| Image : 'X' |
West Indies Championship: વેસ્ટઇન્ડીઝમાં ઘરેલુ ફર્સ્ટ-ક્લાસ મેચને રમત માટે 'ખતરનાક' ગણાવ્યા બાદ રદ કરવામાં આવી હતી. સર વિવ રિચાર્ડ્સ સ્ટેડિયમ ખાતે લીવર્ડ આઇલેન્ડ્સ અને ત્રિનિદાદ અને ટોબેગો વચ્ચે મેચ રમાઈ રહી હતી. રમતનું વર્તન અણધારી અને અસમાન બની જતાં મેચના ત્રીજા દિવસે રમત અટકાવવી પડી હતી. ખેલાડીઓની સલામતી અંગે ગંભીર ચિંતાઓ ઉભી થઈ હતી. જેમાં દડો વાગતા ખેલાડી મેદાનમાં ઢળી પડ્યો હતો. આ પછી તાત્કાલિક મેચ રદ કરાઈ હતી.
દડો વાગતા ખેલાડી મેદાનમાં ઢળી પડ્યો
જ્યારે લીવર્ડ આઇલેન્ડ્સના બેટર જેરેમિયા લુઇસ ક્રીઝ પર હતા, ત્યારે ત્રિનિદાદના ફાસ્ટ બોલર જેડેન સીલ્સનો એક બોલ અચાનક જોરથી ઉછળીને લુઇસના હેલ્મેટ પર વાગ્યો હતો. ફટકો લાગતા જ લુઇસ જમીન પર પડી ગયો અને તેનું હેલ્મેટ પણ ઉતરી ગયું હતું. ગુસ્સા અને હતાશાના માહોલમાં લુઇસે તેના હેલ્મેટને લાત મારી અને મેદાન છોડી દીધું. તેને તાત્કાલિક હોસ્પિટલમાં લઈ જવામાં આવ્યો, જ્યાં તેની હાલત હવે સ્થિર હોવાનું જાણવા મળ્યું છે.
જેડેને 34 રનમાં 7 વિકેટ લીધી
વેસ્ટઇન્ડીઝના અનુભવી બોલર જેડેન જબરદસ્ત ફોર્મમાં હતો, તેણે લીવર્ડ આઇલેન્ડ્સની બીજી ઇનિંગમાં બધી સાત વિકેટ લીધી હતી. જેડેને માત્ર 34 રનમાં 7 વિકેટ લીધી હતી. જો કે, પિચ ખતરનાક જાહેર થતાં તે એક ઇનિંગમાં બધી 10 વિકેટ લેવાનો દુર્લભ રેકોર્ડ બનાવી શક્યો ન હતો. મેચ રોકાઈ ત્યારે લીવર્ડ આઇલેન્ડ્સનો સ્કોર 140/7 હતો.
ક્રિકેટ વેસ્ટઇન્ડીઝે શું કહ્યું?
ક્રિકેટ વેસ્ટઇન્ડીઝ(CWI)એ એક સત્તાવાર નિવેદન જારી કરીને પુષ્ટિ કરી છે કે, મેચ 'ડ્રો' જાહેર કરવામાં આવી છે. ક્યુરેટર સાથે પરામર્શ કર્યા પછી અમ્પાયરોએ તારણ કાઢ્યું કે, નિષ્પક્ષ રમતની સ્થિતિ સુનિશ્ચિત કરવા માટે પિચને સુરક્ષિત રીતે રિપેર કરી શકાતી નથી. નિયમો અનુસાર, બંને ટીમોને નિશ્ચિત સમય સુધી મેળવેલા પોઈન્ટ આપવામાં આવશે.
આ પણ વાંચો: ઓછા રન છતાં રાજસ્થાન રોયલ્સનો ચમત્કારિક વિજય, લખનઉને 40 રને હરાવ્યું, આર્ચર રહ્યો ઘાતક
ફાઇનલ માટે સ્ટેડિયમ તૈયાર રહેશે
વેસ્ટઇન્ડીઝ ચેમ્પિયનશિપની ફાઇનલ 17 થી 20 મે દરમિયાન આ જ સર વિવ રિચાર્ડ્સ સ્ટેડિયમ ખાતે યોજાવાની છે. CWIએ ખાતરી આપી છે કે, ફાઇનલ માટે સલામત અને સ્પર્ધાત્મક પિચ તૈયાર કરવા માટે તમામ જરૂરી સંસાધનો અને નિષ્ણાત સહાયનો ઉપયોગ કરવામાં આવશે. ત્યાં સુધી આ સ્ટેડિયમમાં અન્ય કોઈ મેચનું આયોજન કરવામાં આવ્યું નથી.
