જંતર-મંતર આંદોલન પાર્ટ-2: દિલ્હી પોલીસે મંજૂરી નકારી, દીપકેની અપીલ- ધરપકડથી ડરશો નહીં

Delhi Police On Jantar Mantar Protest : દિલ્હીના જંતર-મંતર ખાતે 10 ઓક્ટોબરના રોજ યોજાનારા કોકરોચ જનતા પાર્ટી (CJP)ના વિરોધ પ્રદર્શનને દિલ્હી પોલીસે મંજૂરી આપવાનો ઈનકાર કર્યો છે. મંજૂરી રદ થવા છતાં પાર્ટીના સંસ્થાપક અભિજીત દીપકેએ લોકોને ધરપકડથી ડર્યા વગર વિરોધમાં જોડાવા આહ્વાન કર્યું છે.

પોલીસે મંજૂરી કેમ નકારી?

દિલ્હી પોલીસના જણાવ્યા મુજબ, વિરોધ પ્રદર્શન માટે નિયમ મુજબ ઓછામાં ઓછા 10 દિવસ પહેલાં અરજી કરવી જરૂરી છે. જ્યારે CJP દ્વારા 7 ઓક્ટોબરના રોજ ખૂબ જ મોડી અરજી કરવામાં આવી હતી. આ ઉપરાંત, અગાઉના પ્રદર્શન દરમિયાન અપાયેલા લેખિત વચનો અને કાનૂની શરતોનું ઉલ્લંઘન થયું હોવાથી કાયદો-વ્યવસ્થા અને ટ્રાફિક વ્યવસ્થા જાળવવા આ નિર્ણય લેવાયો છે.

નવી દિલ્હીમાં કલમ 163 લાગુ

જોઈન્ટ સીપી નૂપુર પ્રસાદે જણાવ્યું કે, નવી દિલ્હી વિસ્તારમાં ભારતીય નાગરિક સુરક્ષા સંહિતા (BNSS)ની કલમ 163 લાગુ છે. જો કોઈ વ્યક્તિ નિયમોનો ભંગ કરીને અનધિકૃત રીતે ભેગા થશે તો તેની સામે કડક કાનૂની કાર્યવાહી હાથ ધરવામાં આવશે.

'ધરપકડથી ડરશો નહીં': દીપકેની અપીલ

બેંગલુરુના ફ્રીડમ પાર્કમાં ચૂંટણી પંચ સામે યોજાયેલા વિરોધ પ્રદર્શન દરમિયાન અભિજીત દીપકેએ જણાવ્યું હતું કે, જંતર-મંતર દેશની જનતાનું છે, કોઈ એક નેતાનું નહીં. જો મુંબઈ અને બેંગલુરુમાં શાંતિપૂર્ણ વિરોધ થઈ શકતો હોય તો દિલ્હીમાં કેમ નહીં? પાર્ટીના પ્રવક્તા સૌરવ દાસે પણ સ્પષ્ટ કહ્યું કે, વિરોધ નિર્ધારિત કાર્યક્રમ મુજબ જ થશે અને લોકોએ ડિટેન્શન કે ધરપકડથી ડરવાની જરૂર નથી.

મતદાર યાદીમાંથી નામ હટાવવા સામે વિરોધ

CJPનો આક્ષેપ છે કે, વિશેષ સઘન પુનરીક્ષણ (SIR) હેઠળ મતદાર યાદીમાંથી મોટા પાયે વિરોધી મતના લોકોના નામ કાઢી નાખવામાં આવ્યા છે. જીવતા લોકોને મૃત જાહેર કરી મતાધિકારથી વંચિત રાખવામાં આવી રહ્યા છે, જે લોકશાહી સામે મોટો ખતરો છે.