IPL 2026: KKR માટે ખુશખબર, 25 કરોડના ખેલાડીની આગામી મેચમાં થશે વાપસી

IPL 2026, Cameron Green : કોલકાતા નાઈટ રાઈડર્સ (KKR) માટે IPL-2026ની શરૂઆત ખૂબ જ નિરાશાજનક રહી છે. અત્યાર સુધી રમાયેલી બે મેચોમાં ટીમનો પરાજય થયો છે, જ્યારે એક મેચ વરસાદને કારણે રદ કરવી પડી હતી. આમ, કોલકાતા હજુ સુધી જીતનું ખાતું ખોલી શક્યું નથી. જોકે, ગુરુવારે ઈડન ગાર્ડન્સ ખાતે લખનૌ સુપર જાયન્ટ્સ સામે રમાનારી મહત્વની મેચ પહેલા ટીમ માટે એક રાહતના સમાચાર સામે આવ્યા છે. ટીમનો સૌથી મોંઘો ખેલાડી કેમેરોન ગ્રીન હવે બોલિંગમાં વાપસી કરવા માટે તૈયાર છે.

કેમરોન ઈજાના કારણે બોલિંગથી રહ્યો દૂર

કોલકાતા દ્વારા 25.20 કરોડ રૂપિયામાં ખરીદાયેલા ઓસ્ટ્રેલિયન ઓલરાઉન્ડર કેમેરોન ગ્રીન અત્યાર સુધી માત્ર બેટ્સમેન તરીકે રમી રહ્યો હતો. કમરના નીચેના ભાગમાં ઈજા હોવાને કારણે તેને બોલિંગથી દૂર રાખવામાં આવ્યા હતા. ક્રિકેટ ઓસ્ટ્રેલિયાએ અગાઉ સ્પષ્ટતા કરી હતી કે, ગ્રીન ભારતમાં પોતાની બોલિંગ પ્રેક્ટિસ ધીમે-ધીમે વધારી રહ્યો છે અને 8 એપ્રિલ સુધીમાં તે સંપૂર્ણ રીતે તૈયાર થઈ જશે. હવે આ સમયગાળો પૂરો થઈ ગયો હોવાથી મેનેજમેન્ટ માને છે કે, તે આગામી મેચમાં બોલિંગ કરી શકશે.

આ પણ વાંચો : ચેન્નાઈ સુપર કિંગ્સ અને ધોનીના ચાહકોને મોટો ઝટકો, આગામી બે મેચમાં માહી મેદાનમાં નહીં ઉતરે

બેટિંગમાં કેમરોનનું નિરાશાજનક પ્રદર્શન

કેમેરોન ગ્રીનનું અત્યાર સુધીનું પ્રદર્શન ટીમ માટે ચિંતાનો વિષય રહ્યું છે. બેટિંગમાં પણ તે કંઈ ખાસ કમાલ કરી શક્યો નથી. ત્રણ ઇનિંગ્સમાં તેણે માત્ર 18, 2 અને 4 રન જ બનાવ્યા છે. ગ્રીન બોલિંગ ન કરી શકતો હોવાને કારણે ટીમનું સંતુલન પણ ખોરવાઈ રહ્યું હતું, જેની અસર મુંબઈ ઈન્ડિયન્સ અને સનરાઈઝર્સ હૈદરાબાદ સામેની હારમાં જોવા મળી હતી. હવે ગ્રીન બોલિંગમાં વાપસી કરશે તો કોલકાતાને બોલિંગમાં એક મજબૂત વિકલ્પ મળશે અને ટીમ જીતની લય પ્રાપ્ત કરવા માટે મેદાનમાં ઉતરશે.

આ પણ વાંચો : મુંબઈ ઈન્ડિયન્સની સૌથી મોટી નબળાઈ સામે આવી, IPLમાં સતત ગગડી રહ્યો છે ટીમનો ગ્રાફ