અમદાવાદ: દરિયાપુરમાં મનપસંદ જીમખાનાના અનધિકૃત ભાગો સીલ, પરવાનગી વગર બિન-રહેણાંક પ્રવૃત્તિઓ સામે AMCની લાલ આંખ

AMC Seals Mansapand Gymkhana Property: અમદાવાદ મ્યુનિસિપલ કોર્પોરેશન (AMC)ના એસ્ટેટ અને શહેરી વિકાસ વિભાગ દ્વારા દરિયાપુર વિસ્તારમાં આવેલી 'મનપસંદ જીમખાના'ના અનધિકૃત ભાગોને સીલ કરવાની કાર્યવાહી કરવામાં આવી છે. રહેણાંક હેતુ માટે મંજૂર કરાયેલા પરિસરના ભાગોનો પરવાનગી વિના બિન-રહેણાંક હેતુઓ માટે ઉપયોગ થઈ રહ્યો હોવાનું સામે આવતાં તંત્રે આ પગલું ભર્યું છે.

મંજૂર પ્લાન વિરુદ્ધ બિન-રહેણાંક ઉપયોગ

AMCના સેન્ટ્રલ ઝોન વિભાગના જણાવ્યાનુસાર, આ મિલકત દરિયાપુરમાં જોર્ડન રોડ પર મોટા વાઘજીપુરા નાકા પાસે વોર્ડ 21 હેઠળ આવેલી છે. આ મિલકતને પાંચમી સપ્ટેમ્બર, 1962ના રોજ મંજૂરી મળેલી હતી. મંજૂર થયેલા મૂળ પ્લાન મુજબ માત્ર ગ્રાઉન્ડ ફ્લોરને વાણિજ્યિક (કોમર્શિયલ) ઉપયોગ માટે, જ્યારે પ્રથમ, બીજા અને ત્રીજા માળના ભાગને રહેણાંક હેતુ માટે માન્યતા અપાઈ હતી. જોકે, તપાસ દરમિયાન સામે આવ્યું હતું કે ગ્રાઉન્ડ ફ્લોર ઉપરાંત અન્ય માળનો પણ પરવાનગી વગર બિન-રહેણાંક પ્રવૃત્તિઓ માટે દુરુપયોગ કરવામાં આવી રહ્યો હતો.

સીલ તોડનાર સામે પોલીસ કાર્યવાહીની ચેતવણી

અનધિકૃત બાંધકામ અને પરિસરના ગેરકાયદે ઉપયોગ સામે મધ્ય ઝોનના નાયબ નગર વિકાસ અધિકારી દ્વારા સીલિંગનો આદેશ જારી કરવામાં આવ્યો હતો. તંત્રે મિલકતમાલિકો, કબજેદારો અને વપરાશકર્તાઓને પરિસરનો ઉપયોગ તાત્કાલિક બંધ કરવા તેમજ સીલ કરેલા વિસ્તારોમાં પ્રવેશ ન કરવા નિર્દેશ આપ્યો છે.

AMC એ સ્પષ્ટ ચેતવણી આપી છે કે જો સીલ તોડીને અનધિકૃત ઉપયોગ ચાલુ રાખવામાં આવશે તો જવાબદાર વ્યક્તિઓ સામે કાયદાકીય જોગવાઈઓ હેઠળ પોલીસ કાર્યવાહી હાથ ધરવામાં આવશે.