અમદાવાદ, તા. 20 ફેબ્રુઆરી, 2022, રવિવાર

આફ્રિકાના મોઝામ્બિકમાં તા. 12 ફેબ્રુઆરીના રોજ 58 વર્ષીય મૂળ ગુજરાતી એવા બિઝનેસમેન ભરત ચાવડાનું બંદૂકની અણીએ અપહરણ કરવામાં આવ્યુ હતું. આ ઘટનાના સીસીટીવી ફૂટેજ પણ સામે આવ્યા છે. સીસીટીવી ફૂટેજમાં સ્થાનિક ગેંગના સભ્યોને વેપારીનું અપહરણ કરતા જોઈ શકાય છે. આ સઘળી ઘટના સીસીટીવીમાં કેદ થઈ છે જેમાં ભરતભાઈ Keyeebe Bottle Stor ખાતે કર્મચારીઓ સાથે વ્યવસાયિક વાત કરતા હતા તે સમયે 4 જેટલા અપહરણકાર પિસ્તોલ સાથે ઘૂસ્યાં હતા અને ભરતભાઈ તરફ પિસ્તોલ તાકીને તેમનું અપહરણ કરી ઉઠાવી જતા કર્મચારીઓ ડઘાઈ ગયા હતા અને ત્યાં ભયનું વાતાવરણ સર્જાયું હતું. આ ઘટનાને કારણે ભારતીય સમુદાયમાં ચિંતા અને ડરનો માહોલ છે કારણ કે, અપહરણકર્તાઓએ હજુ સુધી પરિવારનો સંપર્ક કર્યો નથી. અપહ્યત વેપારીના મિત્ર આણંદ આત્મીય બિલ્ડકોન ભાવેશ સુતરિયાએ આ અંગે આણંદના મિતેશ પટેલ અને ગુજરાત સરકારને મદદ માટેની રજૂઆત કરી છે. આ ઘટના અંગે ભાવેશ સુતરિયાએ જણાવ્યું કે, ભારતીય સમુદાયના નાગરિકો 4-5 પેઢીથી આફ્રિકામાં સ્થાયી થયેલા છે. મોઝમ્બિક દેશના વિકાસમાં ભારતીય સમુદાયનો મહત્તમ ફાળો છે.

મોઝામ્બિક સ્થિત કુટુંબીજનો અને ગુજરાતમાં રહેતા મિત્રો વેપારીની તબીબી સ્થિતિ અંગે ચિંતિત છે. આ ઘટના અંગે રાજ્ય અને સરકાર પોતાના રાજદ્વારી સંબંધોનો યોગ્ય ઉપયોગ કરીને આફ્રિકા ખંડમાં વસતા તમામ ભારતીયોને સુરક્ષિતતાની પ્રતીતિ કરાવે તે જરૂરી બન્યું છે.