Ind A vs Aus A : હાર્દિક પંડ્યા ફરી ઈજાગ્રસ્ત થતાં બહાર, ધમાકેદાર ઓલરાઉન્ડરની ટીમમાં એન્ટ્રી!

Hardik Pandya Injured Again Out Of India A: ભારતીય ક્રિકેટના સ્ટાર ઓલરાઉન્ડર હાર્દિક પંડ્યા ઈજાના કારણે ઓસ્ટ્રેલિયા A સામેની ત્રણ મેચોની અનઓફિશિયલ વનડે શ્રેણીમાંથી બહાર થઈ ગયા છે. તેમની જગ્યાએ મુંબઈના વિસ્ફોટક ઓલરાઉન્ડર સૂર્યાંશ શેડગેને ટીમમાં સામેલ કરવામાં આવ્યા છે. IPL 2026 પછી ક્રિકેટથી દૂર રહેલા હાર્દિક પંડ્યાને ગયા મહિને જ આ સિરીઝ માટે ઈન્ડિયા A સ્ક્વોડમાં પસંદ કરવામાં આવ્યા હતા. પરંતુ ઈજાના કારણે તેઓ આ સ્થાનિક શ્રેણીનો ભાગ બની શકશે નહીં.

શેડગેએ ફિટનેસ ટેસ્ટ પાસ કર્યો

એક અહેવાલ મુજબ, સૂર્યાંશ શેડગેએ હાલમાં જ બેંગલુરુ સ્થિત BCCI ના સેન્ટર ઓફ એક્સેલન્સમાં ફિટનેસ ટેસ્ટ પાસ કર્યો હતો. મેડિકલ ટીમ તરફથી લીલી ઝંડી મળ્યા બાદ તેઓ તુરંત પુડુચેરી માટે રવાના થઈ ગયા છે, અને ટીમ સાથે જોડાઈ ગયા છે. શેડગેએ આ જ વર્ષે જૂનમાં બેલફાસ્ટમાં આયર્લેન્ડ સામે T20 મેચ રમીને ભારત માટે પોતાનું આંતરરાષ્ટ્રીય ડેબ્યૂ કર્યું હતું. આ ફેરફારના કારણે હવે શેડગે 11 ઓક્ટોબરથી વાનખેડે સ્ટેડિયમમાં ચંડીગઢ સામે રમાનારી મુંબઈની રણજી ટ્રોફી ઓપનર મેચમાં રમી શકશે નહીં.

નમન ધીરની જગ્યાએ અનુકૂલ રોયને તક
માત્ર હાર્દિક પંડ્યા જ નહીં, પરંતુ નમન ધીર પણ ઓસ્ટ્રેલિયા A સામેની આ શ્રેણીમાં રમતા જોવા નહીં મળે. નમનને 1 ઓક્ટોબરે વેસ્ટ ઈન્ડિઝ સામેની પાંચ મેચોની T20 શ્રેણી માટે વોશિંગ્ટન સુંદરના વિકલ્પ તરીકે સીનિયર ભારતીય ટીમમાં સામેલ કરવામાં આવ્યા છે. નમન ધીરની જગ્યાએ ઈન્ડિયા A ટીમમાં અનુકૂલ રોયને સ્થાન મળ્યું છે. ઋતુરાજ ગાયકવાડની કપ્તાની હેઠળ રમનારી ઈન્ડિયા A અને ઓસ્ટ્રેલિયા A વચ્ચે આ શ્રેણી પુડુચેરીમાં 6 ઓક્ટોબરથી 11 ઓક્ટોબર વચ્ચે રમાશે.

ઓસ્ટ્રેલિયા A શ્રેણી માટે ભારતની અપડેટ થયેલી ટીમ
ઋતુરાજ ગાયકવાડ (કેપ્ટન), દેવદત્ત પડિક્કલ (વાઈસ કેપ્ટન), પ્રિયાંશ આર્યા, સાઈ સુદર્શન, રજત પાટીદાર, કુમાર કુશાગ્ર (વિકેટકીપર), નિશાંત સિંધુ, વિપ્રજ નિગમ, અર્શિન કુલકર્ણી, અરશદ ખાન, પ્રભસિમરન સિંહ (વિકેટકીપર), ગુરજપનીત સિંહ, યશ ઠાકુર અને સૂર્યાંશ શેડગે.