્ડ આગળ અને પાછળથી કેમેરામાં બતાવ્યું હતું. ચાલાક ઠગે આ કોલ દરમિયાન જ કાર્ડની તમામ ગુપ્ત વિગતો નોંધી લીધી હતી અને ગણતરીની મિનિટોમાં જ ક્રેડિટ કાર્ડનો પાસવર્ડ બદલી નાખીને કાર્ડનું સંપૂર્ણ એક્સેસ પોતાના નિયંત્રણમાં લઈ લીધું હતું. એ જ દિવસે રાત સુધીમાં ઠગોએ ક્રેડિટ કાર્ડમાંથી અલગ-અલગ ઓનલાઈન ટ્રાન્ઝેક્શન કરીને કુલ 10,23,782 રૂપિયા ઉપાડી લીધા હતા. રાત્રે 8 વાગ્યે AMEX કંપની તરફથી શંકાસ્પદ વ્યવહાર અંગે ફોન આવતા અને ઈમેલ ચેક કરતા સમગ્ર કૌભાંડનો પર્દાફાશ થયો હતો.

સાયબર ક્રાઈમ હેલ્પલાઈન પર નોંધાવી પોલીસ ફરિયાદ

પોતાની સાથે થયેલી આ મોટી છેતરપિંડીની જાણ થતાં જ જીગ્નેશભાઈએ ત્વરિત જાગૃતિ દાખવીને સાયબર ક્રાઈમ હેલ્પલાઈન 1930 પર સંપર્ક કર્યો હતો અને આ મામલે સાયબર ક્રાઈમ પોલીસ સ્ટેશનમાં કાયદેસરની ફરિયાદ નોંધાવી છે. સાયબર ક્રાઈમ પોલીસે આઈટી એક્ટની વિવિધ કલમો હેઠળ ગુનો નોંધીને Youtube પર આ ફ્રોડ એડ ચલાવનાર તેમજ બેંક કર્મચારી તરીકે ફોન કરનાર ભેજાબાજોની શોધખોળ શરૂ કરી દીધી છે. પોલીસ દ્વારા બેંક ખાતાઓની વિગતો અને આઈપી એડ્રેસના આધારે ટેક્નિકલ તપાસ સઘન બનાવવામાં આવી છે.