આગામી 36 કલાક 'ભારે'! અર્નબ વાવાઝોડાના કારણે હજારો લોકોનું સ્થળાંતર, ટ્રેનો રદ-શાળાઓમાં રજા

Cyclone Arnab Andhra Pradesh Landfall : બંગાળની ખાડીમાં સર્જાયેલું ચક્રવાત અર્નબ વધુ પ્રચંડ બન્યું છે. ભારતીય હવામાન વિભાગ (IMD)ની આગાહી મુજબ, આ વાવાઝોડું 28 ઓક્ટોબર, બુધવારે સવારે આંધ્રપ્રદેશ અને યાનમના દરિયાકાંઠે બાપટલા અને વિશાખાપટ્ટનમ વચ્ચે ત્રાટકી શકે છે. લેન્ડફોલ સમયે પવનની સતત ઝડપ 115થી 125 કિલોમીટર પ્રતિ કલાક રહેવાની અને પવનના ઝાપટા 140 કિલોમીટર પ્રતિ કલાક સુધી પહોંચવાની શક્યતા છે. વાવાઝોડાને પગલે દરિયાકાંઠાના વિસ્તારોમાં ભારે વરસાદ, પૂર અને જનજીવન ખોરવાવાની આશંકા છે. વહીવટી તંત્રએ અસરગ્રસ્ત વિસ્તારોમાં સાવચેતીનાં પગલાં તેજ કર્યા છે.

બંગાળની ખાડીમાં વાવાઝોડું વધુ પ્રચંડ બન્યું

હવામાન વિભાગના જણાવ્યા અનુસાર, બંગાળની ખાડીમાં સર્જાયેલું હવામાનનું દબાણ ક્રમશઃ ડીપ ડિપ્રેશન અને ચક્રવાતમાં ફેરવાયું હતું. ત્યારબાદ તેની તીવ્રતા વધતાં તે અત્યંત પ્રચંડ ચક્રવાતી વાવાઝોડું બન્યું છે. 26 ઓક્ટોબરના હવામાન બુલેટિનમાં વાવાઝોડું વિશાખાપટ્ટનમથી આશરે 350 કિલોમીટર દક્ષિણ-દક્ષિણપૂર્વમાં હોવાનું જણાવાયું હતું. વાવાઝોડું દરિયાકાંઠા તરફ આગળ વધતાં પવનની ઝડપ અને વરસાદની સ્થિતિ પર સતત નજર રાખવામાં આવી રહી છે. લેન્ડફોલ બાદ તેની અસર આંધ્રપ્રદેશ ઉપરાંત ઓડિશા, તેલંગાણા અને છત્તીસગઢના કેટલાક વિસ્તારોમાં પણ જોવા મળી શકે છે.

89 હજાર લોકોનું સ્થળાંતર, ટ્રેન વ્યવહારને અસર

વાવાઝોડાના જોખમને ધ્યાનમાં રાખીને અસરગ્રસ્ત વિસ્તારોમાંથી લોકોને સુરક્ષિત સ્થળોએ ખસેડવાની કામગીરી હાથ ધરવામાં આવી છે. આપેલી માહિતી અનુસાર, અત્યાર સુધીમાં આશરે 89 હજાર લોકોને સુરક્ષિત સ્થળોએ ખસેડવામાં આવ્યા છે. વાવાઝોડાની અસરને પગલે કેટલીક ટ્રેનો રદ કરવામાં આવી છે અને શાળાઓ પણ બંધ રાખવામાં આવી છે. કેન્દ્ર અને રાજ્ય સરકારના અધિકારીઓએ વાવાઝોડા સામેની તૈયારીઓની સમીક્ષા કરી છે. NDRF અને SDRFની ટીમોને તૈયાર રાખવામાં આવી છે, જ્યારે જિલ્લા સ્તરે કંટ્રોલ રૂમ સક્રિય કરીને પરિસ્થિતિ પર નજર રાખવામાં આવી રહી છે. માછીમારોને 29 ઓક્ટોબર સુધી દરિયામાં ન જવાની સલાહ આપવામાં આવી છે.

ભારે વરસાદ અને પૂરનું જોખમ

વાવાઝોડા સાથે દરિયાકાંઠાના વિસ્તારોમાં ભારે વરસાદની શક્યતા છે. નીચાણવાળા વિસ્તારોમાં પાણી ભરાવા, નદીઓના જળસ્તરમાં વધારો થવા અને વાહનવ્યવહાર ખોરવાવાનું જોખમ છે. સ્થાનિક વહીવટી તંત્રની સૂચનાઓનું પાલન કરવા અને સુરક્ષિત સ્થળે રહેવા લોકોને અપીલ કરવામાં આવી છે. હવામાન વિભાગની આગામી આગાહીઓ વાવાઝોડાની દિશા, તીવ્રતા અને વરસાદની અસર નક્કી કરવામાં મહત્ત્વપૂર્ણ રહેશે.