અમદાવાદ: વસ્ત્રાલમાં SP રિંગ રોડ પર અદાણી સર્કલ નજીક મોટો ભૂવો પડ્યો, ટ્રાફિક ડાયવર્ટ કરાયો

Large pothole SP Ring Road Ahmedabad: અમદાવાદના રામોલ અને વસ્ત્રાલને જોડતા 200 ફૂટ સરદાર પટેલ (SP) રિંગ રોડ પર અદાણી સર્કલ નજીક એક મોટો ભૂવો પડતાં વાહનચાલકો મુશ્કેલીમાં મુકાયા હતી. આ મુખ્ય માર્ગ પર અચાનક ભૂવો પડી જતાં માર્ગ સુરક્ષા સામે સવાલો ઊભા થયા છે તેમજ વાહન વ્યવહાર ખોરવાતાં ટ્રાફિક જામની સ્થિતિ સર્જાઈ હતી.

અકસ્માત અટકાવવા બેરિકેડિંગ કરાયું

ભૂવો પડવાની ઘટના બાદ સંભવિત અકસ્માતો રોકવા અને વાહનચાલકોની સુરક્ષા માટે તંત્ર દ્વારા તાત્કાલિક ધોરણે ભૂવાની આસપાસ બેરિકેડ્સ ગોઠવી દેવાયા છે. અમદાવાદ અર્બન ડેવલપમેન્ટ ઓથોરિટી (AUDA) અને સ્થાનિક ટ્રાફિક પોલીસ દ્વારા સ્થળ નજીક ટ્રાફિક ડાયવર્ઝન આપવામાં આવ્યું છે, જેથી વાહનોને વૈકલ્પિક રસ્તે વાળવામાં આવી રહ્યા છે.

રામોલ અને વસ્ત્રાલ તરફ જતાં આ માર્ગ પર દિવસભર, ખાસ કરીને સવાર અને સાંજના પીક અવર્સ દરમિયાન વાહનોની ભારે અવરજવર રહે છે. ડાયવર્ઝનના કારણે આ રૂટ પરથી પસાર થતાં દૈનિક મુસાફરો અને વાહનચાલકોની હાલાકીમાં વધારો થયો છે.

તંત્રની કામગીરી સામે સ્થાનિકોમાં રોષ

છેલ્લા કેટલાક સમયથી અમદાવાદના વિવિધ વિસ્તારોમાં ભૂવા પડવાની ઘટનાઓ સામે આવી રહી છે. SP રિંગ રોડ જેવા વ્યસ્ત માર્ગ પર વધુ એક મોટો ભૂવો પડતાં સ્થાનિકો દ્વારા ઔડા અને સ્થાનિક તંત્રની રસ્તાની જાળવણી તેમ જ કામગીરીની ગુણવત્તા સામે સવાલો ઉઠાવવામાં આવી રહ્યા છે.