IND vs WI : વેસ્ટ ઈન્ડિઝ બીજી ઈનિંગમાં લડાયક બેટિંગ બાદ ઓલઆઉટ, ભારતને 121 રનનું લક્ષ્ય

IND vs WI 2nd test Delhi : નવી દિલ્હીના અરુણ જેટલી સ્ટેડિયમમાં ભારત અને વેસ્ટ ઈન્ડિઝ વચ્ચેની બીજી ટેસ્ટ મેચમાં રોમાંચક અંત આવ્યો છે. ફોલો-ઓન (Follow-On) મળવા છતાં વેસ્ટ ઈન્ડિઝની ટીમે બીજી ઈનિંગમાં સખત સંઘર્ષ દર્શાવ્યો હતો, પરંતુ આખરે ટીમ ઈન્ડિયાએ તેમને 390 રનમાં ઓલઆઉટ કરીને મેચ જીતવા માટે માત્ર 121 રનનો ટાર્ગેટ આપ્યો છે.

આ પણ વાંચો: 'તમને ખબર છે એ આઉટ હતો...' દિલ્હી ટેસ્ટમાં DRS ડ્રામા બાદ અમ્પાયર સામે ભડક્યો બુમરાહ

વેસ્ટ ઈન્ડિઝનો લડાયક દેખાવ

ભારતે પ્રથમ દાવમાં 518/5 (ડિકલેર) નો મોટો સ્કોર બનાવ્યો હતો, જેના જવાબમાં વેસ્ટ ઈન્ડિઝ પ્રથમ ઈનિંગમાં માત્ર 248 રનમાં ઓલઆઉટ થઈ ગયું હતું. 270 રનની મોટી લીડ હોવા છતાં, ભારતીય કેપ્ટન શુભમન ગીલે વેસ્ટ ઈન્ડિઝને ફોલો-ઓન આપવાનો નિર્ણય કર્યો હતો.

બીજી ઈનિંગ્સમાં વેસ્ટ ઈન્ડિઝના બેટ્સમેનોએ ગજબ પરફોર્મન્સ કર્યો હતો. ઓપનર જૉન કૅમ્પબેલ (115 રન) અને શાઈ હોપ (103 રન)ની શાનદાર સદીને કારણે વેસ્ટ ઈન્ડિઝ મેચને ચોથા દિવસ સુધી ખેંચી શક્યું. આ ઉપરાંત, છેલ્લી વિકેટ માટે જસ્ટિન ગ્રિવ્સ અને જેડેન સીલ્સ વચ્ચેની 79 રનની ભાગીદારીએ ટીમને સન્માનજનક સ્કોર સુધી પહોંચાડીને ભારત પર 120 રનની નજીવી લીડ મેળવી આપી.

ટીમ ઈન્ડિયાનો બોલિંગ હીરો

ચોથા દિવસની રમતમાં ભારતીય બોલરોએ મહત્ત્વની ભૂમિકા ભજવી હતી. ચાઈનામેન સ્પિનર કુલદીપ યાદવએ તેના સ્પિનની જાળમાં વેસ્ટ ઈન્ડિઝના બેટ્સમેનોને ફસાવીને ટીમને બ્રેકથ્રુ અપાવ્યા હતા. જોકે, વેસ્ટ ઈન્ડિઝની નીચલી ક્રમાંકની જોડીએ ભારતીય બોલરોને થકવી દીધા હતા. આખરે, જસપ્રિત બુમરાહએ અંતિમ વિકેટ ઝડપીને વેસ્ટ ઈન્ડિઝનો બીજો દાવ 390 રનમાં સમેટી લીધો.

હવે ભારતને માત્ર 121 રનનો ટાર્ગેટ

મેચ જીતવા માટે ભારતીય ટીમને માત્ર 121 રનની જરૂર છે. ચોથા દિવસની રમતમાં હજુ લગભગ 18 ઓવર બાકી છે. ભારતીય ટીમ આ નાના લક્ષ્યાંકને ઝડપથી હાંસલ કરીને આ સીરીઝ 2-0 થી જીતવા માટે મજબૂત સ્થિતિમાં છે.

આ પણ વાંચો: માત્ર રોહિત કે વિરાટ નહીં, વનડે વર્લ્ડકપમાં આ 5 ખેલાડીઓ પર લટકતી તલવાર!

મેચનો સારાંશ 

ભારત (પ્રથમ દાવ) 518/5 (ડિકલેર)

વેસ્ટ ઈન્ડિઝ (પ્રથમ દાવ) 248 (ઓલઆઉટ)

વેસ્ટ ઈન્ડિઝ (બીજો દાવ - Follow-On) 390 (ઓલઆઉટ)

ભારતને જીતવા માટે ટાર્ગેટ 121 રન