શું ફરી ભારત-પાકિસ્તાન વચ્ચે દ્વિપક્ષીય શ્રેણી રમાશે? લાહોરમાં BCCIના અધિકારીએ આપ્યો જવાબ
Updated: Mar 6th, 2025
GS TEAM
Rajeev Shukla: ભારતીય ક્રિકેટ કંટ્રોલ બોર્ડ (BCCI) ના ઉપાધ્યક્ષ રાજીવ શુક્લા ચેમ્પિયન્સ ટ્રોફી 2025ની સેમિફાઈનલ જોવા માટે પાકિસ્તાનના લાહોર ગયા હતા. તેમને પાકિસ્તાન ક્રિકેટ બોર્ડ દ્વારા આમંત્રણ આપવામાં આવ્યું હતું. દક્ષિણ આફ્રિકા અને ન્યૂઝીલેન્ડ વચ્ચે રમાયેલી સેમિફાઈનલ મેચ બાદ રાજીવ શુક્લાને પૂછવામાં આવ્યું કે શું નજીકના ભવિષ્યમાં ભારત અને પાકિસ્તાન વચ્ચે દ્વિપક્ષીય શ્રેણી રમાશે? આ અંગે તેમણે સ્પષ્ટ કરી દીધું કે, તે ભારત સરકારની મંજૂરીને આધીન છે.
ભારત સરકાર જે કહેશે, અમે તે પ્રમાણે ચાલીશું
ન્યૂઝીલેન્ડ અને દક્ષિણ આફ્રિકા વચ્ચે ચેમ્પિયન્સ ટ્રોફીની સેમિફાઈનલ જોવા માટે પાકિસ્તાન ક્રિકેટ બોર્ડ (PCB)ના આમંત્રણ પર લાહોર પહોંચેલા બીસીસીઆઈના વરિષ્ઠ અધિકારીએ એમ પણ કહ્યું કે, ભારતીય ટીમ સારા પ્રદર્શન માટે અનુકૂળ પિચો પર નિર્ભર નથી.' રાજીવ શુક્લાએ બુધવારે પાકિસ્તાની મીડિયાને જણાવ્યું હતું કે, 'જ્યાં સુધી તમે બંને દેશો વચ્ચે ક્રિકેટ વિશે પૂછી રહ્યા છો, તે એકદમ સ્પષ્ટ છે કે તે સરકારનો નિર્ણય છે. ભારત સરકાર જે કહેશે, અમે તે પ્રમાણે ચાલીશું.'
બંને દેશોના ચાહકો દ્વિપક્ષીય સંબંધો ફરી શરૂ કરવા માગે છે
તેમણે આગળ કહ્યું કે, 'પાકિસ્તાન લાંબા સમય પછી કોઈ ઈન્ટરનેશનલ ટુર્નામેન્ટનું આયોજન કરી રહ્યું છે અને આ સારી વાત છે. તેમણે ખૂબ જ સારી રીતે આયોજન કર્યું છે.' રાજીવ શુક્લાએ એ વાત પર સહમતિ વ્યક્ત કરી કે, બંને દેશોના ચાહકો દ્વિપક્ષીય સંબંધો ફરી શરૂ કરવા માગે છે પરંતુ તટસ્થ સ્થળે રમવાના વિચાર અંગે તેઓ સકારાત્મક નહોતા. એ વાત સાચી છે કે બંને દેશોના ચાહકો ઈચ્છે છે કે ટીમો રમે પરંતુ BCCI ની નીતિ એવી રહી છે કે દ્વિપક્ષીય મેચો એકબીજાની ધરતી પર રમવી જોઈએ અને કોઈ ત્રીજા (અથવા) તટસ્થ સ્થળ પર નહીં અને PCB ની પણ આવી જ નીતિ હશે.
BCCIની આ જ નીતિ રહી
રાજીવ શુક્લાએ આગળ કહ્યું કે, BCCI ની સતત આ જ નીતિ રહી છે. આંતરરાષ્ટ્રીય ક્રિકેટ પરિષદ (ICC) માં પણ એક જોગવાઈ છે જે સરકારની સંમતિ વિશે છે. આ એક મોટી જોગવાઈ છે તેથી તે સરકારની સંમતિના દૃષ્ટિકોણથી થાય છે. ઘણા દેશો ભારત અને પાકિસ્તાન વચ્ચે દ્વિપક્ષીય શ્રેણીનું આયોજન કરવા તૈયાર છે. આના પર તેમણે કહ્યું કે, 'દરેક બીજો દેશ ભારત-પાકિસ્તાનની યજમાની કરવાની ઓફર કરશે, કોણ નહીં કરે?'
તેમણે સરકાર અંગે કહ્યું કે, અમે સરકાર સમક્ષ અમારો દૃષ્ટિકોણ રજૂ કરીએ છીએ, પરંતુ તેઓ વિચાર-વિમર્શ પછી નિર્ણય લે છે. જ્યારે સરકાર નિર્ણય લે છે, ત્યારે તે ઘણા પાસાઓનો વિચાર કર્યા પછી લે છે. આ તેમનો આંતરિક મામલો છે. રાજીવ શુક્લાએ એ દલીલને ફગાવી દીધી કે ચેમ્પિયન્સ ટ્રોફીની ફાઈનલમાં ક્વોલિફાય થયેલી ભારતીય ટીમને આઠ ટીમોની ટુર્નામેન્ટમાં ફક્ત એક જ સ્થળે રમવાનો ફાયદો થયો. તેમણે કહ્યું કે, 'જ્યારે આ નિર્ણય ICC સ્તરે લેવામાં આવ્યો, ત્યારે નક્કી કરવામાં આવ્યું હતું કે ભારતની તમામ મેચ દુબઈમાં યોજાશે અને બાકીની મેચો પાકિસ્તાનમાં યોજાશે, તેથી તે વાજબી કે અન્યાયીનો સવાલ જ નથી.'
દુબઈમાં પણ અલગ-અલગ પ્રકારની પિચો
શુક્લાએ કહ્યું કે, 'ભારતીય ટીમ પિચો પર નિર્ભર નથી, અહીં સુધી કે દુબઈમાં પણ અલગ-અલગ પ્રકારની પિચો છે. ટીમ પોતાના પ્રદર્શનના આધારે રમે છે, ખેલાડીઓ પોતાની તાકાતના આધાર પર રમે છે અને તેઓ પિચ પર નિર્ભર નથી. જ્યારે શુક્લાને પૂછવામાં આવ્યું કે જો ફાઈનલ લાહોરમાં રમાઈ હોત તો સારું ન હોત, ત્યારે તેમણે જવાબ આપ્યો કે, 'તેના માટે ઓસ્ટ્રેલિયાએ ગઈકાલે જીતવું જોઈતું હતું પરંતુ તેઓ હારી ગયા તેથી ફાઈનલ દુબઈમાં રમાશે.'
