દુનિયાભરમાં ચેટજીપીટીના સૌથી વધુ યુઝર્સ ભારતમાં: ડીપસીકના ઉપયોગમાં ત્રીજા ક્રમે

India On Top In AI: દુનિયાભરમાં ચેટજીપીટીના સૌથી વધુ યુઝર્સ ભારતમાં છે. OpenAIનું ચેટજીપીટી સૌથી પ્રચલિત આર્ટિફિશિયલ ઇન્ટેલિજન્સ છે. તેનું ફોટો જનરેશન ફીચર ખાસ કરીને ખૂબ જ લોકપ્રિય બન્યું હતું. અમેરિકાની વેન્ચર કેપિટલિસ્ટ અને વોલ સ્ટ્રીટ સિક્યોરિટીઝની ભૂતપૂર્વ એનાલિસ્ટ મેરી મીકરના રિપોર્ટ અનુસાર, ચેટજીપીટીના વિશ્વભરના સૌથી વધુ માસિક યુઝર્સ ભારતમાંથી છે, જે 13.5 ટકા છે. એપ્રિલ 2025ના આંકડા મુજબ, ડીપસીકના ઉપયોગમાં ભારત દુનિયાભરમાં ત્રીજા ક્રમે છે.

અમેરિકાને પાછળ છોડી દીધું ભારતે

આ રિપોર્ટ મુજબ, ભારતે અમેરિકા અને ઇન્ડોનેશિયાને પાછળ છોડી દીધું છે. ભારતમાં ચેટજીપીટીનો ઉપયોગ હવે વિશાળ પ્રમાણમાં થઈ રહ્યો છે. સેમ ઓલ્ટમેન દ્વારા પણ ભારતમાં આ ટૅક્નોલૉજીનું મહત્ત્વ વધતું જોવા મળી રહ્યું છે. દુનિયાભરના યુઝર્સમાં, ચેટજીપીટીના 8.9 ટકા યુઝર્સ અમેરિકામાં છે, જ્યારે ઇન્ડોનેશિયામાં 5.7 ટકા એક્ટિવ યુઝર્સ છે. મેરી મીકરના ‘ટ્રેન્ડ્સ: આર્ટિફિશિયલ ઇન્ટેલિજન્સ’ રિપોર્ટમાં આ ડેટાની નોંધ લેવાઈ છે, જેમાં ખાસ કરીને 2025માં ભારતમાં AIનો ઉપયોગ કેવો છે, તે પર ધ્યાન આપવામાં આવ્યું છે.

ડીપસીકના ઉપયોગમાં ત્રીજા ક્રમે

ડીપસીક મોબાઇલ ઍપ્લિકેશનના ઉપયોગમાં, ભારત 6.9 ટકા સાથે ત્રીજા ક્રમે છે. ચીનમાં 33.9 ટકા યુઝર્સ ડીપસીકનો ઉપયોગ કરે છે, જ્યારે રશિયા 9.2 ટકા સાથે બીજા ક્રમે છે. અમેરિકામાં 4.4 ટકા અને ઇન્ડોનેશિયામાં 3.5 ટકા યુઝર્સ ડીપસીકનો ઉપયોગ કરે છે. જો કે, આ AI મોડલ અન્ય દેશનું હોવા છતાં, તે કેવી રીતે વિશ્વભરના યુઝર્સ દ્વારા ઉપયોગમાં લેવામાં આવે છે, તે એક રસપ્રદ ટ્રેન્ડ છે.

ટેક કંપનીના ટોપ 30 લિસ્ટમાં જિયો

AIના ઉપયોગ માટે ડેટા મહત્ત્વપૂર્ણ છે, અને તે માટે યુઝર્સ જિયો કંપનીનો વધુ ઉપયોગ કરી રહ્યા છે. છેલ્લા ત્રણ દાયકાથી વિશ્વની ટોપ 30 ટૅક્નોલૉજી કંપનીઓની યાદીમાં માત્ર પાંચ કંપનીઓનો સમાવેશ થતો હતો, પરંતુ 2025માં, જિયોનો પણ સમાવેશ થયો છે. રિલાયન્સ જિયોની માર્કેટ કેપ 216 બિલિયન અમેરિકન ડૉલર છે, જે સાથે ભારતીય ટેક કંપનીઓનું પ્રભાવ વધુ સ્પષ્ટ બની રહ્યું છે.

આ પણ વાંચો: ઇનવેસ્ટમેન્ટ પ્લાનની ઓફર આવતી હોય તો બચીને રહેજો: SBIએ આપી ચેતવણી

ડેટા સેન્ટરોમાં એનર્જીનો ઉપયોગ ત્રણ ગણો વધ્યો

ઇન્ટરનેશનલ એનર્જી એજન્સીના રિપોર્ટ અનુસાર, છેલ્લા બે દાયકામાં વિશ્વભરના ડેટા સેન્ટરોમાં એનર્જીનો ઉપયોગ ત્રણ ગણો વધી ગયો છે. આ વધારાને કારણે, ભારત પણ આ યાદીમાં સમાવિષ્ટ છે. સર્વર દ્વારા ઊંચા પ્રમાણમાં વીજળી વપરાશ થતો હોવાથી, તેનું પ્રમાણ સતત વધી રહ્યું છે. અમેરિકાના અને યુરોપના દેશો વીજળીના વપરાશમાં આગળ છે, જ્યારે એશિયા-પેસિફિકના દેશો, ચીનને બાદ કરતાં, તુલનાત્મક રીતે ઓછી વીજળીનો ઉપયોગ કરે છે.