બેરિકેડ લઈને ભાગ્યા, વોટર કેનનમાં કર્યો ડાન્સ; Gen-Z આંદોલનની રીત જોઈ પોલીસ ચકરાવે ચડી

Dance Against the Water Cannons: બિહારની રાજધાની પટના ફરી એકવાર વિદ્યાર્થી આંદોલનનું મુખ્ય કેન્દ્ર બન્યું છે. દેશભરમાં ચકચારી બનેલા NEET-UG 2026 પરીક્ષાના પેપર લીક અને અન્ય ગેરરીતિઓના વિરોધમાં 'કોકરોચ જનતા પાર્ટી'(CJP) દ્વારા કરવામાં આવેલા વિરોધ પ્રદર્શને પટનામાં ઉગ્ર સ્વરૂપ ધારણ કર્યું છે. જોકે, આ પ્રદર્શન દરમિયાન પટનાના માર્ગો પરથી કેટલાક એવા અણધાર્યા અને આશ્ચર્યજનક દૃશ્યો સામે આવ્યા છે, જેણે સોશિયલ મીડિયા પર ધૂમ મચાવી દીધી છે. પોલીસ દ્વારા ભીડને વિખેરવા માટે છોડવામાં આવેલા વોટર કેનનના પાણીના ફુવારા નીચે વિદ્યાર્થીઓએ પીછેહઠ કરવાને બદલે નાચી-કૂદીને અને ઉત્સવ મનાવીને અનોખી રીતે પોતાનો આક્રોશ વ્યક્ત કર્યો હતો.

વોટર કેનન સામે ન ઝૂક્યો યુવા જુસ્સો: સોશિયલ મીડિયા પર વીડિયો વાયરલ

પટનામાં યોજાયેલા આ પ્રદર્શન દરમિયાન જ્યારે વિદ્યાર્થીઓ મોટી સંખ્યામાં એકઠા થઈને શિક્ષણ મંત્રી ધર્મેન્દ્ર પ્રધાનના રાજીનામાની માંગ કરી રહ્યા હતા, ત્યારે કાયદો અને વ્યવસ્થા જાળવી રાખવા માટે મોટી સંખ્યામાં પોલીસ કાફલો તૈનાત કરવામાં આવ્યો હતો. પ્રદર્શનકારીઓને રોકવા માટે પોલીસે વોટર કેનનનો ઉપયોગ શરૂ કર્યો હતો.

સામાન્ય રીતે આવી કડક કાર્યવાહી બાદ ભીડ વિખેરાઈ જતી હોય છે, પરંતુ અહીં નજારો તદ્દન ઉલટો જોવા મળ્યો હતો. સોશિયલ મીડિયા પ્લેટફોર્મ X અને ઇન્સ્ટાગ્રામ પર વાયરલ થયેલા એક વીડિયોમાં સ્પષ્ટ જોઈ શકાય છે કે, હજારો વિદ્યાર્થીઓ પાણીના તીવ્ર પ્રવાહની વચ્ચે જ એકઠા થઈને નાચવા લાગ્યા હતા અને સૂત્રોચ્ચાર કરવા લાગ્યા હતા. વિદ્યાર્થીઓના આ અનોખા 'જોયફુલ રિબેલિયન'ને ઓનલાઇન યુઝર્સ તરફથી મિશ્ર પ્રતિસાદ મળી રહ્યો છે. કેટલાક લોકો વિદ્યાર્થીઓની આ હિંમત અને સંયમની પ્રશંસા કરી રહ્યા છે, તો કેટલાક લોકો શાંતિપૂર્ણ પ્રદર્શન સામે પોલીસની આવી કડકાઈ પર સવાલો ઉઠાવી રહ્યા છે.

બેરિકેડ્સ બન્યા રમકડાં, પોલીસ સાથે થઈ મજાક

આંદોલન માત્ર નાચવા-ગાવા પૂરતું મર્યાદિત નહોતું, પણ પટનાના રસ્તાઓ પર વિદ્યાર્થીઓનો એક અલગ જ મૂડ જોવા મળ્યો હતો. અન્ય એક વાયરલ વીડિયોમાં વિદ્યાર્થીઓ પોલીસ દ્વારા મૂકવામાં આવેલા લોખંડના ભારે બેરિકેડ્સ પર ચઢી ગયા હતા અને તેને કોઈ એમ્યુઝમેન્ટ પાર્કની રાઇડની જેમ હલાવીને સવારી કરતાં જોવા મળ્યા હતા.

એટલું જ નહીં, સુરક્ષાકર્મીઓ સામે ઊભા રહીને એક પ્રદર્શનકારીએ હસતાં હસતાં પોલીસને પૂછ્યું, "શું તમે ટીયર ગેસની વ્યવસ્થા કરી છે? તમે પાણીનો ઉપયોગ કરતાં પણ દેખાતા નથી!" આ ટીખળના થોડી જ ક્ષણો બાદ પોલીસે વોટર કેનન ચાલુ કરી દીધા હતા અને વિદ્યાર્થીઓએ તેને પણ એક ઉત્સવની જેમ વધાવી લીધો હતો. સોશિયલ મીડિયા પર લોકો આ વીડિયો ક્લિપ્સ શેર કરીને કહી રહ્યા છે કે 'આવું માત્ર બિહારમાં જ થઈ શકે'.

શા માટે ભભૂકી રહી છે આંદોલનની આગ?

આ સમગ્ર વિવાદ દિલ્હીના જંતર-મંતરથી શરૂ થયો હતો, જ્યાં NEET-UG 2026 પરીક્ષામાં થયેલી મોટી ગેરરીતિઓ અને પેપર લીકના વિરોધમાં CJP દ્વારા ધરણા શરૂ કરાયા હતા. આ આંદોલનને ત્યારે વધુ વેગ મળ્યો જ્યારે જાણીતા સામાજિક કાર્યકર્તા સોનમ વાંગચુકે વિદ્યાર્થીઓના સમર્થનમાં અનિશ્ચિત મુદ્દતના ઉપવાસ શરૂ કર્યા. તેમના ઉપવાસના 21મા દિવસે જ્યારે પ્રશાસને તેમને બળપૂર્વક હૉસ્પિટલમાં દાખલ કર્યા, ત્યારે વિદ્યાર્થીઓનો ગુસ્સો સાતમા આસમાને પહોંચી ગયો અને આ આંદોલન દિલ્હીથી વિસ્તરીને પટના, મુંબઈ અને દેશના અન્ય મોટા શહેરો સુધી પહોંચી ગયું છે.

પોલીસની કડક કાર્યવાહી અને અફવાઓનું બજાર ગરમ

બીજી તરફ, આ તણાવપૂર્ણ સ્થિતિ વચ્ચે સોશિયલ મીડિયા પર અફવાઓ ફેલાવવાનો પ્રયાસ પણ થઈ રહ્યો છે. તાજેતરમાં એક જૂનો વીડિયો વાયરલ કરીને એવો દાવો કરવામાં આવ્યો હતો કે દિલ્હી પોલીસે સંસદ માર્ચ દરમિયાન CJPના પ્રદર્શનકારીઓ પર ભારે લાઠીચાર્જ કર્યો છે. જોકે, ફેક્ટ ચેકમાં સામે આવ્યું છે કે આ વીડિયો વર્ષ 2024નો છે, જ્યારે પટનામાં BPSCના ઉમેદવારો પર લાઠીચાર્જ કરવામાં આવ્યો હતો.

હાલ પૂરતું, પટના પોલીસે સુરક્ષા વ્યવસ્થા ચુસ્ત કરી દીધી છે. પ્રદર્શન દરમિયાન સરકારી મિલકતોને નુકસાન પહોંચાડવા અને નિયમોનું ઉલ્લંઘન કરવા બદલ પોલીસે કેટલાક અજાણ્યા શખ્સો સામે FIR નોંધી છે અને ઘણા પ્રદર્શનકારીઓને કસ્ટડીમાં પણ લીધા છે. વિદ્યાર્થીઓ પોતાની માંગ પર અડગ છે અને શિક્ષણ મંત્રીના રાજીનામા વગર આંદોલન સમેટવા તૈયાર નથી.