લોકસભાની બેઠકો 543થી વધીને 850 થઈ શકે છે, કેન્દ્ર સરકારે તૈયાર કર્યું નવું બિલ, 16 એપ્રિલે ગૃહમાં ચર્ચા

Govt proposes increase of seats in Lok Sabha: કેન્દ્ર સરકાર દ્વારા ભારતીય સંસદના નીચલા ગૃહ એટલે કે લોકસભાની સભ્ય સંખ્યામાં ધરખમ વધારો કરવાની દરખાસ્ત મૂકવામાં આવી છે. મળતી માહિતી અનુસાર, સરકારે સાંસદો સાથે 'બંધારણ (131મો સુધારો) બિલ, 2026' શેર કર્યું છે. આ બિલમાં લોકસભાની કુલ બેઠકોની મર્યાદા વધારીને 850 કરવાની જોગવાઈ કરવામાં આવી છે.

આ બિલ આગામી વસતી ગણતરીના આધારે લોકસભા બેઠકોની સંખ્યા વધારીને વધુમાં વધુ 850 કરવા, મતવિસ્તારોના પુનઃનિર્ધારણ (સીમાંકન) અને મહિલા અનામતના અસરકારક અમલીકરણ માટે વૈધાનિક માર્ગ મોકળો થશે. સરકારના આ પગલા સાથે, દાયકાઓથી પડતર બેઠકોના પુનર્ગઠનને સીલ કરવા અને ભાષાકીય અને પ્રાદેશિક પ્રતિનિધિત્વ માટે એક નવું માળખું સ્થાપિત કરવા માટે પ્રક્રિયા ઔપચારિક રીતે શરૂ થઈ ગઈ છે.

લોકસભામાં 16-17 એપ્રિલે મહિલા અનામત બિલ પર ચર્ચા

લાંબા સમયથી મહિલા અનામત મુદ્દો હવે લાગુ થવાની દિશામાં વધી રહ્યો છે. આ તબક્કામાં 16 એપ્રિલે સંસદમાં મહિલા અનામત બિલ રજૂ કરવાની તૈયારી કરાઈ છે, જેમાં લોકસભાની બેઠકોની સંખ્યા વધારવાનો પ્રસ્તાવ સામેલ છે. વડાપ્રધાન મોદી પણ સંસદમાં સંબોધન કરશે. સરકાર આ યોજના હેઠળ એક બંધારણીય સંશોધન બિલ, સીમાંકન કાયદાથી જોડાયેલા બિલ અને કેન્દ્ર શાસિત પ્રદેશો માટે એક સક્ષમ બિલ રજૂ કરવા જઈ રહી છે.

બંધારણ મુજબ, હાલમાં રાજ્યોમાંથી 530 અને કેન્દ્રશાસિત પ્રદેશોમાંથી 20 બેઠકો હોઈ શકે છે. જોકે, સીમાંકન પંચે કુલ બેઠકોની સંખ્યા 543 નક્કી કરી હતી. સરકારે સાંસદોને બંધારણ (131મો સુધારો) બિલની નકલો વહેંચી છે.