રાહુલ ગાંધીએ બિહારમાં ડૉક્ટર સાથે થયેલી બર્બરતાનો VIDEO શેર કર્યો, CM નીતીશ પર સાધ્યું નિશાન
Updated: Jun 5th, 2025
GS TEAM
Rahul Gandhi Slams Bihar CM Nitish Kumar : બિહારના ગયા જિલ્લામાં તાજેતરમાં જ એક ભયાનક ઘટના બની હતી. અહીં આરોપીઓએ દુષ્કર્મ પીડિતાની માતાની સારવાર માટે ગયેલા ડૉક્ટરને ઢોર માર મારી ઝાડ સાથે બાંધી દીધા હતા. ત્યારબાદ બિહાર કોંગ્રેસે ઘટનાનો વીડિયો શેર કર્યો હતો. હવે આ વીડિયો રાહુલ ગાંધીએ પણ શેર કર્યો છે અને રાજ્યના મુખ્યમંત્રી નીતીશ કુમારની સરકાર પર આકરા પ્રહારો કર્યા છે. રાહુલે ટ્વિટ કરીને કહ્યું કે, બિહારમાં બેરોજગારી, ગુના અને સ્થળાંતર જ નીતીશ સરકારની અસલી ઓળખ બની ગઈ છે.
આરોપીઓએ ડૉક્ટરને ઝાડ સાથે બાંધી ઢોર માર માર્યો
રાહુલ ગાંધીએ શેર કરેલા વીડિયોમાં જોવા મળી રહ્યું છે કે, આરોપીઓ ડૉક્ટર જિતેન્દ્ર યાદવને તેમના ઘરમાંથી ખેંચીને બહાર કાઢી રહ્યા છે, પછી તેમને ઝાડ સાથે બાંધીને ઢોર માર મારી રહ્યા છે. આ ઘટનાએ રાજ્યની કાયદો વ્યવસ્થાની પોલ ખોલી નાખી છે. રાહુલે ઘટના મામલે બિહાર સરકાર પર આકરા પ્રહારો કરી કહ્યું કે, 20 વર્ષથી સત્તામાં હોવા છતાં, નીતિશ કુમારની ડબલ એન્જિન સરકાર બિહારને સુરક્ષા, સન્માન અને વિકાસ આપવામાં સંપૂર્ણપણે નિષ્ફળ ગઈ છે.
રાહુલે નીતીશ સરકાર પર કર્યો ગંભીર આક્ષેપ
તેમણે નીતીશ સરકાર પર આક્ષેપ કરતા કહ્યું કે, ‘બિહારમાં બેરોજગારી, ગુનાઓ અને સ્થળાંતરનું સ્તર સતત વધી રહ્યું છે. આ સરકારનો મુખ્ય એજન્ડા પ્રજાને લાચાર બનાવવાનો અને સત્તા પર કબજો જાળવી રાખવાનો છે. નીતીશ સરકાર ન્યાય નહીં, પરંતુ સત્તાના રાજકારણનું પ્રતિક બની ગયા છે. હવે પ્રજાને અન્યાયના ચક્રમાંથી બહાર કાઢવાનો અને રાજ્યને સુરક્ષા, સ્વાભિમાન અને સન્માન તરફ લઈ જવાનો સમય આવી ગયો છે.’ રાહુલનું આ નિવેદન બિહારમાં કથડતી જતી કાયદો-વ્યવસ્થા અને રાજકીય અસંતોષ દર્શાવે છે.
