પાકિસ્તાન, બાંગ્લાદેશ અને ઇન્ડોનેશિયાના 15 લાખથી વધુ સાઇબર હુમલાઓને નિષ્ફળ બનાવ્યા ભારતે

1.5 Million Cyber Attacks on India: પહલગામ આતંકવાદી હુમલા બાદ પાકિસ્તાનથી આવેલા 15 લાખથી વધુ સાઇબર હુમલાઓ સામે મહારાષ્ટ્ર પોલીસે સફળતા પૂર્વક લડત આપી. ‘સેવેન ઍડ્વાન્સ પરિસિસ્ટન્ટ થ્રેટ’ નામના હેકર્સ ગ્રૂપ દ્વારા આ હુમલાઓ કરવામાં આવી રહ્યા હતા. કુલ 15 લાખ સાઇબર હુમલાઓમાંથી ફક્ત 150, એટલે કે માત્ર 1% હુમલાઓ પાકિસ્તાની હેકર્સ માટે સફળ રહ્યા.

સાઇબર હુમલાઓ માટેના દેશો

ભારત અને ખાસ કરીને સરકારી વેબસાઇટ્સ પર થયેલાં સાઇબર હુમલાઓમાં પાકિસ્તાન ઉપરાંત બાંગ્લાદેશ, ઇન્ડોનેશિયા અને મિડલ ઈસ્ટના અન્ય દેશો પણ સામેલ હતા. મહારાષ્ટ્ર પોલીસે એક નિવેદનમાં જણાવ્યું કે, ‘ઇન્ડિયા-પાકિસ્તાન વચ્ચે સિઝ ફાયરની જાહેરાત બાદ, ભારત પર થનાર સાઇબર હુમલાઓની સંખ્યા નિક્ષિપ્ત રીતે ઘટી છે, જોકે, તે સંપૂર્ણપણે બંધ નથી થયા.’

કયા પ્રકારના સાઇબર હુમલાઓ કરવામાં આવ્યા?

આ સાઇબર હુમલાઓમાં મેલવેર ડિસ્ટ્રિબ્યુશન, GPS સ્પૂફિંગ અને DDoS હુમલાઓનો સમાવેશ થયો. આ ઉપરાંત, કેટલાક કેસોમાં વેબસાઇટ્સને સંપૂર્ણપણે બદલવાની કોશિશ કરવામાં આવી. મોટા ભાગના સાઇબર હુમલાઓ નિષ્ફળ કરવામાં આવ્યા, તેમ છતાં, કેટલાક સફળ રહ્યા. જોકે, મહારાષ્ટ્ર પોલીસના સિનિયર અધિકારીએ મુંબઈના છત્રપતિ શિવાજી મહારાજ આંતરરાષ્ટ્રીય ઍરપોર્ટ અને ઇલેક્શન કમિશનની વેબસાઇટ હેક કરવામાં આવી હોવાના દાવાને નકારી કાઢ્યો છે.

આ પણ વાંચો: ચીન બાદ 6Gને લઈને મોદી સરકારનું મોટું આયોજન, 5G કરતાં સો ઘણી ઝડપથી ચાલશે ઇન્ટરનેટ

5000થી વધુ ખોટી જાણકારીઓ દૂર

સાઇબર હુમલાઓ સાથે, સોશિયલ મીડિયા દ્વારા પણ ખોટી માહિતીઓ પ્રસારિત કરવામાં આવી. ભારત-પાકિસ્તાન વચ્ચેની સેના સંબંધિત ખોટી માહિતી ખૂબ ઝડપથી પ્રસરાઈ. પોલીસ દ્વારા લગભગ 5000થી વધુ ખોટી માહિતીઓ દૂર કરવામાં આવી, જેથી બંને દેશના લોકોને સાચી અને સચોટ હકીકત જાણવા મળે.