રશિયન સેનામાં હજુ 55 ભારતીયો હોવાનો ખુલાસો, મુક્ત કરાવવા ભારતની રશિયા સાથે ચર્ચા

Indians In Russian Army : રશિયન સેનામાં ભરતી કરાયેલા લગભગ 140 ભારતીય નાગરિકોને સેવામાંથી મુક્ત કરી દેવામાં આવ્યા છે, જ્યારે સેનામાં હજુ પણ સેવા આપી રહેલા અન્ય 55 ભારતીયો વિશે ભારત સરકાર માહિતી એકત્ર કરી રહી છે. ભારત સરકારે આ તમામ નાગરિકોને વહેલી તકે મુક્ત કરાવી સ્વદેશ પરત લાવવા માટે રશિયન સત્તાવાળાઓ સાથે ઉચ્ચ સ્તરે વાતચીત હાથ ધરી છે. ભારત-રશિયા કન્સલ્ટેટિવ ​​કમિટીની બેઠક બાદ આ મહત્ત્વપૂર્ણ વિગતો સામે આવી છે.

રશિયન સત્તાવાળાઓ સાથે ઉચ્ચ સ્તરીય વાતચીત

ભારત સરકારે રશિયન સૈન્યમાં ફસાયેલા તમામ ભારતીય નાગરિકોને ઝડપથી મુક્ત કરાવવા માટે રશિયાના ઉચ્ચ અધિકારીઓ સાથે સતત સંપર્ક જાળવી રાખ્યો છે. અત્યાર સુધીમાં આશરે 140 જેટલા ભારતીય નાગરિકોને સેનામાંથી મુક્ત કરાવી લેવામાં આવ્યા છે. હાલમાં ભારતીય પક્ષ રશિયન સેનામાં હોવાની આશંકા ધરાવતા બાકીના 55 ભારતીયો વિશે ચોક્કસ માહિતી મેળવવા માટે રશિયન તંત્ર સાથે સંકલન સાધી રહ્યું છે. આ દરમિયાન ભારતીય તપાસ એજન્સીઓ ગેરકાયદેસર રીતે લોકોને વિદેશ મોકલતા છેતરપિંડી આચરતા એજન્ટો સામે પણ કડક કાનૂની કાર્યવાહી કરી રહી છે.

વિદેશ સચિવ દ્વારા શેર કરવામાં આવી હતી વિગતો

આ તાજા આંકડા અગાઉ વિદેશ સચિવ વિક્રમ મિસરી દ્વારા આપવામાં આવેલી માહિતીને અનુરૂપ છે. વિદેશ સચિવે અગાઉ જણાવ્યું હતું કે રશિયન સૈન્યમાં સામેલ થયેલા 227 ભારતીય નાગરિકોમાંથી 139 લોકોને સેવામાંથી મુક્ત કરાયા હતા, જ્યારે કમનસીબે 51 ભારતીય નાગરિકોના મોત થયા હતા. ભારત સરકારે આ ગંભીર મુદ્દાને રશિયા સમક્ષ વિવિધ તબક્કે અને વિવિધ સ્તરે મજબૂતીથી ઉઠાવ્યો છે.

બાકી રહેલા ભારતીયોને વહેલી તકે મુક્ત કરાવવા પ્રયાસો તેજ

હજુ પણ રશિયન સૈન્યમાં ફરજ બજાવી રહેલા તમામ ભારતીયોને વહેલી તકે મુક્ત કરાવવા અને તેમને સુરક્ષિત રીતે ભારત પાછા લાવવા માટે નવી દિલ્હી મોસ્કો સાથે સતત વાતચીત કરી રહ્યું છે. વિદેશ મંત્રાલય દ્વારા સમગ્ર પરિસ્થિતિ પર સતત નજર રાખવામાં આવી રહી છે જેથી એકપણ ભારતીય નાગરિક ત્યાં જોખમમાં ન રહે.