મહારાષ્ટ્ર-હરિયાણા સહિત 10 રાજ્યોની 37 બેઠકો પર રાજ્યસભા ચૂંટણીની જાહેરાત; 16 માર્ચે વોટિંગ

Rajya Sabha Election 2026: ચૂંટણી પંચે રાજ્યસભાની ચૂંટણીના કાર્યક્રમની સત્તાવાર જાહેરાત કરી દીધી છે, જેના કારણે દેશના રાજકારણમાં ગરમાવો આવી ગયો છે. આ ચૂંટણી એવા સભ્યોની ખાલી પડેલી જગ્યાઓ ભરવા માટે યોજાઈ રહી છે, જેમનો કાર્યકાળ એપ્રિલ 2026માં પૂર્ણ થઈ રહ્યો છે. આ વખતે કુલ 10 રાજ્યોની 37 બેઠકો પર જંગ જામશે, જેમાં મહારાષ્ટ્ર, તમિલનાડુ, પશ્ચિમ બંગાળ, બિહાર અને આસામ જેવા મહત્ત્વના રાજ્યોનો સમાવેશ થાય છે.

26 ફેબ્રુઆરીએ રાજ્યસભા ચૂંટણીનું જાહેરનામું બહાર પડશે

ચૂંટણી પંચના જાહેર કરાયેલા સમયપત્રક મુજબ, 26 ફેબ્રુઆરી, 2026ના રોજ આ ચૂંટણી માટેનું જાહેરનામું બહાર પાડવામાં આવશે. ત્યારબાદ ઉમેદવારી પત્રો ભરવા, ફોર્મની ચકાસણી અને નામ ખેંચવાની પ્રક્રિયા નિયત સમયમર્યાદામાં પૂર્ણ કરવામાં આવશે. આ તમામ બેઠકો માટે 16 માર્ચ, 2026ના રોજ સવારથી મતદાન પ્રક્રિયા હાથ ધરાશે. વિશેષ વાત એ છે કે, મતદાન પૂર્ણ થયા બાદ તે જ દિવસે એટલે કે 16 માર્ચે જ મતોની ગણતરી કરીને પરિણામો જાહેર કરી દેવામાં આવશે.

આ પણ વાંચો: જમ્મુ-કાશ્મીર અંગે મોટો નિર્ણય લેવાની તૈયારી, મોદી સરકારના મંત્રીએ મહત્ત્વની અપડેટ આપી

ઓડિશાથી હિમાચલ સુધી 5 રાજ્યોમાં જામશે ખરાખરીનો જંગ

આ ચૂંટણી ઓડિશા, છત્તીસગઢ, હરિયાણા, તેલંગાણા અને હિમાચલ પ્રદેશની બેઠકો માટે પણ યોજાવાની છે. ચૂંટણીની જાહેરાત થતાંની સાથે જ તમામ રાજકીય પક્ષો એક્શન મોડમાં આવી ગયા છે અને પોતપોતાના મજબૂત ઉમેદવારોની પસંદગી કરવાની પ્રક્રિયા તેજ કરી દીધી છે. રાજ્યસભાના ગણિતને જોતાં આગામી દિવસોમાં વિવિધ રાજ્યોમાં રાજકીય હલચલ અને બેઠકોનો દોર વધવાની પૂરેપૂરી શક્યતા છે.