'ભારત સાથે તાત્કાલિક સંબંધો સુધારો', ટેરિફ વિવાદ વચ્ચે 19 અમેરિકન સાંસદોએ ટ્રમ્પને લખ્યો પત્ર

Donald Trump Tariff: ભારત પર ટેરિફ લગાવ્યા બાદ પોતાના જ દેશમાં અમેરિકાના રાષ્ટ્રપ્રમુખ ડોનાલ્ડ ટ્રમ્પની મુશ્કેલી વધી ગઈ છે. અમેરિકાના પૂર્વ NSA સહિત અનેક બ્યૂરોક્રેટ્સ ભારત સાથે સંબંધો ખરાબ કરવાને લઈને ટ્રમ્પ પર રોષ ઠાલવી રહ્યા છે. આ વચ્ચે અમેરિકાના સાંસદ ડેબોરો રોસ અને રો ખન્નાની આગેવાનીમાં 19 સાંસદોએ ટ્રમ્પને પત્ર લખીને ભારત સાથે તણાવપૂર્ણ સંબંધોને તાત્કાલિક સુધારવાની અપીલ કરી છે. આ સાંસદોએ ટ્રમ્પ વહીવટીતંત્ર પાસે ભારત પર વધારવામાં આવેલા ટેરિફને પરત લેવાની પણ માગ કરી છે.

'ભારત સાથે સંબંધ સુધારે અમેરિકા'

અમેરિકાના આ સાંસદોએ બુધવારે (8 ઓક્ટોબર, 2025) ડોનાલ્ડ ટ્રમ્પને લખેલા પત્રમાં કહ્યું કે, 'હાલમાં જ ટેરિફમાં વધારાના કારણે ભારતીય સામાનો પર 50 ટકા ટેક્સ થઈ ગયો. જેનાથી દુનિયાની સૌથી મોટી લોકશાહી ભારતની સાથે સંબંધ તણાવપૂર્ણ થઈ ગયા છે. આવું થયા બાદ બંને દેશો માટે નકારાત્મક પરિણામ સામે આવ્યા છે.' તમામ સાંસદોએ રાષ્ટ્રપ્રમુખ ટ્રમ્પને આ મહત્ત્વપૂર્ણ ભાગીદારીને ફરીથી સ્થાપિત કરવા અને સુધારવાનું આહ્વાન કર્યું.

આ પણ વાંચો: 'જો ન્યુક્લિયર ટેસ્ટ કરવાનું વિચાર્યું તો પરિણામ ભોગવવું પડશે', રશિયાની અમેરિકાને સીધી ધમકી

'ટેરિફના કારણે સપ્લાઈ ચેનને નુકસાન પહોંચી રહ્યું'

સાંસદોએ લખ્યું કે, ઓગસ્ટ 2025ના અંતમાં ટ્રમ્પ વહીવટી તંત્રએ ભારતીય ઉત્પાદનો પર ટેરિફ વધારીને 50 ટકા કરી દીધા હતા, જેમાં 25 ટકા રેસિપ્રોકલ ટેરિફની સાથોસાથ રશિયા પાસેથી ઓઇલ ખરીદવાના જવાબમાં 25 ટકા વધારાનો ટેરિફ પણ સામેલ હતો. આ ચાર્જ ભારતીય ઉત્પાદકો અને અમેરિકન ગ્રાહકો, બંનેને નુકસાન પહોંચાડી રહ્યા છે. તેનાથી સપ્લાઈ ચેનને નુકસાન પહોંચી રહ્યું છે, જેના પર અમેરિકન કંપનીઓ ઉત્પાદનોને બજારમાં લાવવા માટે નિર્ભર છે.

'અમેરિકન ઉત્પાદકો ભારત પર નિર્ભર'

અમેરિકન સાંસદોએ વેપાર ભાગીદાર તરીકે ભારતના મહત્ત્વ પર ભાર મૂકતા કહ્યું કે, 'અમેરિકન ઉત્પાદકો સેમિકન્ડક્ટરથી લઈને આરોગ્યસંભાળ અને ઉર્જા સુધીની મુખ્ય વસ્તુઓ માટે ભારત પર આધાર રાખે છે. ભારતમાં રોકાણ કરતી અમેરિકન કંપનીઓ વિશ્વના સૌથી ઝડપથી વિકસતા ગ્રાહક બજારોમાંના એકમાં પ્રવેશ મેળવે છે. યુએસમાં ભારતીય રોકાણથી સ્થાનિક સમુદાયો માટે નોકરીઓ અને આર્થિક તકો ઉભી થઈ છે.'

આ પણ વાંચો: ટ્રમ્પનો ફતવોઃ અમેરિકાની કોઈ યુનિવર્સિટીમાં 5%થી વધુ ભારતીય વિદ્યાર્થીને પ્રવેશ નહીં, વિદેશી વિદ્યાર્થીઓ પર 15% મર્યાદા લાગુ

'ટ્રમ્પના કારણે ભારત ચીન અને રશિયા સાથે સંબંધો વધારશે'

તેઓએ ચેતવણી આપી હતી કે, 'ટેરિફ વધારો ભારત સાથેના સંબંધોને જોખમમાં મૂકી શકે છે. તે અમેરિકન પરિવારો માટે ખર્ચ વધારી શકે છે અને અમેરિકન કંપનીઓની વૈશ્વિક સ્તરે સ્પર્ધા કરવાની ક્ષમતા ઘટાડી શકે છે.' પત્રમાં વધુમાં ચેતવણી આપવામાં આવી હતી કે ટ્રમ્પ વહીવટીતંત્રના આ પગલાં ભારતને ચીન અને રશિયાની નજીક લાવવાનું જોખમ ધરાવે છે. ક્વાડમાં પોતાની ભાગીદારી દ્વારા ભારત-પેસિફિક ક્ષેત્રમાં સ્થિર શક્તિ તરીકે ભારતના વધતા મહત્ત્વને ધ્યાનમાં રાખીને આ ઘટનાક્રમ વિશેષ રીતે ચિંતાજનક છે.