રીબડાના ચકચારી હુમલા-ફાયરિંગ કેસમાં આખરે પૂર્વ ધારાસભ્યનાં પૌત્રની ધરપકડ

ગોંડલ : ગોંડલ તાલુકાના સડક-પીપળીયા ગામની સીમમાં તાજેતરમાં ખેતરમાં બકરા ચરાવવા અને પાકને નુકસાન પહોંચાડવા જેવી સામાન્ય બાબતે સર્જાયેલા ચકચારી સશસ્ત્ર મારામારી અને ફાયરિંગ પ્રકરણમાં પોલીસની કાર્યવાહી આગળ ધપી છે. આ કેસમાં ગોંડલનાં પૂર્વ ધારાસભ્ય મહિપતસિંહ જાડેજાનાં પૌત્ર એવા નાસતા ફરતા મુખ્ય સુત્રધાર ધૂ્રવરાજસિંહ રાજેન્દ્રસિંહ જાડેજાને રાજકોટ ગ્રામ્ય એલસીબી ટીમે લાંબા સર્ચ ઓપરેશનને અંતે તેની જ વાડીમાંથી પકડી પાડવામાં સફળતા મેળવી છે.
પ્રાપ્ત વિગતો અનુસાર, ગત તા.૩ ઓક્ટોબરની રાત્રે ૧૦.૩૦ વાગ્યાના સુમારે સડક-પીપળીયા ગામની સીમમાં આ દિલધડક ઘટના બની હતી. ખેતરમાં બકરાઓ દ્વારા પાકને નુકસાન થવાના મુદ્દે શરૂ થયેલો વિવાદ જોતજોતામાં ઉગ્ર સ્વરૂપ ધારણ કરી લીધો હતો. આ તકે ઉશ્કેરાયેલા શખ્સો દ્વારા લાકડીઓ અને લોખંડના પાઈપ જેવા હથિયારો સાથે હુમલો કરવામાં આવ્યો હતો. એટલું જ નહીં, વિસ્તારમાં દહેશત ફેલાવવાના હેતુથી હવામાં બે રાઉન્ડ ફાયરિંગ પણ કરાયું હોવાનો આક્ષેપ છે.
બનાવની ગંભીરતા જોતાં ગોંડલ તાલુકા પોલીસ અને રાજકોટ રૂરલ ક્રાઈમ બ્રાન્ચની ટીમ ત્વરિત એક્શનમાં આવી હતી. પોલીસે અગાઉ કડક કાર્યવાહી કરીને ચાર આરોપીઓકરણ સુનિયા બામણીયા (રહે.વરજર, ભાભરા, અલીરાજપુર), અરમાન મયુદ્દીન હોથી (રહે. શાપર-વેરાવળ), સમીર કાસમ વિસળ (રહે. હડમતીયા, ભેસાણ, જૂનાગઢ) અને એક બાળ આરોપી સહિતના શખ્સોને દબોચી લીધા હતા. ગુનાની વાસ્તવિકતા અને પુરાવા એકત્ર કરવા માટે પોલીસે પકડાયેલા આરોપીઓને સડક-પીપળીયા ગામની સીમમાં ઘટનાસ્થળે લઈ જઈને સમગ્ર ઘટનાનું ઝીણવટપૂર્વક રિકન્સ્ટ્રક્શન કરાવ્યું હતું, જેમાં કોણે ક્યાંથી હુમલો કર્યો અને કઈ રીતે ફાયરિંગ થયું તેની કડીઓ મેળવવામાં આવી હતી.
આ પ્રકરણમાં અગાઉ પકડવાના બાકી રહેલા પૂર્વ ધારાસભ્યના પૌત્ર ધૂ્રવરાજસિંહ રાજેન્દ્રસિંહ જાડેજા (રહે. રીબડા) અંગે એલસીબી ટીમને ખાનગી હકીકત મળી હતી. આ બાતમીના આધારે પોલીસે આજે તેને રીબડા ખાતે આવેલી તેની વાડીએથી ઝડપી પાડી કાયદેસરની સઘન પૂછપરછ હાથ ધરી છે. આ ગુનામાં સંડોવાયેલા અન્ય ફરાર શખ્સો અંગે તપાસ ચાલુ છે.