નવી દિલ્હી, તા. 18 સપ્ટેમ્બર 2019, બુધવાર

રેલને કર્મચારીઓને 78 દિવસનું બોનસ આપવાનો મોદી સરકારે નિર્ણય કર્યો છે. આ સિવાય કેન્દ્ર સરકારે ઈ-સિગરેટ પર સંપૂર્ણપણે પ્રતિબંધ લગાવી દીધો છે. સરકારના નિર્ણયની જાણકારી આપતા કેન્દ્રીય મંત્રી પ્રકાશ જાવડેકરે કહ્યું કે, આ વખતે રેલવેના 11 લાખ 52 હજાર કર્મચારીઓને 78 દિવસનું બોનસ આપવામાં આવશે. તેનાથી રેલવેને 2024 કરોડ રૂપિયાનો ખર્ચ આવશે. છેલ્લા 6 વર્ષોની સતત રેલવે કર્મચારીઓને કેન્દ્ર સરકાર બોનસ આપતી રહી છે. કેન્દ્ર સરકારનો આ નિર્ણય રેલ કર્મચારઓની પ્રોડક્ટિવિટી રિવાર્ડ છે.

આ સાથે જ કેબિનેટે ઈ-સિગરેટ પર પ્રતિબંધ લગાવી દીધો છે. ભારતમાં ઈ-સિગરેટ હવે સંપૂર્ણપણે પ્રતિબંધિત હશે. કેન્દ્રીય નાણાંમંત્રી નિર્મલા સિતારમણે કહ્યું કે, ઈ-સિગરેટ પરનો પ્રતિબંધનો અર્થ તેના ઉત્પાદન, આયાત-નિકાસ, ટ્રાંસપોર્ટ, વેચાણ-વિતરણ અને જાહેરાત પર સંપૂર્ણપણે પ્રતિબંધ છે. આ નવા નિર્ણયથી ઈ-સિગરેટ દ્વારા ધુમ્રપાન શિખી રહેલા યુવાનો પર લગામ લાગશે.

સ્વસ્થ્ય અને પરિવહન વિભાગના સચિવ પ્રીતિ સુદને કહ્યું કે, નવા નિયમો પ્રમાણે જો કોઈ ઈ-સિગરેટ વેચે તો, ઈમ્પોર્ટ અથવા એક્સપોર્ટ કરે તો પહેલીવાર તેને 1 વર્ષની સજા અથવા 1 લાખનો દંડ થઈ શકે છે, જો કોઈ આગળ પણ આ ગુન્હો કરે તો 3 લાખનો દંડ અથવા 5 વર્ષની સજા અથવા બંન્ને થઈ શકે છે. માનવામાં આવી રહ્યું છે કે, ઈ-સિગરેટની 400 બ્રાંડ છે, જો કે ભારતમાં ઈ-સિગરેટની કોઈ બ્રાન્ડ બનતી નથી. રિપોર્ટ પ્રમાણે ઈ-સિગરેટના 150 ફ્લેવર બજારમાં મળે છે. કેબિનેટ દ્વારા પ્રતિબંધિત લિસ્ટમાં ઈ-હુક્કા પણ સામેલ છે.