તબિયત ખરાબ હોવાનું નાટક કર્યું અને કર્મચારીઓને ઢીબી નાંખ્યા! તમિલનાડુમાં મધરાતે 17 કેદી જેલ તોડી ફરાર

Tamil Nadu Jailbreak: 17 Inmates Escape Theni Jail After Attacking Staff | જેલની ઊંચી દીવાલો અને લોખંડી સુરક્ષા વ્યવસ્થા વચ્ચે પણ કેદીઓ નાસી છૂટવામાં સફળ રહે તેવી ચોંકાવનારી ઘટના તમિલનાડુના થેની જિલ્લામાંથી સામે આવી છે. થેની જેલમાં એક જ સેલમાં બંધ 17 જેટલા કેદીઓએ જેલના કર્મચારીઓ પર જીવલેણ હુમલો કર્યો અને અંધારાનો લાભ લઈને જેલ પરિસરમાંથી ફરાર થઈ ગયા. આ સનસનાટીભરી ઘટના બાદ સમગ્ર વિસ્તાર તેમજ આસપાસના જિલ્લાઓમાં ભારે દોડધામ અને હડકંપ મચી ગયો છે.

પોલીસે તુરંત મોટા પાયે સર્ચ ઓપરેશન શરૂ કરીને ફરાર થયેલા કેદીઓ પૈકી 1 કેદીને ઝડપી પાડ્યો છે, જ્યારે બાકીના 16 કેદીઓની શોધખોળ માટે યુદ્ધના ધોરણે તપાસ હાથ ધરવામાં આવી છે.

'બીમારીનું બહાનું' અને જેલકર્મચારીઓ પર હુમલો

પોલીસ દ્વારા મળેલી પ્રાથમિક વિગતો અનુસાર, ભાગી ગયેલા તમામ 17 આરોપીઓ જેલના એક જ સેલમાં બંધ હતા. મોડી રાત્રે કેદીઓ પૈકી એકની તબિયત અચાનક લથડી હોવાની સૂચના જેલ સ્ટાફને આપવામાં આવી હતી. જેવા જેલકર્મીઓ માનવતાના ધોરણે અને સ્થિતિની તપાસ કરવા માટે સેલની અંદર ગયા, કે તરત જ અગાઉથી રચેલા ષડયંત્ર મુજબ કેદીઓએ કર્મચારીઓ પર હિંસક હુમલો કરી દીધો હતો. સ્ટાફને સંભાળવાની તક આપ્યા વગર કેદીઓ તેમને બાનમાં લઈને જેલના સુરક્ષા ઘેરાને તોડી બહાર ભાગી નીકળવામાં સફળ રહ્યા હતા.

પોલીસ તંત્રની ત્વરિત કાર્યવાહી: 17 સ્પેશિયલ ટીમો મેદાને

• દક્ષિણ ઝોનના IGP વિજયેન્દ્ર બિદારીએ સત્તાવાર રીતે પુષ્ટિ કરી છે કે સર્ચ ઓપરેશન દરમિયાન ભાગેલા કેદીઓમાંથી 1 કેદીને પકડી પાડવામાં સફળતા મળી છે.
• બાકી રહેલા 16 કેદીઓને સત્વરે જેલભેગા કરવા માટે તંત્ર દ્વારા 17 સ્પેશિયલ ટીમોની રચના કરવામાં આવી છે, જેઓ સંભવિત ઠેકાણાઓ પર દરોડા પાડી રહી છે.

ફરાર થયેલા કેદીઓની ઓળખ

• લિંગમ
• રાજા સિંગંધર
• કરુપ્પસામી
• સિલમ્બરસન
• તિરુપતિ
• મેંજીસુંદરમ
• સબરી
• પોન મુથુ
• નિજાંત
• કાર્તિક રાજા
• મુગિલન
• સેલ્વા
• તરુણ
• રાજકુમાર
• પ્રવીણ
• મુથુ ઇલંગો
• રાજુવીન

પોલીસે આ તમામ ફરાર આરોપીઓના ફોટોગ્રાફ્સ તૈયાર કરીને તમામ પોલીસ સ્ટેશનો, હાઈવે પેટ્રોલિંગ ટીમો અને સરહદી ચેકપોસ્ટો પર મોકલી આપ્યા છે.

આસપાસના જિલ્લાઓમાં હાઈ એલર્ટ: 16 સ્થળોએ ચેકપોસ્ટ

કેદીઓ સરહદ પાર ન કરી જાય તે હેતુથી આસપાસના તમામ જિલ્લાઓમાં સુરક્ષા વધારી દેવામાં આવી છે. ઇડુક્કી, મદુરૈ અને દિંડીગુલ જિલ્લાના પોલીસ તંત્રને હાઈ એલર્ટ પર મુકાયું છે.