T20Iમાં પ્લેયર ઓફ ધી મેચ જીતવામાં કોહલી-સૂર્યાથી પણ આગળ નીકળ્યો આ ખેલાડી

Sikandar Raza Player Of The Match Awards: શ્રીલંકા સામેની બીજી T20Iમાં ઝિમ્બાબ્વેના કેપ્ટન સિકંદર રઝાએ પોતાની બેટિંગથી નહીં પણ બોલિંગથી તબાહી મચાવી હતી. તેણે શ્રીલંકા ટીમને માત્ર 80 રનના સ્કોર સુધી મર્યાદિત રાખવામાં મુખ્ય ભૂમિકા ભજવી હતી અને 4 ઓવરના પોતાના ક્વોટામાં માત્ર 11 રન આપીને 3 મહત્ત્વપૂર્ણ વિકેટ લીધી હતી, જેમાં કેપ્ટન ચરીથ અસલંકાની વિકેટનો પણ સમાવેશ થાય છે. ઝિમ્બાબ્વેએ બીજી T20 5 વિકેટથી જીતીને ત્રણ મેચની સીરિઝ 1-1થી બરાબર કરી હતી. સિકંદર રઝા ઝિમ્બાબ્વેની જીતનો હીરો હતો,તેને પ્લેયર ઓફ ધ મેચનો એવોર્ડ મળ્યો હતો. આ એવોર્ડ જીતતાની સાથે જ રઝાએ વિરાટ કોહલી અને સૂર્યકુમાર યાદવને પાછળ છોડી દીધા.

સિકંદર રઝાના કારકિર્દીનો આ 17મો POTM એવોર્ડ

ઝિમ્બાબ્વેના કેપ્ટન સિકંદર રઝાએ હવે T20Iમાં સૌથી વધુ પ્લેયર ઓફ ધ મેચ એવોર્ડ જીતવાના મામલે વિરાટ કોહલી અને સૂર્યકુમાર યાદવ જેવા ખેલાડીઓને પાછળ છોડી દીધા છે. સિકંદર રઝાના કારકિર્દીનો આ 17મો POTM એવોર્ડ હતો. તે ટેસ્ટ રમતા દેશોમાં સૌથી વધુ પ્લેયર ઓફ ધ મેચ એવોર્ડ જીતનાર ખેલાડી બની ગયો છે. વિરાટ કોહલી અને સૂર્યકુમાર યાદવે પોતપોતાના કરિયરમાં 16 વખત આ એવોર્ડ જીત્યો છે. કોહલીએ આ ફોર્મેટને અલવિદા કહી દીધું છે, જ્યારે સૂર્યકુમાર યાદવ હજુ પણ રેસમાં છે. આ યાદીમાં પહેલા સ્થાને  મલેશિયાનો વિરનદીપ સિંહ છે, જેણે 22 વખત T20I માં પ્લેયર ઓફ ધ મેચનો એવોર્ડ જીત્યો છે.

આ પણ વાંચો: ધોની જ નહીં કોહલી પણ યુવરાજથી ડરતો હતો...', યોગરાજ સિંહનું ફરી ચોંકાવનારું નિવેદન

T20Iમાં સૌથી વધુ પ્લેયર ઓફ ધ મેચ એવોર્ડ જીતનારા ખેલાડી

•વિરનદીપ સિંહ- 22

•સિકંદર રઝા- 17

•વિરાટ કોહલી- 16

•સૂર્યકુમાર યાદવ- 16

•મોહમ્મદ નબી- 14

ઝિમ્બાબ્વે સામે શ્રીલંકા મેચ કેવી રહી?

ટોસ હારીને પહેલા બેટિંગ કરતા શ્રીલંકાની ટીમ માત્ર 80 રનના સ્કોર પર જ સમેટાઈ ગઈ હતી.  ફક્ત બે બેટરે બે આંકડાનો આંકડો સ્પર્શી શક્યા. કામિલ મેન્ડિસ 20 રનના સ્કોર સાથે ટીમનો સૌથી વધુ સ્કોરર રહ્યો. રઝા ઉપરાંત, ઝિમ્બાબ્વે માટે બોલિંગમાં બ્રેડ ઇવાન્સે ભારે તબાહી મચાવી અને 3 વિકેટ લીધી. ઝિમ્બાબ્વેએ 14.2 ઓવરમાં 5 વિકેટ ગુમાવીને 81 રનના લક્ષ્ય પાર કર્યો હતો. શ્રેણીની ત્રીજી અને નિર્ણાયક મેચ સાતમી સપ્ટેમ્બરે રમાશે.