એશિયા કપ 2025: રનર અપ ટીમ પણ થશે માલામાલ, ચેમ્પિયન ટીમને શું મળશે?

Asia Cup 2025 Prize Money: એશિયા કપ 2025ની શરુઆત આજથી થઈ રહી છે. આ ટુર્નામેન્ટની પહેલી મેચ અફઘાનિસ્તાન અને હોંગકોંગ વચ્ચે છે. 10 સપ્ટેમ્બરે ભારત પોતાની મેચની શરુઆત UAE સામે દુબઈ ઇન્ટરનેશનલ ક્રિકેટ સ્ટેડિયમમાં કરશે. આ ટુર્નામેન્ટ 28 સપ્ટેમ્બર સુધી ચાલશે.

ખાસ વાત એ છે કે, આ વખતે ભારત અને પાકિસ્તાન ત્રણ વાર એકબીજા સામે મુકાબલો કરી શકે છે. આ વખતે એશિયા કપ T20 ફોર્મેટમાં યોજાવાનો છે, જે આવતા વર્ષે ભારત અને શ્રીલંકામાં યોજાનાર ICC T20 વર્લ્ડ કપની તૈયારી માટે ખૂબ જ મહત્ત્વપૂર્ણ માનવામાં આવી રહ્યો છે.

 ચેમ્પિયન ટીમને  2.6 કરોડ રૂપિયા મળશે

પ્રાપ્ત માહિતી પ્રમાણે 2025 સીઝન માટે ઇનામી રકમમાં પણ વધારો કરવામાં આવ્યો છે. અહેવાલ પ્રમાણે ચેમ્પિયન ટીમને લગભગ 2.6 કરોડ રૂપિયા (લગભગ 300,000 અમેરિકન ડૉલર) મળશે, જ્યારે રનર-અપ ટીમને લગભગ 1.3 કરોડ રૂપિયા (150,000 અમેરિકન ડૉલર) આપવામાં આવશે. એશિયન ક્રિકેટ કાઉન્સિલ (ACC) તરફથી હજુ સુધી સત્તાવાર પુષ્ટિ મળી નથી. જો આ પુષ્ટિ થાય છે, તો તે ગત એશિયા કપ કરતાં વધારે હશે.

આ પણ વાંચો: એશિયા કપ પહેલા નેટ પ્રેક્ટિસમાં સામસામે આવ્યા ભારત-પાકિસ્તાનના ખેલાડી, જાણો પછી શું થયું

આ વખતે 8 ટીમો એશિયા કપ ટ્રોફી જીતવા માટે એકબીજા સામે ટકરાતી નજર આવશે. ભારત, પાકિસ્તાન, શ્રીલંકા, બાંગ્લાદેશ અને અફઘાનિસ્તાનને ડાયરેક્ટ એન્ટ્રી મળી છે. આ ઉપરાંત, યુએઈ, ઓમાન, હોંગકોંગને પણ ટુર્નામેન્ટમાં સ્થાન મળ્યું છે, જે એસોસિયેટ દેશો માટે યોજાનાર ACC પ્રીમિયર કપમાં ટોપ 3 ટીમોમાં સામેલ હતી.

ભારતે અત્યાર સુધીમાં 8 વખત એશિયા કપ જીત્યો

એશિયા કપની વર્તમાન ચેમ્પિયન ભારત છે. તેણે અત્યાર સુધીમાં આઠ વખત એશિયા કપ જીત્યો છે. સૂર્યકુમાર યાદવની કૅપ્ટનશીપ હેઠળ ભારત આ વખતે પણ પોતાની તાકાત બતાવવાનો પ્રયાસ કરશે, ભલે વિરાટ કોહલી અને રોહિત શર્મા જેવા મોટા ખેલાડીઓ ટીમમાં ન હોય. ભારત 10 સપ્ટેમ્બરે UAE સામે પોતાની પહેલી મેચ રમશે. ત્યારબાદ સૌથી મોટી મેચ 14 સપ્ટેમ્બરે દુબઈમાં પાકિસ્તાન સાથે થશે, જેના પર આખી દુનિયાની નજર રહેશે. ગ્રૂપ સ્ટેજની છેલ્લી મેચ ભારત ઓમાન સામે અબુ ધાબીના શેખ ઝાયેદ સ્ટેડિયમમાં રમશે.