5 બોલરોને BCCI નહીં પણ શુભમન ગિલ પોતાના ખર્ચે ન્યૂઝીલેન્ડ લઈ જશે, જાણો મામલો

Shubman Gill: ન્યૂઝીલેન્ડ સામેની ટેસ્ટ સિરીઝ પહેલાં ભારતીય કેપ્ટન શુભમન ગિલે તૈયારી માટે ખાસ રણનીતિ બનાવી છે. અહેવાલો અનુસાર, તેઓ પ્રવાસ દરમિયાન સાથે 4થી 5 ખાનગી નેટ બોલર લઈ જશે. આ બોલરોના આવવા-જવાથી લઈને રહેવા સુધીનો તમામ ખર્ચ ગિલ પોતે ઉઠાવશે. તેમની સાથે પ્રેક્ટિસ કરીને ગિલ ન્યૂઝીલેન્ડની પરિસ્થિતિઓને અનુરૂપ બેટિંગ સુધારવા પર ધ્યાન આપશે.

સામાન્ય રીતે વિદેશ પ્રવાસ દરમિયાન ભારતીય ક્રિકેટ કંટ્રોલ બોર્ડ (BCCI) ખેલાડીઓની પ્રેક્ટિસ માટે નેટ બોલરોની વ્યવસ્થા કરે છે. જો કે, શુભમન ગિલે પોતાના માટે અલગથી બોલરોની વ્યવસ્થા કરવાનો નિર્ણય લીધો છે. આ પગલું ટેસ્ટ ક્રિકેટની તૈયારી પ્રત્યે તેમની ગંભીરતા દર્શાવે છે.

BCCIના એક અધિકારીએ સમાચાર એજન્સી PTIને જણાવ્યું હતું કે, શુભમન ગિલ ઇન્ડિયા-એની ટેસ્ટ મેચોમાં ભાગ લેશે નહીં, કારણ કે તેમણે વનડે સિરીઝ પણ રમવાની છે. અધિકારીના જણાવ્યા અનુસાર, ગિલ 23 કે 24 ઑક્ટોબરે ન્યૂઝીલેન્ડ જવા રવાના થઈ શકે છે. તેમની સાથે જનારા ચારથી પાંચ બોલરોનો સંપૂર્ણ ખર્ચ કેપ્ટન પોતે ઉઠાવશે.

ઇંગ્લેન્ડ પ્રવાસમાં શુભમન ગિલે બેટિંગથી છાપ છોડી હતી

ગયા વર્ષે ઇંગ્લેન્ડ સામેની પાંચ ટેસ્ટ મેચની સીરિઝમાં શુભમન ગિલે 754 રન બનાવીને બેટિંગ ક્ષમતા સાબિત કરી હતી. હવે ન્યૂઝીલેન્ડમાં તેમની સામે અલગ પ્રકારનો પડકાર હશે. ત્યાંની પરિસ્થિતિઓમાં ઝડપી બોલરોને મદદ મળવાની શક્યતા રહે છે. આવી સ્થિતિમાં ટેક્નિક, ધીરજ અને પરિસ્થિતિ પ્રમાણે રમવાની ક્ષમતા મહત્ત્વપૂર્ણ બનશે.

ન્યૂઝીલેન્ડ જતાં પહેલાં શુભમન ગિલ પંજાબ તરફથી રણજી ટ્રોફીમાં રમશે. અંગત કારણોસર તેઓ ટીમની પ્રથમ મેચમાં રમી શક્યા નહોતા, પરંતુ 18 ઑક્ટોબરથી મુલ્લાનપુરમાં છત્તીસગઢ સામે શરૂ થનારી મેચમાં તેમની વાપસી થવાની છે.

રણજી ટ્રોફીની આ મેચ ગિલને લાલ બોલથી સ્પર્ધાત્મક ક્રિકેટ રમવાની તક આપશે. ત્યારબાદ ન્યૂઝીલેન્ડમાં તેમની તૈયારી અને કેપ્ટન તરીકેના પ્રદર્શન પર નજર રહેશે. ભારત માટે આ પ્રવાસ મહત્ત્વપૂર્ણ છે અને ગિલની બેટિંગ ટીમની સફળતામાં નિર્ણાયક ભૂમિકા ભજવી શકે છે.

ભારત વિરુદ્ધ ન્યૂઝીલેન્ડ: પ્રવાસનું શેડ્યૂલ

ટી-20 સિરીઝ

• પ્રથમ ટી-20: 22 ઑક્ટોબર, ક્રાઇસ્ટચર્ચ — બપોરે 12:30 વાગ્યે
• બીજી ટી-20: 24 ઑક્ટોબર, ક્રાઇસ્ટચર્ચ — બપોરે 12:30 વાગ્યે
• ત્રીજી ટી-20: 27 ઑક્ટોબર, વેલિંગ્ટન — બપોરે 12:30 વાગ્યે
• ચોથી ટી-20: 30 ઑક્ટોબર, ઑકલેન્ડ — બપોરે 12:30 વાગ્યે
• પાંચમી ટી-20: 1 નવેમ્બર, હેમિલ્ટન — બપોરે 12:30 વાગ્યે

વનડે સિરીઝ

• પ્રથમ વનડે: 4 નવેમ્બર, ઑકલેન્ડ — સવારે 7:30 વાગ્યે
• બીજી વનડે: 7 નવેમ્બર, વેલિંગ્ટન — સવારે 7:30 વાગ્યે
• ત્રીજી વનડે: 10 નવેમ્બર, હેમિલ્ટન — સવારે 7:30 વાગ્યે
• ચોથી વનડે: 13 નવેમ્બર, માઉન્ટ મૌંગાનુઈ — સવારે 7:30 વાગ્યે
• પાંચમી વનડે: 15 નવેમ્બર, માઉન્ટ મૌંગાનુઈ — સવારે 7:30 વાગ્યે

ટેસ્ટ સિરીઝ

• પ્રથમ ટેસ્ટ: 19થી 23 નવેમ્બર, વેલિંગ્ટન — સવારે 3:30 વાગ્યે
• બીજી ટેસ્ટ: 27 નવેમ્બરથી 1 ડિસેમ્બર, ક્રાઇસ્ટચર્ચ — સવારે 3:30 વાગ્યે