ઇન્ટરનેટ બ્રાઉઝિંગ માટે Google Chromeનો ઉપયોગ કરતાં હોય તો સચેત રહેજો, CERT-Inએ જાહેર કરી ચેતવણી

Google Chrome Security Warning: ઇન્ટરનેટ બ્રાઉઝિંગ માટે Google Chromeનો ઉપયોગ કરતા લોકોએ આજકાલ થોડી સાવચેતી રાખવાની જરૂર છે. ભારતની સાઇબર સુરક્ષા એજન્સી CERT-In એ Chromeમાં રહેલી ઘણી ગંભીર સુરક્ષા ખામીઓ અંગે ચેતવણી જાહેર કરી છે. આ ખામીઓનો ફાયદો ઉઠાવીને સાઇબર હુમલાખોરો યુઝર્સના ડિવાઇસમાં ખતરનાક કોડ ચલાવી શકે છે, બ્રાઉઝરની સુરક્ષા વ્યવસ્થાને થાપ આપી શકે છે અને સિસ્ટમના કામકાજમાં અડચણ ઊભી કરી શકે છે. ચિંતાની વાત એ છે કે તેમાંથી એક ખામીનો ઉપયોગ હુમલાખોરો પહેલેથી જ કરી રહ્યા છે. આવી સ્થિતિમાં જો તમારા કમ્પ્યુટરમાં Chromeનું જૂનું વર્ઝન ચાલી રહ્યું છે, તો બ્રાઉઝરને અપડેટ કરવામાં વિલંબ કરવો ભારે પડી શકે છે.

CERT-In દ્વારા ક્રોમમાં ટેકનિકલ ખામીઓ શોધી

CERT-In ના જણાવ્યા અનુસાર, Chromeમાં ઘણી ટેકનિકલ ખામીઓ મળી આવી છે, જેમાં JavaScript ઇન્જિન, GPU, FileSystem અને WebGL સાથે જોડાયેલી ખામીઓ સામેલ છે. સાઇબર હુમલાખોરો કોઈ ખાસ વેબપેજ દ્વારા તેનો ફાયદો ઉઠાવી શકે છે. આનાથી ડિવાઇસમાં ખતરનાક કોડ ચાલવાનો, સુરક્ષા પ્રતિબંધો તોડવાનો અથવા બ્રાઉઝર ક્રેશ થવાનો ખતરો છે. આમાં CVE-2026-125350 નામની એક ખામી એવી છે, જેનો હુમલાખોરો પહેલેથી જ ખોટો ઉપયોગ કરી રહ્યા છે, જોકે Google એ હજુ સુધી એ સ્પષ્ટ કર્યું નથી કે હુમલાખોરો કઈ રીતે તેનો ઉપયોગ કરી રહ્યા છે અને તેની પાછળ કયા લોકો છે.

એજન્સીએ આ નબળાઈઓને ગંભીર કેટેગરીમાં મૂકી

CERT-In એ 10 નવેમ્બર 2026 ના રોજ Google માં મળેલી સુરક્ષા ખામીઓ અંગે ચેતવણી જાહેર કરી હતી. એજન્સીના જણાવ્યા અનુસાર, Chromeના જૂના વર્ઝન વાપરતા યુઝર્સ આ નબળાઈઓથી પ્રભાવિત થઈ શકે છે. આ ઉપરાંત Chrome Extended Stable ના જૂના વર્ઝન પર પણ જોખમ યથાવત છે. એજન્સીએ આ નબળાઈઓને ગંભીર કેટેગરીમાં મૂકી છે. આવી સ્થિતિમાં જૂના વર્ઝન પર ચાલી રહેલા બ્રાઉઝરનો ઉપયોગ કરતા યુઝર્સની સિસ્ટમ પર સાઇબર હુમલાનું જોખમ હોઈ શકે છે.

કમ્પ્યુટરમાં ક્રોમ અપડેટ કરવાની સાદી પદ્ધતિ

CERT-Inએ યુઝર્સને Google તરફથી જાહેર કરાયેલ સિક્યોરિટી અપડેટ વહેલી તકે ઇન્સ્ટોલ કરવાની સલાહ આપી છે. આ માટે કમ્પ્યુટર પર Chrome ખોલો અને ઉપર જમણી બાજુ આપેલા ત્રણ ડોટ્સ પર ક્લિક કરો. આ પછી Helpમાં જઈને About Google Chrome પર જાઓ. બ્રાઉઝર આપમેળે અપડેટ ચેક કરશે. અપડેટ ઉપલબ્ધ હોવા પર તેને ઇન્સ્ટોલ કરો અને પ્રક્રિયા પૂરી કરવા માટે Chrome ને ફરીથી શરૂ કરો.

એન્ડ્રોઇડ અને આઇફોન યુઝર્સ માટે સૂચનાઓ

Android અને iPhone યુઝર્સ પોતપોતાના એપ સ્ટોરથી Chrome અપડેટ કરી શકે છે. યુઝર્સને Googleના અધિકારીક Chrome રિલીઝ અપડેટ પેજ પર પણ નવા સિક્યોરિટી પેચની જાણકારી મળી શકે છે. જ્યાં સુધી બ્રાઉઝર અપડેટ ન થાય, ત્યાં સુધી શંકાસ્પદ લિંક્સ અને અજાણી વેબસાઇટ્સ ખોલવાથી બચવાની સલાહ આપવામાં આવી છે.