મહાદેવ બેટિંગ એપ કેસનો મુખ્ય આરોપી સૌરભ ચંદ્રાકાર ઓમાનથી ભારત લવાયો, દેશનું સૌથી મોટું સટ્ટાબાજી નેટવર્ક ચલાવતો હતો

Mahadev Betting App Case Saurabh Chandrakar Extradition: છત્તીસગઢના ચર્ચિત મહાદેવ ઓનલાઇન બેટિંગ નેટવર્કના મુખ્ય આરોપી અને કથિત માસ્ટરમાઇન્ડ સૌરભ ચંદ્રાકારને સેન્ટ્રલ બ્યુરો ઓફ ઇન્વેસ્ટિગેશન (CBI) દ્વારા ઓમાનથી ભારત પ્રત્યાર્પિત કરવામાં આવ્યો છે. અન્ય કેન્દ્રીય એજન્સીઓના સહયોગથી થયેલી આ કાર્યવાહી બાદ CBIની વિશેષ ટીમ તેને ભારત લઈને પહોંચી છે. હવે તેનું મેડિકલ ચેકઅપ કરાવ્યા અને ટ્રાન્ઝિટ રિમાન્ડ મેળવ્યા બાદ રાયપુર લઈ જવામાં આવશે, જ્યાં સોમવારે CBIની વિશેષ કોર્ટમાં રજૂ કરવામાં આવશે. સૌરભ ચંદ્રાકાર CBIના બે કેસોમાં વોન્ટેડ છે, જેમાં એજન્સી પહેલાથી જ ચાર્જશીટ દાખલ કરી ચૂકી છે. આ ઉપરાંત એન્ફોર્સમેન્ટ ડિરેક્ટોરેટ (ED)ના એક કેસમાં પણ તેની સામે પ્રોસિક્યુશન ફરિયાદ દાખલ કરવામાં આવી ચૂકી છે.

વિદેશથી ચાલતું દેશનું સૌથી મોટું સટ્ટાબાજી નેટવર્ક

CBIએ મહાદેવ ઓનલાઇન બુક કેસની તપાસ છત્તીસગઢ સરકારની અપીલ પર શરૂ કરી હતી. તપાસમાં સામે આવ્યું કે આ દેશના સૌથી મોટા ગેરકાયદે ઓનલાઇન સટ્ટાબાજી નેટવર્કમાંથી એક હતું, જેનું સંચાલન વિદેશથી કરવામાં આવી રહ્યું હતું. આ પ્લેટફોર્મ દ્વારા ક્રિકેટ, ફૂટબોલ, પત્તા અને અન્ય ઇવેન્ટ્સ પર ગેરકાયદે સટ્ટો લગાવવામાં આવતો હતો. તપાસ એજન્સીઓના જણાવ્યા અનુસાર, દેશભરમાં ફેલાયેલી ફ્રેન્ચાઇઝી આધારિત પેનલ અને શાખાઓ દ્વારા લોકોને જોડવામાં આવતા હતા અને તેમની પાસેથી સટ્ટાની રકમ એકત્ર કરવામાં આવતી હતી.

મ્યુલ એકાઉન્ટ્સ અને હવાલા દ્વારા કરોડોનું મની લોન્ડરિંગ

તપાસમાં એ પણ સામે આવ્યું છે કે ગેરકાયદે સટ્ટાબાજીથી કમાયેલી રકમને મોટી સંખ્યામાં મ્યુલ બેંક ખાતાઓ દ્વારા વિવિધ ટ્રાન્ઝેક્શન કરીને લેયરિંગ કરવામાં આવતી હતી. ત્યારબાદ આ નાણાંને હવાલા નેટવર્ક દ્વારા વિદેશ મોકલવામાં આવતા હતા. CBIનો દાવો છે કે આ ગેરકાયદે કમાણીનો એક ભાગ કેટલાક લોકસેવકોને કથિત રીતે સંરક્ષણ આપવા (પ્રોટેક્શન મની) બદલ આપવામાં આવતો હતો, જેથી આ સિન્ડિકેટ કોઈ પણ અવરોધ વિના પોતાનો કારોબાર ચાલુ રાખી શકે.

CBI-EDની કડક કાર્યવાહી

CBIએ આ કેસમાં પ્રિવેન્શન ઓફ કરપ્શન એક્ટ, 1988 ઉપરાંત ભારતીય દંડ સંહિતા (IPC)ની ફોજદારી કાવતરું, છેતરપિંડી અને બનાવટી દસ્તાવેજો બનાવવા સંબંધિત કલમો તેમજ છત્તીસગઢ જુગાર (પ્રતિબંધ) અધિનિયમ હેઠળ ચાર્જશીટ દાખલ કરી છે. સૌરભ ચંદ્રાકાર આ કેસોમાં મુખ્ય આરોપીઓમાં સામેલ છે. બીજી તરફ, ઇડી આ કેસમાં ભારત અને વિદેશમાં આવેલી ઘણી મિલકતો પહેલાથી જ જપ્ત કરી ચૂકી છે.

આંતરરાષ્ટ્રીય સહયોગ અને રેડ કોર્નર નોટિસ બાદ સફળતા

સૌરભ ચંદ્રાકાર વિરુદ્ધ જાહેર કરાયેલી રેડ કોર્નર નોટિસના આધારે રોયલ ઓમાન પોલીસે તેની શોધખોળ કરીને કસ્ટડીમાં લીધો હતો. આ પછી CBIઅને EDએ તેની વિરુદ્ધ એકત્ર કરાયેલા પુરાવાઓ સાથે ઔપચારિક પ્રત્યાર્પણ પ્રસ્તાવ ઓમાન સરકારને મોકલ્યા હતા. ભારત સરકારની વિવિધ એજન્સીઓ, ઇન્ટરપોલની નેશનલ સેન્ટ્રલ બ્યુરો યુનિટ અને ઓમાનની સક્ષમ એજન્સીઓ વચ્ચેના સંકલન બાદ પ્રત્યાર્પણ પ્રક્રિયા પૂર્ણ થઈ હતી. મંજૂરી મળતાં CBIની ટીમ મસ્કત પહોંચી અને તેને ભારત લઈને આવી. CBIએ આ કાર્યવાહીમાં સહયોગ માટે ઓમાન સરકાર અને રોયલ ઓમાન પોલીસનો આભાર માન્યો છે. એજન્સીએ જણાવ્યું કે આ બંને દેશોની સંગઠિત આંતરરાષ્ટ્રીય અપરાધ સામેની સંયુક્ત કટિબદ્ધતા દર્શાવે છે.