સુનીલ નારાયણે T20 ક્રિકેટમાં મેળવી મોટી સિદ્ધિ, આવું કરનાર બન્યો બીજો સ્પિનર

વેસ્ટ ઈન્ડિઝના દિગ્ગજ સ્પિનર ​​સુનીલ નારાયણે T20 ક્રિકેટમાં 500 વિકેટ પૂરી કરીને શાનદાર રેકોર્ડ બનાવ્યો છે. આમ કરનાર તે બીજો સ્પિનર ​​અને ત્રીજો બોલર બની ગયો છે. તેના પહેલા વેસ્ટ ઇન્ડિઝના જ  ડ્વેન બ્રાવો અને અફઘાનિસ્તાનના રાશિદ ખાને T20 ફોર્મેટમાં આ કારનામું કર્યું છે. T20 ક્રિકેટમાં સૌથી વધુ વિકેટ લેવાનો વર્લ્ડ રેકોર્ડ બ્રાવોના નામે છે જેણે આ ફોર્મેટમાં 615 વિકેટ લીધી છે.

સુનીલ નારાયણ T20 બ્લાસ્ટ લીગ રમી રહ્યો છે

સુનીલ નારાયણે આ સિદ્ધિ ઈંગ્લેન્ડમાં ચાલી રહેલા T20 બ્લાસ્ટ દરમિયાન મેળવી હતી. સુનીલ નારાયણ આ લીગમાં સરે તરફથી રમી રહ્યો છે. ગઈકાલે ગ્લેમોર્ગન સામેની મેચમાં તેણે એક વિકેટ લઈને આ મોટી સિદ્ધિ હાંસલ કરી હતી. કોલિન ઇન્ગ્રામ નારાયણનો 500મો શિકાર બન્યો હતો.

ડ્વેન બ્રાવો લિસ્ટમાં ટોપ પર

T20 ક્રિકેટમાં સૌથી વધુ વિકેટ લેનારા ટોપ-5 બોલરોની લિસ્ટમાં ડ્વેન બ્રાવો, રાશિદ ખાન અને સુનીલ નારાયણ સિવાય ઈમરાન તાહિર અને શાકિબ અલ હસનનું નામ પણ છે. આ બંને સ્પિનરોના નામે 400થી વધુ વિકેટ છે.  ડ્વેન બ્રાવો આ લિસ્ટમાં એકમાત્ર એવો બોલર છે જેણે 600થી વધુ વિકેટ પોતાના નામે કરી છે.

T20 ક્રિકેટમાં સૌથી વધુ વિકેટ લેનાર બોલર

ડ્વેન બ્રાવો - 615

રાશિદ ખાન - 555

સુનીલ નારાયણ - 500*

ઈમરાન તાહિર - 469

શાકિબ અલ હસન - 451