દવા માફિયાઓની લૂંટ પર આખરે લગામ! કેન્સરની દવાઓ પર સરકારે ટ્રેડ માર્જિન 30% કર્યું

Cancer Medicine Price Cut : કેન્સરના દર્દીઓને મોંઘી દવાઓમાંથી મોટી રાહત આપવા માટે કેન્દ્ર સરકારે મહત્ત્વનો નિર્ણય લીધો છે. સરકારે તમામ બિન-સૂચિબદ્ધ એન્ટી-કેન્સર દવાઓ પર વેપારી નફો એટલે કે ટ્રેડ માર્જિન વધુમાં વધુ 30% સુધી મર્યાદિત કરવાનો આદેશ કર્યો છે. આ નવો નિયમ બ્રાન્ડેડ અને જેનેરિક, દેશમાં બનેલી તેમજ વિદેશથી આયાત કરાયેલી અને પેટન્ટ ધરાવતી કે પેટન્ટ વગરની તમામ દવાઓ પર સમાન રીતે લાગુ પડશે. દવાઓના ભાવમાં રહેલા અતિશય નફાને કાબૂમાં લાવીને સારવારનો ખર્ચ ઘટાડવો એ આ પગલાંનો મુખ્ય હેતુ છે.

MRPમાં 70% સુધીનો મોટો ઘટાડો શક્ય

સરકારના જણાવ્યા પ્રમાણે આ નિર્ણયથી કેન્સરની કેટલીક દવાઓની મહત્તમ છૂટક કિંમત(MRP)માં 70% જેટલો ઘટાડો થઈ શકે છે. દવાઓ સસ્તી થવાથી દર્દીઓ અને તેમના પરિવારો પર સારવાર પાછળ થતો ખર્ચ મોટા પ્રમાણમાં ઘટશે. અંદાજ મુજબ આ નિર્ણયથી દેશભરના કેન્સર દર્દીઓને વાર્ષિક આશરે 2,500 કરોડ રૂપિયાની સીધી બચત થશે.

બ્રાન્ડેડ અને જેનેરિક બંને દવાઓ નિયમ હેઠળ

આ નિર્ણયની સૌથી મહત્ત્વની વાત એ છે કે, તેમાં તમામ પ્રકારની બિન-સૂચિબદ્ધ કેન્સર દવાઓને આવરી લેવામાં આવી છે. બ્રાન્ડેડ હોય કે જેનેરિક, ભારતમાં તૈયાર થયેલી હોય કે બહારથી મંગાવેલી, તમામ દવાઓ પર હવે વધુમાં વધુ 30% ટ્રેડ માર્જિનની મર્યાદા રહેશે. આ વ્યવસ્થાથી દવાના મૂળ ઉત્પાદન ખર્ચ અને દર્દી દ્વારા ચૂકવાતી રકમ વચ્ચેનું અતિશય મોટું અંતર દૂર થશે.

બજારમાં દવાઓની ઉપલબ્ધતા પણ જળવાઈ રહેશે

દવાઓના ભાવ ઘટાડવાની સાથે બજારમાં તેની નિયમિત ઉપલબ્ધતા જાળવી રાખવા પર પણ સરકારે ખાસ ભાર મૂક્યો છે. દર્દીઓને આર્થિક રાહત આપવાની સાથે સાથે કોઈપણ જીવનરક્ષક દવાની અછત ન સર્જાય તે સુનિશ્ચિત કરવામાં આવ્યું છે. આ પગલું સામાન્ય માણસને સસ્તી, સરળ અને દર્દી-કેન્દ્રી આરોગ્ય સેવાઓ પૂરી પાડવા તરફનું એક મોટું કદમ સાબિત થશે.