Sports

એકથી એક ચઢિયાતા ધૂરંધરોનો રૅકોર્ડ તોડી બાંગ્લાદેશી વિકેટકીપરે ટેસ્ટમાં બનાવ્યો મહારૅકોર્ડ

By GS Team
19 Nov 20262 mins read
એકથી એક ચઢિયાતા ધૂરંધરોનો રૅકોર્ડ તોડી બાંગ્લાદેશી વિકેટકીપરે ટેસ્ટમાં બનાવ્યો મહારૅકોર્ડ

Litton Das Sets World Record With Eight Dismissals: સાઉથ આફ્રિકા અને બાંગ્લાદેશ વચ્ચે જોહાનિસબર્ગના વાન્ડરર્સ સ્ટેડિયમમાં રમાઈ રહેલી પ્રથમ ટેસ્ટ મેચમાં બાંગ્લાદેશના વિકેટકીપર બેટ્સમેન લિટન દાસે એક અવિસ્મરણીય વિશ્વ રૅકોર્ડ પોતાના નામે કર્યો છે. લિટન દાસ ટેસ્ટ ક્રિકેટના 149 વર્ષના ઇતિહાસમાં એક જ ઇનિંગ્સમાં વિકેટ પાછળ 8 શિકાર કરનાર વિશ્વનો પ્રથમ વિકેટકીપર બની ગયો છે.

મેચના ચોથા દિવસે (18 નવેમ્બર 2026) કગિસો રબાડાને સ્ટમ્પ આઉટ કરતાં જ લિટને આ ઐતિહાસિક સિદ્ધિ હાંસલ કરી હતી. અગાઉ એક ટેસ્ટ ઇનિંગ્સમાં 7 શિકાર કરવાનો સંયુક્ત રૅકોર્ડ પાકિસ્તાનના વસીમ બારી, ઇંગ્લૅન્ડના બોબ ટેલર, ન્યૂઝીલૅન્ડના ઇયાન સ્મિથ તથા વેસ્ટ ઇન્ડિઝના રિડલી જેકોબ્સ અને જોશુઆ ડા સિલ્વા (2023)ના નામે હતો.

એબી ડી વિલિયર્સને પણ પાછળ છોડ્યો: સદી સાથે 8 શિકાર કરનાર પ્રથમ વિકેટકીપર

● અનોખો ડબલ રૅકોર્ડ: લિટન દાસ કોઈ ટેસ્ટ મેચમાં સદી ફટકારવાની સાથે-સાથે એક જ ઇનિંગ્સમાં વિકેટ પાછળ 8 શિકાર કરનાર વિશ્વનો પ્રથમ વિકેટકીપર પણ બની ગયો છે. તેણે પ્રથમ ઇનિંગ્સમાં 179 બોલમાં 14 ચોગ્ગા અને 1 છગ્ગાની મદદથી શાનદાર 120 રન બનાવ્યા હતા. આ પહેલાં સાઉથ આફ્રિકાના ડેનિસ લિન્ડસે અને એબી ડી વિલિયર્સે જોહાનિસબર્ગમાં સદી ફટકારવાની સાથે એક ઇનિંગ્સમાં વિકેટ પાછળ 6 શિકાર કર્યા હતા.

● મુશ્ફિકુર રહીમનો રૅકોર્ડ તોડ્યો: લિટને આ મેચના ત્રીજા દિવસે 6 કેચ પકડ્યા હતા અને ચોથા દિવસે રયાન રિકેલ્ટન તથા રબાડાને સ્ટમ્પ આઉટ કરીને કુલ 8 શિકાર પૂરા કર્યા હતા. આ સાથે જ તે બાંગ્લાદેશ માટે ટેસ્ટમાં સૌથી વધુ શિકાર (154) કરનાર વિકેટકીપર બની ગયો છે, જેમાં તેણે મુશ્ફિકુર રહીમ(113 શિકાર)ને પાછળ છોડી દીધો છે. ઉલ્લેખનીય છે કે ગયા મહિને અફઘાનિસ્તાન સામેની ટેસ્ટ મેચમાં પણ લિટન દાસે કુલ 9 શિકાર કરવા ઉપરાંત સદી અને અડધી સદી ફટકારીને 'પ્લેયર ઑફ ધ મેચ'નો ઍવૉર્ડ જીત્યો હતો.

જોહાનિસબર્ગ ટેસ્ટનો રોમાંચક અહેવાલ

સાઉથ આફ્રિકાએ પ્રથમ ઇનિંગ્સમાં 557 રન બનાવ્યા હતા, જેમાં રયાન રિકેલ્ટને 102 અને કગિસો રબાડાએ 72 રનનું યોગદાન આપ્યું હતું, જ્યારે કૅપ્ટન ટેમ્બા બાવુમા 68 રન બનાવી અણનમ રહ્યો હતો. પ્રથમ ઇનિંગ્સના આધારે સાઉથ આફ્રિકાને 157 રનની મહત્ત્વપૂર્ણ લીડ મળી હતી.

જવાબમાં બાંગ્લાદેશની બીજી ઇનિંગ્સ લથડી પડી છે અને ચોથા દિવસની રમતના અંતે ખરાબ પ્રકાશ તથા વરસાદને કારણે રમત રોકાઈ ત્યાં સુધીમાં બાંગ્લાદેશે 100 રનમાં 5 વિકેટ ગુમાવી દીધી છે. હાલમાં મુશ્ફિકુર રહીમ 5 રન અને લિટન દાસ 12 રન બનાવીને ક્રીઝ પર અણનમ છે.