હિમાચલ ભાજપ પ્રમુખ રાજીવ બિંદલના મોટા ભાઈની દુષ્કર્મના કેસમાં ધરપકડ, સોલનમાં પોલીસ કાર્યવાહી

Himachal Pradesh News: હિમાચલ પ્રદેશ ભાજપના પ્રમુખ રાજીવ બિંદલના મોટા ભાઈ રામ કુમાર બિંદલ (78)ની સોલન પોલીસે દુષ્કર્મના ગંભીર આરોપો હેઠળ ધરપકડ કરી છે. આ ચોંકાવનારી ઘટનામાં સોલન પોલીસે આરોપી સામે IPCની કલમ 64 અને 68 હેઠળ કેસ નોંધ્યો છે. આરોપી રામ કુમાર બિંદલ સોલનના સર્ક્યુલર રોડ પર રહે છે.

'ડોક્ટર તરીકે ઓળખ આપી દુષ્કર્મ આચર્યું'

અહેવાલો અનુસાર, પીડિતાએ આઠમી ઑક્ટોબરના રોજ સોલન મહિલા પોલીસ સ્ટેશનમાં ફરિયાદ નોંધાવી હતી. પીડિતાએ ફરિયાદમાં જણાવ્યું હતું કે તે લાંબા સમયથી બીમારીથી પીડાઈ રહી છે અને સાતમી ઓક્ટોબરના રોજ સોલનના જૂના બસ સ્ટેન્ડ નજીક એક ડોક્ટર પાસે સારવાર માટે ગઈ હતી. આ દરમિયાન ત્યાં હાજર રામ કુમાર બિંદલે પોતાને ડોક્ટર તરીકે ઓળખાવ્યા હતા અને તેની તપાસ કરવાના બહાને મહિલા પર દુષ્કર્મ આચર્યું હતું. પીડિત મહિલા વિરોધ કરીને તરત જ પોલીસ સ્ટેશન ભાગી જવામાં સફળ રહી હતી અને ફરિયાદ નોંધાવી હતી.

આ પણ વાંચો: બિહારમાં ચૂંટણી પહેલા ચિરાગ પાસવાનના રિસામણા, ભાજપ નેતા ચોથી વખત મનાવવા પહોંચ્યા

પોલીસ તપાસ અને ધરપકડ

ફરિયાદ મળ્યા બાદ પોલીસે તાત્કાલિક કાર્યવાહી શરૂ કરી હતી. પીડિતાનું નિવેદન કોર્ટમાં નોંધવામાં આવ્યું છે. એસપી સોલન ગૌરવ સિંહે માહિતી આપી હતી કે ટેકનિકલ પુરાવાઓનું પણ વિશ્લેષણ કરવામાં આવ્યું છે. પોલીસે આરોપી રામ કુમાર બિંદલની ધરપકડ કરી છે. તેમને કોર્ટમાં રજૂ કરવામાં આવશે અને આ મામલે વધુ તપાસ ચાલી રહી છે.