દિલ્હીમાં ડેન્જર લેવલ પર પ્રદૂષણ, GRAP-4 લાગુ, ધો.10-12 સિવાય તમામ ક્લાસ પણ બંધ

Delhi Air Pollution Crisis : દેશની રાજદાની દિલ્હીમાં વાયુ પ્રદૂષણ હવે ડેન્જર લેવલ પર પહોંચી ચૂક્યું છે. જેને લઈને દિલ્હી-NCRમાં GRAP-4 લાગૂ કરાયો છે. જે હેઠળ અનેક પ્રકારના પ્રતિબંધ લગાવવામાં આવ્યા છે. પરિસ્થિતિ એવી બની ચૂકી છે કે દિલ્હીની શાળાઓમાં સોમવારથી ફિઝિકલ ક્લાસ બંધ કરવાનું એલાન કરાયું છે. GRAP-4ના પ્રતિબંધોના કારણે શાળાઓ ઓનલાઈન મોડમાં શિફ્ટ કરી દેવાશે. ધોરણ 10 અને 12 સિવાય તમામ શાળા બંધ રાખવાનો આદેશ આપી દેવાયો છે.

દિલ્હીના મુખ્યમંત્રી આતિશીએ કહ્યું કે, સોમવારે GRAP-4 લાગુ થવાની સાથે જ ધોરણ 10 અને 12 સિવાય તમામ વિદ્યાર્થીઓ માટે ફિઝિકલ ક્લાસ બંધ કરી દેવાશે. તમામ શાળા આગામી આદેશ સુધી ઓનલાઈન મોડમાં ક્લાસ લેશે.

GRAP-4 હેઠળ અનેક પ્રતિબંધ લાગૂ થશે

કેન્દ્રના વાયુ ગુણવત્તા પેનલે ગ્રેડેડ રિસ્પોન્સ એક્શન પ્લાન (GRAP)ના ફેઝ-4 હેઠળ દિલ્હી-NCR માટે અનેક પ્રતિબંધોની જાહેરાત કરી છે, આ સોમવાર સવારે 8 વાગ્યાથી લાગૂ થશે. જેમાં ટ્રકોની એન્ટ્રી પર પ્રતિબંધ અને પબ્લિક પ્રોજેક્ટ્સના નિર્માણ પર અસ્થાયી રોક સામેલ છે.

આ વચ્ચે દિલ્હી સરકારમાં પર્યાવરણ મંત્રી ગોપાલ રાય સોમવારે બપોરે 2 વાગ્યે દિલ્હી સચિવાલયમાં પ્રેસ કોન્ફરન્સ કરશે. આ દરમિયાન તેઓ GRAP-4 અને દિલ્હીમાં પ્રદૂષણની સ્થિતિ પર ચર્ચા કરી શકે છે. આ પહેલા ગોપાલ રાય બપોરે 12 વાગ્યે તમામ સંબંધિત વિભાગોના પ્રમુખો સાથે બેઠક કરશે. જણાવી દઈએ કે, AQI રવિવાર સાંજે 7 વાગ્યે 457 સુધી પહોંચ્યું છે.